بين الممكن والممكون
في السلك
بابكر سلك
بين الممكن والممكون
*بين الممكن والممكون بضيع وطن
*فالممكن كان افضل مما كان
*والممكون انسان
*اسمه المواطن
*اذا كانت جميع الخيوط مجتمعة في كف منسوبي العهد الفات
*ببدأ الشغل بحلحلة شربكة تلك الخيوط وتحرير بعضها من ذلك الكف المحتكر
*تلتين سنة كفيلة باجتماع كل الخيوط مكان ما اجتمعت
*لذا كنا نتوقع اولي خطوات الانتقالية تتجه نحو تلك الخيوط
*نحن قوم كل ارفف بقالاتنا ومولاتنا ودكاكيننا وكناتيننا وطبالينا وشولات فريشينا
*تكتظ ببضائع لانجد عليها ديباجة صنع في السودان غير علي باغة صابون بشري
*يبقي الشخصية المحورية في الحياة المعيشية هو المورد ثم وكيل التوزيع وقد يكون تاجر الاجمالي متشرفا بعضوية ذلك التجمع
*فكان من الطبيعي ان يكون كبار الموردين من منسوبي ذلك العهد او اقربائهم او نسابتهم
*او حتي جيران ناس البت العرسها ود اخت شيخ فلان
*فلا لدنيا كانوا يعملون
*الحاجات الصغيرة دي امور دنيا ممكن يدوها للمعارف
*او لزوم القشرة
*وقد يكون المورد ما منهم ولا من نسابتهم
*قد يكون من الماضدهم
*فبدايات التسعينات كانت تهدف لتغيير خارطة الرأسمالية الوطنية ومسح اسماء رنانة من قوائمها
*لذا نجد مليارديرات اواخر التسعينات وبدايات الالفينات كلهم وجلهم نكرات
*نكرات ماليا
*ونكرات اجتماعيا
*لم تعرفهم الرأسمالية الوطنية الراسخة من قريب او بعيد
*ظهرت تلك الأسماء واختفت أسماء مألوفة
*الشيخ مصطفي الفقس الكجم ود طلب ابو العلا
*وبهذه المناسبة اسأل عن قنجاري وعن الروبي وعن شركات بيطار وعن صالح عثمان صالح وعن وعن وعن اسماء كتيرة كانت تمثل الوطن في شراكات مع شركات اجنبية
*شئ سيارات وشئ آليات
*بدري الكلام ده ايام كنا بنلبس صوف انجليزي وعمه توتل
*وتتزين حواء السودانية برسالة لندن
*زمن
*المهم
*لم تندثر تلك الاسماء القامات عبطا
*ولكنها ابعدت لتحل محلها اسماء لم ينزل الله بها من سلطان
*فكان علي الحكومة الانتقالية ان تلتفت للنقطة دي ابتداءا وتخلق موردين جدد يؤمنون بالثورة وبحق الوطن عليهم
*وفي حالة العدم تنشئ شركات حكومية تحتكر العمل كمورد للسلع الضرورية والاستراتيجية لضمان تخفيف العبء عن المواطن الذي اضناه النضال تلتين سنة
*ثم تلتفت انتقاليتنا لتفعل مصانع توقفت جبرا بالحرب عليها
*علي الاقل مصانع ومعاصر الزيوت والصابون
*وان تقدم لها التسهيلات
*كي تسهم في ضرب الاحتكار الداخلي الذي يتجبر علي المواطن غلاءا وتعدي
*ثم
*تلتفت لشركات التي تختص بمنتجات الالبان ومشتقاتها
*اول حاجة تلزمها تلزم حدودها وماتستعين برطل لبن من المزارع الغير مملوكة لها كي لاتؤدي الي رفع اسعار الالبان للانسان في السودان
*وان تراقب اسعارها التي تتغير مع وصول اي دفار لدفاراتها للبقالة
*ولا ماكدة يامدني؟؟؟…
*ياخ
*لو دايرين نصين شارع زلط
*مافي طريقة الا الاستعانة بشركة مختصة ومهولة
*طيب وريني شركة بالمواصفات دي اسيادها ما من مهولي العهد المهول؟؟؟
*نأسس شركتين تلاتة ولو حكوميات يحتكرن الشغل المحتكر اصلا للشركات القامت فجأة لما سودانير غلبها تقوم
*ياحمدوك
*مابين الممكن والممكون بضيع وطن يا اخوي
*المهم
*تقترب المواجهة
*ونحن كدأبنا في السنوات الاخيرة نختلف ونعترك
*ثم
*نحزن علي الخروج من التمهيدي
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*المدرسة كان فتحتوها لينا
*الا نتوصل بالواتساب يا والينا
*الترحيل ملايينا
*بالمواصلات تلتمية جنيه في اليوم منو البقدر يدينا؟؟
سلك كهربا
ننساك كيف والكلب قال عجبتني مقولة الشباب كان كفر بطلع في الكفر
والي لقاء
سلك
خلاص اعمل شركة كبيرة مع سوداكال ومادبو
ايه دا يا سلك
خليك في الكورة انت لسع بدري عليك السياسة
السياسة والكورة عند مزمل ومحمد عبد الماجد
انا مربخابي منذ ان كنت طالباً في المتوسط وحتي الان عشان ما تتهم اخوانا الاهلة
عمك تنقو من شدة ما إتمكن لمن بقي بطنه طامة وكره الكورة ذاتو، ده كلو من سوبطة حارق قلوب الدلاقين وكايدهم هههههههه
عمك تنقو صبح ممكون
يهضرب يكورك ذي مجنون
قال يا ناس وين القانون
مرتبي رايح في الليمون
عصروا علينا عصرة شديدة
حياتنا بقت كسور وديون
جمال الوالي الكان شايلنا
هارب ومطلوب للقانون
المسكين من شدة ألمه
جقلب وتووووش دخل الجالون