تشكيلة
على صفيح ساخر
نادر التوم
تشكيلة
(١)
الهلالاب فرحانين.. أصلا ما بدومو على حال: يوم عيوطة
و يوم مبسوطة
فرحااانين شديد مع إنو عدد أهدافهم كلللها = عدد أهداف السماني فيهم (في كورة واحدة)
(٢)
و طبعا معذورين لأنو هدفهم في الحياة ما يكونو ورا المريخ.. وهم طول عمرهم وراه (و الزمن طويل)
(٣)
حمدوك مشى حمدوك جا، حمدوك حا يستقيل حمدوك إستقال.. رئيس وزراء زي رئيس المريخ (زمان)!
(٤)
أفضل إنجاز للهلال أفريقيا(التاني) يا السماني
الكلام دا كان ٨٧ يعني قبل ٣٥ سنة و قبل ما البشير يحكم
وصافة مرة واحدة و قبل مليون سنة.. معاكم حق تفرحوا بهزيمة المريخ.
(٥)
بعد فترة من خماسية مازيمبي خرج لاعب كبير في الفريق ولمح لانو اللعيبة (ما ياهم)
و بعد ثنائية السماني خرج إعلامهم ليتهم حارسهم
يعني التخوين دا ما جديد عليهم
(٦)
و لأننا ما زيهم و لا نشبههم فإننا لا نؤيد حكاية الحكم قابض دي
قابض ١٠٠ الف دولار بواقع ٦٠ ليو و ٤٠ لمساعدنو
٢٠٠٠٠ أصلو مساعدين في الأمم المتحدة؟
المريخ ما لعب كورة بتفوزو
كمل مجهودو في الكورة الفاتت
و المدرب كمل فهمو في الكورة الفاتت
(٧)
ثم ثانيا أي نعم الهلالاب فرحانين لكن ما ممكن يدفعوا مية الف دولار عشان يبتهجو (بالطيش) مشترك
المهم الاتهامات بمثل ما تلاحق لعيبة الهلال (من ناسهم) تلاحق ناديهم من منافسيهم.. إنيمبا إتهمهم.. و صحيفة الإهرام المصرية اتهمتهم و اليوم برضو متهمين..
و في رأيي السكات بأكد الحادثة و الإتهام، شان كدا ما تسكتوا.. القالو عندهم دليل قولوا ليهم :(هاتوا برهانكم إن كنتم صادقين)
(٨)
المريخ جا يتعادل و إنغلب
و لعيبتو أبدعوا (كما خصمه) في أخذ الكروت التقول جايين شركة إتصالات ما كورة
و التبرير الساذج دا _ زي الحارس باع و اللعيبة إشتروهم بتاع الجماعة_ .. ما بنطلي على إعلام المريخ و صفوته.
(٩)
منطق منطق، الهلال دافع ١٠٠ ألف دولار طيب بتعب و يلعب لشنو؟
و المريخ ما دافعين لبديو موش مفروض يجتهد و يقاتل؟
طردة الصيني كان ممكن تكون لأي لاعب من لعيبة الهلال المكرتين .. و كان ممكن يكون دافع كبير جدا للعيبة المريخ العشرة الباقين لو أصلا عندهم رغبه في الجوز أقصد الفوز.
(١٠)
أما الأهلي المصري، و لاراش و الكلام دا برضو (ما منتج)
صاح الهلال اتعادل معاو هنا
و المريخ كاد أن يهزمه هناك
لكن متبقي مبارياتو معاكم لو عملتو منتخب (بطقطقكم عااادي)
ما تقليل من شأن زول لكن الأهلي عندو ثقافة البطولات الغايبة عنكم ال ٢، و عن منتخبكم البتشكلو إنتو ال ٢
الأهلي لو بتدفع ١٠٠ الف دولار شان الهلال يغلب المريخ ما كان جاب البطولات دي كلها.. و لا كان جا تالت العالم.
(١١)
صاحبي الهلالابي البعد جوز السماني قال لي مبروك إنتو انتصرتو و عبرتو، ونحن صابنها في المحلي، قال لي وين يا طيش المجموعة بعد غلبونا.. ما استغربت لانو (كوز قحاتي) عادي يغير رأبو!!!
(١٢)
لكين الإستغربت ليو: عمك عيوط، لما غلبناهم و مازحتو، قال لي إنت أهبل؟؟ سماني شنو و هلال مريخ و كورة شنو العيشة بي ٢٥ جنيه و إنتو لسه مع الفارغة دي؟
لاقاني صبيحة المباراة شايل ليو عيشات شوووية في كيس كبيييير، و يلوح بالكيس و يكورك البل البل. خفت عليو يروح فيها!
(١٣)
الأهلي فريق بطولات و عندو ثقافة بطولات و ح يثبت الكلام دا في لقاء اليوم وارد يفوز بره قواعدو، و بالميت إمكن يجازف نقطة ،شان يتفرغ لي ناس أبو مية دولار ديل!
(١٤)
المريخ و الهلال ممكن ال ٢ يتأهلو بعد كدا إن شاءالله (لو أرادوا )
كلو واحد عندو مباراتين يفوز فيهن يعمل ١٠
الجميل العدو واحد أهلي و صن داونز
لكين حسابات لو و لو و إذا دي لولوة منكم و أذى ساي!
(١٥)
هو الهلال كان عندو مية ألف دولار يدفعها لحكام، دي حال أرضية ملعبو؟؟؟؟
تخريمة: المعلق ذاتو تعب من التعليق بسبب أرضية الملعب حقة (أب جوز السماني)!
تغريدة: في دموع حزن وفي دموع فرح
يعني لسسسه عيوطة!
(١٦)
و ما يضير البحر أمسى زاخرا إن رمى فيه غلام بحجر ؟؟؟
و يظل المريخ الحاضر و المستقبل و التأريخ.
المخدرات خطر داهم مكافحته مسؤولية الجميع
خلو بالكم من عيالكم
آخر قطرة: المية ألف،أقصد الدولار عمل كم؟؟؟
اللهم صل وسلم وبارك على سيدنا محمد و آله قد ضاقت حيلتي أدركني يا رسول الله!
الدولار عمل 9 يا عطيات غير فصاحتكم وجعجعتكم دي مافي حاجه مغطسه حجركم ولسسسسسه حتشوفو كمان وكمان يا عطيات جايكم بل زي.البل يا دلاقين وحتدلقنو
هههههه والله الختشو ماتو
اذا جابت ليها اتهام ، انتو ثبت عليكم بالدليل ماذا قدمتم ودفعتم للحكم البوتسواني بتاع الجلاكسي الما كان داسي في أول فوز أفريقي لكم على سيد البلد بضربتي جزاء والله ما اظن لو كان الحكم جمال الوالي ذاته ما كان يحتسبهن ويرفض يحسب ضربتي جزاء لامريكا، ولكن صاروخي مهند يومها لا طق لا شق فبهن، لا حضري شاف ولا من درى ، والسبب معروف إنكم خايفين من دبيلة الحنة الأفريقية بعد الأولى حقة ناس باري ديمبا والمعلم وولدكم ايفوسا السجل فيكم من حي دبروسا،
نحن فاهمنكم وعاجننكم وبالفعل لو ما شككتوا في حكم الأمس اللي كرت ٦ من الهلال تكونوا ما أنتم ، غايتو مسمار مزمل حااااااار
بالله ده كلام
بالله ده كلام اكيد ده صحفي
قال الهلال احرز المركز الثاني افريقيا مرة واحدة فقط!!!!!ههههههه. ده الخارق فشفاشكم انتم وكاهنكم الكبير. الهلال احرز ثاني ابطال افريقيا (مرتين) وليس مرة واحدةيعني ثاني الكبار وليس جعرانيات او بطولات درجة تانية. طبعا الكاهن رباكم علي الكذب وكبت الحقائق ولا نسيت تاريخ انجاز الهلال الثاني الذي كان احدث بكثير من الذي ذكرته. وماهو انجازكم مع ابطال افريقيا يااهل الجعير والعياط الاصيل؟ صعود يتيم لدوري الاربعة في بطولة الكبار وطبعا ام سن واحدة بتضحك علي ام سنون اكثر. ولو لم تكن نكره لاخبرنا ود عبدالماجد لفتح الارشيف عشان يوريك تاريخكم مع الكبار.