تشكيل كتيبة (الجن الازرق) لتحرير الرهينة ابوجريشة

صابنها
محمد عبد الماجد
تشكيل كتيبة (الجن الازرق) لتحرير الرهينة ابوجريشة

• زمان وقت تكون في مشكلة كبيرة و (عويصة) في المدرسة وعندما يقع احد الطلاب في كارثة – بدخل الفصل ويطلّع ليه اربعة من الكنبة الورا.
• اربعة ما بتفاهموا.
• اربعة طويلة!!
• الاربعة ديل بكونوا (شفوت) و(عتاولة) ودمهم حامي وعيونهم زي النار ..بشيلوا الطالب العامل الكارثة للجلد.
• الله يسألني الطالب العامل المشكلة كان بخاف من الاربعة ديل اكتر من الاستاذ.
• دي حاجة يسألني منها رب العالمين.
• عارفين الاربعة ديل كانوا منو؟
• الاول صلاح عادل.
• الثاني صلاح عادل.
• الثالث صلاح عادل.
• الرابع صلاح عادل.
• ما قاعد ابالغ ليكم – لو حسبتها ليكم بثبتها بالورقة والقلم.
• صلاح عادل دا بي اربعة.
• عليكم الله لو ما قلتوا ما شاءالله.
• عينكم حارة زي عين البوتجاز.
• في مباراة القمة فتشت عن السماني الصاوي ما شفتو ..افتكرتو ما رجع من القاهرة.
• غايتو يا السماني لو ما الشبه …كنا قلنا طردوك مع عماد الصيني.
• سألت من توني.. قالوا لي الزول دا لا معروف شارك في المباراة او لم يشارك.
• ما في زول شافو.
• بتعرفوا (الضهب) البظهر في الحفلات زمان.
• توني كان واحد منهم.
• كان (ضهب) ساكت في المباراة.
• غايتو عشان ما اكضب ساكت – في اخر دقائق المباراة شفت لي لاعب زي (بكري المدينة) لا بقول ليكم دا بكري لا بقول ليك ما بكري.
• الصلعة صلعة بكري..والكورة كورة (كابتن كابو).
• الشيء المتأكد منو التاج يعقوب ما شارك – لكن بكري المدينة ما بقدر اجزم ليكم.
• دي حاجة بيسألوني منها.
• صلاح عادل خلانا ما نعرف الشارك مع المريخ من الما يشارك.
• كلهم بقوا التاج يعقوب.
• الظاهر لاعبي المريخ دخلوا لمباراة القمة بشعار (كلنا التاج يعقوب).
• توني والتكت واحد – الاتنين ما شعرنا بيهم في مباراة القمة.
• والسبب صلاح عادل.
• تفتكروا صلاح عادل دا عندو علاقة بي احتجاز ابوجريشة في فندق موفنبيك في القاهرة.
• ما عارف.
• الصورة يمكن توضح ليكم قدام.
• عاوز اقول ليكم :
• اصدر أنا وكيل النيابة الاعلي لـ (اسير الغرام يا قلبي) قرارا بتشكيل كتيبة (الجن الازرق) المناط بها حسب المادة ب 37 من قانون (تجرحني ليه وأنا كل جراح) تحرير الرهينة عادل ابوجريشة رئيس بعثة نادي المريخ في القاهرة والمحتجز (قسرا) في فندق (موفنبيك) من اجل سداد قيمة تكلفة معسكر المريخ في الفندق الذي يحتجز فيه (الرهينة) وذلك في فترة لا يتجاوز مداها الاسبوع من تاريخ صدور القرار. كما يهيب وكيل النيابة الاعلي الجهات المسؤولة وقوات (التلتلة) الهلالية (ناي عيد مقدم) على مساعدة كتيبة (الجن الازرق) للقيام بمهامها الوطنية الجسيمة لتحرير الرهينة السودانية المحتجزة في جمهورية مصر العربية.
• صدر تحت توقيعي وكيل النيابة الاعلي لهيئة قطاع (ورد الغرام انا ما شفتو) على ان تبعث صورة من القرار الى نادي الهلال السوداني – نادي المريخ السوداني – الاتحاد السوداني – نادي الاهلي المصري – مجموعة (شفتنة) لتخليص اقفال الابواب المسكرة – جماعة (رترتة) لمحو الاثار – منظمة (ما قلنا ليك الحب عذاب قاسي وصعيب من اولو ، ما رضيت كلامنا وجيب براك أهو دا العذاب اتحملو).
• ويهيب السيد وكيل النيابة الاعلي من نائب رئيس نادي المريخ محمد سيد احمد الجاكومي (الرئيس المناوب) ان يبقى على مهمة كتيبة (الجن الازرق) سرية وان لا يخرج في (لايف) او يكتب (بوست) عن العملية السرية الحربية لكتيبة (الجن الازرق).
• الجاكومي قال حمدوك قال ليه انا مريخابي اكتر منك.
• وقت حمدوك فات ..مسك في البرهان وحميدتي.
• مريخابي ..نعمل ليه شنو؟
• عادي عندهم.
• الجدير بالذكر ان كتيبة (الجن الازرق) كتيبة انتحارية يقودها الرائد ياسر مزمل الشهير بـ (مزمل لا) تحت تحت (9 سريعة) شيء تشوف وشيء ما تشوف ، بين قوسين ابو رباط صليبي هداف البطولة الافريقية والذي استطاع ان يحرر من قبل (كرشوم) مدافع المريخ من اثار الهدف العكسي الذي سجله في مرماه كعربون (كفالة) وعن طريق النيران (الصديقة) لصالح الكفيل الاهلي المصري.
• الصديق عند الضيق.
• الاهلي هسع في (ضيقة) شديدة.
• وكانت كتيبة (الجن الازرق) قد قامت بطلعات جوية رهيبة في مباراة القمة الاخيرة اسر على اسرها (حمزة داؤود) مدافع نادي المريخ السوداني كما اعتبر (عماد الصيني) بعد نهاية المباراة في عداد المفقودين ، وقد تم ارسال (ضبطية) عسكرية لملاحقة الصيني الذي تم رصده عبر الاقمار الصناعية (الستلايت) في الحدود السودانية الاثيوبية وهو في حالة يرثى لها وهو يردد (قلت ليكم ما قادر غيروني ..ما سمعتوا الكلام لمن طردوني – انا اعمل ليكم شنو؟ اتقطع ليكم).
• في ذات السياق اشارت تقارير (روسية) ان نادي المريخ وعبر (الرئيس المناوب) عقد جلسات سرية مع قيادات رفيعة في مجلس السيادة وذلك لتحرير ملعب المريخ وتجهيزه للمناسبات القادمة في ظل النهضة التى حدثت في ملعب الهلال (الجوهرة الزرقاء).
• وكان مدير جهاز الامن والمخابرات السابق صلاح قوش قد قاد محاولات سابقة لإطلاق سراح عادل ابوجريشة في ظل عدم رد رئيس النادي حازم مصطفى على مكالمات فندق (موفنبيك) مما اجبر الفندق على احتجاز ابوجريشة كرهينة حتى سداد المبلغ المستحق على نادي المريخ.
• الخارجية السودانية يجب ان تتدخل.
• وين السفارة السودانية في مصر من الكلام دا؟
• وتبدو ضبابية الموقف في المريخ الآن كبيرة – حيث اشارت بعض التقارير الصحفية على اختفاء الناطق الرسمي لنادي المريخ هيثم كابو – ولا تدري المصادر حتى كتابة هذا التقرير ان كان كابو (محتجز) هو الاخر في مصر ام لا؟
• كابو لو حجزوه شيلوا شيلتكم ..لسانو اطول من كورة امير كمال.
• وكان اخر تسجيل صوتي للناطق الرسمي للمريخ السيد / هيثم كابو عبر احدى الفضائيات المصرية، والتى ظهر فيها كابو وهو يختم حديثه للقناة المصرية (يا السماني قوم جيب التاني) ومن ديك لم يشاهده احد ..ويبدو والله اعلم ان قائد كتيبة (الجن الازرق) الرائد طيار حربي ياسر مزمل قد التقط ذبذبات تصريحات الناطق الرسمي للمريخ ليكون الرد عليه من قبل قائد الكتيبة شخصيا في مباراة القمة الاخيرة.
• مباراة القمة كانت قد شهدت احداث مؤسفة حيث تم التهجم على مقاعد الاحتياطي وتحطيمها من قبل لاعبي المريخ الذين لم ترق لهم الاجواء السودانية لذلك قرروا ان يحطموا كراسي مقاعد البدلاء تعبيرا منهم على عدم (التأقلم) على الاجواء السودانية.
• علاقة عدم (التأقلم) على الاجواء بالموضوع دا شنو؟
• ما عارف ؟ لكن ناس بكري المدينة ديل اتوقعوا منهم أي حاجة.
• كان يمكن ان يتم احتجاز السماني وتوني وحمزة داؤود وبكري المدينة وكلارك كرهائن الى حين اصلاح كراسي مقاعد البدلاء التى تم تحطيمها من قبل لاعبي المريخ.
• بمناسبة بكري المدينة قالوا ان البصمة الوحيدة التى وضعها بكري المدينة في مباراة القمة هي (الحلاقة) التى ظهر بها قبل دخوله للملعب للمشاركة في المباراة كبديل – حيث اختفى اللاعب بعد ذلك ولم يشاهده احد إلّا في اليوم التالي من المباراة في ظل الهيمنة التى فرضها اللورد صلاح عادل الذي طرد عماد الصيني في الدقيقة 55 من عمر المباراة واستبدل السماني الصاوي والمحترف توني ورمضان عجب وحجز ابوجريشة في فندق موفنبيك في القاهرة حسب مزاعم (روسية).
• علاقة اللورد صلاح عادل بحجز ابوجريشة في القاهرة شنو؟
• ما عارف – لكن ناس المريخ ما غريبة عليهم لو قالوا السبب هو صلاح عادل.
• الانباء الواردة من القاهرة اكدت ان الحالة النفسية لعادل ابوجريشة المحتجز في فندق موفنبيك سيئة جدا بعد هدف ياسر مزمل قائد كتيبة (الجن الازرق) ، وقيل ان الكفيل المصري يتعامل بشيء من القسوة مع (الوصيف) الذي حاول ان ينقل مباراته امام (الكفيل) خارج القاهرة ولكن فشلت مساعيه في ظل تشدد الادارة الهلالية في شروطها ومطالبها.
• وبدأ واضحا ان مباراة الكفيل مع الفريق الذي يكفله سوف تأتي على نسق (ما قالوا عليك حنين نان بس وينها الحنية).
• …….
متاريس
• كتيبة (الجن الازرق) اعادت خالد عزالدين من جديد للكتابة.
• قبل كوني زميل وازعم اني صديق لخالد عزالدين انا (قارئ) لخالد عزالدين – عودة حميدة يا خالد عزالدين.
• مشتاقين لحروفك.
• لم يغب خالد حتى يعود.
• بس ما تنقطع.
• الساحة محتاجة لكتاباتك.
• ما مهم يرجع خالد ويكتب في (ريمونتادا) – المهم يرجع حتى لو كان ذلك في صحيفة اخرى.
• يا خالد ما تقيف.
• كل يوم اجبر لتأخير الكتابة الفنية عن مباراة القمة.
• بكرة ان شاءالله نكتب (فنيا) عن المباراة ان لم يستجد في الامور جديد وان كان في العمر بقية.
• ….
• ترس اخير : بنحررك يا ابوجريشة ما تخاف.