(ترمب ( الخرخار )

حدق العيون

خالد سليمان

(ترمب ( الخرخار )

زمان ……. لما كنا بنلعب ( الدافورى )  كان عندى ( ودعم )  مبالغة فى ( الخرخرة ) اصلو الراجل كورتو ( حبة ) …  حبة دى شنو ؟؟؟ دا ماعندو

علاقة بالكورة ( نوهائي) زى ( السمؤل ميرغنى ) كنا بنلعبو معانا عشان

( الكورة ) حقتو …..لو ما لعبناهو. طوالى بقول ( الفول فولى ) يعنى ما فى ( مخارجة ) لينا الا سيادتو يلعب ( المهاجم ) الاول … مش كدا وبس ( الكابتن ) كمان نظام ( البرنس ) لمن كان ( ضافر ) الجماعة زى اخو ( السوباط ) الصغيرونى الأيام دي …. وناس ( صبة ) و( كسيح ) ولا ( بغم ) يازول والله ( النهر ) دا كان ناس ( أديب ) جففوهو … ناسى الا يسجلو ناس ( عماد عبدالله ) جزار الغرب ….. وأهو ( عنقالى ) يلعب مع ناس ( فارس عبدالله ) و( بوى ) خط ( بارليف ) دا يا سلك ؟؟؟؟؟؟؟؟؟؟؟

• ياخى ( ودعمى ) شدة ما ( خرخار ) لمن ناس فريق ( السودنة ) يغلبونا بشيل ( الكورة ) نظام ( زيكو ) وكدا …

• عارف ناس ( كسوحى ) يكونو مبسوطين من حكاية ( زيكو ) دى … مع انها زى حقت ( قاقرين ) فى تونس لما ( توسل ) لناس ( الترجى ) يوقفوا ( القصف ) الجوى والبحرى …. ما علينا كلها ( جرسه ) كان هنا ولا كان هناك ….

• تصدق ودعمنا دا لانو فى الكورة ( كيشة ) عديل كدا … أكيش من عمو (شغيل ) كنا بنقول ليهو انت بدل تلعب

لينا فى الهجوم وربنا ما يفتح لينا ب ( شوتة ) واحدة فى قون الفريق التانى

او تلعب لينا فى الدفاع وتخرمج لينا خرمجة ناس ( اطهر ) الانا بحلف كان كمل شهر فى ( سموحه ) احلق ( صلعه ) زى حقت ( فرفور ) … اها عشان الراجل ما يلحقنا ( الزينين ) لو لعب فى الدفاع

بنقول ليهو احكم المباراة ودى الفايدة

منو … ياخى أولاد فريق( الجامع ) يسجلو عشرين قون يحسب اتنين بس

ولما يحتجوا بقول ليهم  زولكم ( سارق )

• الناس دى كان عندهم واحد كدا ( التش ) الخالق الناظر وكنا بنلعب معاهو زى ناس ( عمار ) الرجع ( الدمازين ) و ( جزار عبدالله ) البلنتى دى اوضح من الشمس زولك يضرب الطناش … وما تقول لى ( الفاضل ابوشنب ) ولا بتاع ( نيالا ) داك …

• الحاصل عندنا هنا ولدنا ( ترمب ) فات ودعمنا فى ( الخرخرة ) ياخى دا فات ود عم ( مزمل ) داك … جو بايدن

مسح بيهو الواطة والفرق لما حصل اكتر من ستين ( ٢٩٠ -٢١٤ ) وقفو ( العد )

• اها ترمب ( جنس خرخرة ) قال فى

( تلاعب ) كدا زى البعملهو ناس ( البلولة وناس تعاونية ) وزولك قال عديل كدا ما بمرق من ( البيت الابيض)

• ترمب عمل ( زيكو ) شال ( الكورة ) وقال طلاق ما يرجعها …. اها تقولوا أجاويد ناس ( بانى ) و ( برقو ) ممكن تساعد فى ( الدواس ) دا ؟؟؟ بس عشان

نرسل الفيز  على وجه السرعة …

• ربنا حلانا من ( عولاق) امريكا … متين

بننحل من ( عولاق) المريخ ؟؟؟

• سودجال  لعب بالتلات ورقات مع التوانسة ومع الغانيين ومع السودانيين

والألمان ( انترناشونال ) يا ادم …

• ( هزبر ) المريخ اخبارو شنو ؟؟؟

• ( اسد ) على المريخ ( كديسة ) مع غيره …. اسد يا على ….

• ادم ( النصاب ) يأمر ببدء الإعداد

• جهز ( الكور ) و ( الكدارات ) و ( المرايل ) يا ادم … ياخى أنت أكلت حق ( الجهاز الفنى ) ونمت بحوافز ( اللاعبين ) ياخى انت حتى ( نجيلة ) الاستاد لحقتها ( أمات طه ) … قال إعداد قال ….

• ادم وصمة ( عار ) فى مسيرة الزعيم

• شاحد ربى تلحق ( ترمب ) يا ادم ….