( تسعين دقيقة دايرنها نااار وحريقة ) …

ريـــشـــــــة زرقــــــــــاء

نــــــــاجي ابراهيــــــم

( تسعين دقيقة دايرنها نااار وحريقة ) ….

◐ ساعات ويكشر الهلال عن أنـيابه ساعات وتركض الاقدام دون إستسلام لتحقق المستحيل داخل المستطيل … الجوهرة ستتحول الى مقبرة ويتم الدفن بنجاح .. هنالك مكان مخصص للغربان وسيتم تشيعهم بصورة تليق بهم ليرقدوا بسلام.
والتسعين دقيقة دايرنها نار وحريقة ..

◐ التركيز هو المدخل الأول للفوز في مباراة اليوم .. لان مثل هاكذا مباريات تلعب علي التفاصيل الصغيرة وعلى اخطاء الخصم ويجب علي لاعبي الهلال عدم الإندفاع والهدوء وان لايتعجلوا الفوز لان الهجوم غير المدروس عواقبه وخيمة

◐ الحذر ثم الحذر من غربان الكنغو ومرتداتهم الخطيرة ومدربهم يطمع في نقاط امدرمان وعامل الارض والجمهور لم يعد لديه وجود واصبح من الماضي والملعب لم يعد صديق لصاحب الارض ومن يبذل المجهود يكسب … ودايرين نشوف مجهود جبار يعقبه إنتصار … وباذن الله مربوحة .

◐ اهاااا. نجي للنهائي المبـكر رقم (2 ) ….
( فيــتا كـلـوب VS الاحمر المغلوب) .. الكورة بدت والجماعة جابوا القون الاول قلنا خلاص فيتا كلوب بقى (فته كلوب) … بعد شوية عينك ماتشوف الإ التووووووف … وطوااالي إتذكرته النهائي المبكر الأول … نهائي ماكنت داير اتذكر النهائي داك…لانو فيه افشات وكهارب تجيب الطاشي والهارب والمشكلة في النهاية النهائي المبكر اصبح نهاية مبكرة .

◐ قال احد الظرفاء ( فيـــتا وخراب ديـــار ) هههه
وفيتا طلع عكليته وبضرب بالحتة الفيها الحديدة … خصم بحب الردم زي ماقال الكتاب وبعشق الضرب من غير حساب وماعندهم لا ندم ولا حتى بس حبة عتاب …

◐ زمااان قلنا ليكم الطيران من التمهيدي رحمة بدل تضيعو بين الكرعين في الزحمة وشن جااااب فتة الفول لللحمة ..سااي عملتوها لينا جوطة ولخمة .

ريشـــــة للجمـــــــاعة 👈🏽☆

ود البشري قال :
تيم الكونغو عملك غايتو مااااا انساني
دقيت الوصيف… خليت دفاعو يعاني
عندي وصية ليكم من قلب سوداني
اسألوا ربنا التخفيف ….. من التنزاني

و

انـت الهلال انـت الجمــال
حبك جميل سكن القلوب
ماخـــله حتـــه ولا مجــــال