في الصمت كلام
محمد عثمان بلل
تسجيلات بدون نفس ..!!
• تسجيلات السنة دي غريبة.
• الاندية ما عندها نفس تسجل.
• التسجيلات عامله زي الزول البيأكل في حاجة وهو مجبور عليها.
• زي عرس غطي قدحك.
• او كمان زي ما بتريد مرتك وما بتنزل ليك نهائي بس انت قاعد معاها عشان اولادك.
• الحكاية شنو .. والحصل شنو.
• حتي الجماهير زاتها ما متابعة تسجيلات السنة دي.
• فرق من زمان.
• بتتذكروا مكاتب اتحاد الكرة زمان كانت عامله كيف.
• مش التسجيلات كانت شهر كامل.
• الجماهير كانت بتعسكر قدام مكاتب التسجيلات الفترة دي كلها.
• تجي من الصباح .. وترجع بعد ما الغفير يطلع سريرو في حوش مكاتب الاتحاد.
• هسي تجي ماشه قدام الاتحاد العام عادي.
• في السنوات الماضية كانت بتشهد صراع شرس بين القمة.
• مطاردات وأحيانا بتصل لدرجة الدخول في اشتباكات.
• عشان كان في نجوم بستاهلوا كدا.
• حتي الصحف كانت بتوزع اكتر خلال التسجيلات.
• الناس عايزه تتابع افلام الآكشن دي.
• الصراع الشرس دا كان بتفجر قبل نهاية الدوري.
• وبستمر طيلة فترة التسجيلات.
• وآخر يوم في التسجيلات دا يوم تاريخي.
• البلد كلها بتنتظر ظهور اللاعب الضجة.
• حتي حركة المرور كانت بتتعطل كمان.
• وبحصل كمان زيادة في اعداد الجماهير.
• دا كلو أصبح من الماضي.
• حاليا وبسبب تراجع المستوى أصبح هناك شح في المواهب.
• عشان كدا اختفي الصراع الشهير بين القمة.
