تصب في (لوزان) وتنقط في (الخرطوم) !!

صابنها
محمد عبدالماجد
تصب في (لوزان) وتنقط في (الخرطوم) !!

• انتصار عريض وكبير حققته لجنة تطبيع الهلال امس .. صادوا عصفورين بحجر واحد . الانتصار الاول تمثل في قرار المحكمة الدولية الرياضية (كاس) عندما اصدرت قرارا في قضية الهلال ضد ثلاثي المريخ جاء شكلا ومضمونا في صالح الهلال ، حيث (أصدرت محكمة التحكيم الرياضي “كاس” بخصوص قضية الثلاثي “رمضان عجب ـ بخيت خميس ـ ومحمد الرشيد”، قرارا جاء منصفاً للهلال، حيث قضت بمعاقبة المريخ والإتحاد السوداني لكرة القدم، والثلاثي محور الجدل، وجاءت عقوبة المريح بالحرمان من التسجيلات لفترة واحدة، بجانب تحمل نفقات القضية مع الإتحاد العام، لصالح الهلال، في حين وجهت بتحويل اللاعبين الي لجنة الإنضباط، مع غرامة مالية تساوي قيمة العقودات التي وقعوا عليها لنادي الهلال سابقاً، كل هذه لأموال ستكون في خزينة الهلال بإعتباره الشاكي، الطرف الكسبان للقضية). علما ان ثلاثي المريخ معرض للإيقاف فترة اخرى بسبب كسر الثلاثي للإيقاف بمشاركتهم امام فريق سيمبا التنزاني.
• احلى ما في هذا القرار ان الهلال عمل (تمويه) برمضان عجب ومحمد الرشيد وبخيت خميس عشان يحصل على عمار طيفور.
• المقصود من العملية دي عمار طيفور.
• وسيف تيري.
• بعدين ذكروني اتكلم ليكم عن تعادل المريخ مع هلال بورتسودان.
• حرمان المريخ من التسجيلات الفترة القادمة يعني ان مجلس المريخ قدم للهلال اللاعب عمار طيفور في طبق من ذهب. كذلك يمكن ان يكون تيري في متناول يد الهلال في التسجيلات القادمة.
• ملعوبة صاح.
• ما عاوزين نتكلم في الموضوع دا.
• ولا عاوزين نجيب سيرة لي عمار طيفور.
• انا قاصد التاج يعقوب.
• ما قاصد عمار طيفور.
• دي غلطة مطبعية.
• تشابه اسماء.
• الانتصار الثاني للجنة تطبيع الهلال تمثل في التمسك بالمدير الفني للهلال البرتغالي جواو موتا الذي انصفته كرة القدم امس والهلال يقدم عرض مثالي ويخرج بنتيجة كبيرة امام فريق الشرطة القضارف.
• قلنا ان اهم ما يحتاجه الهلال هو الاستقرار والدعم والمساندة وليس تبديل المدير الفني والإطاحة بالجهاز الفني.
• العشوائية دي مفروض نكون انتهينا منها.
• اذا لم تتغير هذه العقلية التى لا ترى في الحلول غير الاطاحة بالمدير الفني فلن نحقق بطولة خارجية.
• دي عقلية قديمة… زمن شاي اللبن كان بيشربوه باللقيمات.
• ممكن الهلال يجيب غوارديولا …ويطالبوا برضو بالإطاحة به عند اول تعثر يتعرض له الفريق.
• ما عندهم (حل) ابعد من كدا.
• يوم امس كان يوم خالص للجنة تطبيع الهلال وهي تتمسك بالمدير الفني للهلال ليحقق الهلال ذلك الانتصار رغم اننا نعرف ونعلم ان الاصوات التى تطالب بالإطاحة بالمدير الفني للهلال خارجة من لجنة تطبيع الهلال نفسها، فهي من تسرب وتطلق تلك الحملة على المدير الفني.
• المهم ان صوت العقل في الهلال انتصر – والمهم كذلك ان الاصوات الفارغة يمكن ان تزعج ولكن لن تصنع الحدث.
• يمكن ان يتعرقل الهلال في المباريات القادمة ويمكن ان يخسر لا قدر الله – مهم في ذلك الحين ان ندعم الجهاز الفني وان ندعم اللاعبين ما نقعد نصفي حساباتنا بنتائج مباريات كرة القدم.
• حقيقة حدثت نقلة كبيرة في الهلال خلال الفترة الاخيرة – والنقلة التى نقصدها ليس في كرة القدم ولا في استاد الهلال وإنما في وعي الاصوات التى طالبت باستمرار جواو موتا والتمسك به في لجنة تطبيع الهلال.
• انتوا يا ناس الهلال عاوزين تشيلوا المدير الفني للهلال بتقييم كفاح وتصريحاته عن المدرب.
• كفاح ينتظر الموسم كله عشان يتعادل مع الهلال. يشيل ليه (نقطة) من الهلال وعاوز مجلس الهلال يشيل ليه المدرب.
• يا كفاح انت في النهاية بتلعب للبقاء في الدوري الممتاز ..عاوز تقيم المدير الفني للهلال!!
• المدير الفني للهلال هل يمكن ان يتم تقييمه بواسطة كفاح مدرب فريق توتي الذي هبط بفريق مريخ الفاشر في الموسم الماضي. ويمكن ان يهبط بتوتي هذا الموسم.
• أي مدرب يشيلو الاعلام او الجمهور حتى لو كان المدرب فاشل فان ذلك دلالة كافية لوضاعة الادارة.
• ما ح نتقدم خطوة لو كان بنفكر بهذه الصورة.
• مجالس الادارة عندما تستجيب للإعلام والجماهير يبقى علينا العوض ومننا العوض.
• عليكم الله ذكروني اتكلم ليكم عن تعادل المريخ امس امام هلال الساحل.
• اعلام المريخ ومواقعه حاولوا امس ان يقولوا ان القرار الذي اصدرته (كاس) في قضية ثلاثي المريخ لم ينصف الهلال ولم يتضرر منه المريخ.
• بالله.
• اول مرة اشوف لي ناس بعملوا الباسطة بالصلصة.
• انتوا القرار بتاع كاس ترجمتوه في (طاحونة)؟
• قرار ادان المريخ وأدان ثلاثي المريخ وأدان الاتحاد العام لكرة القدم السوداني ..عاوزين اكتر من كدا شنو؟
• قرار انصف الهلال واثبت جدوى الخطوات التى اتبعها الهلال في تلك القضية وهنا لا بد لنا ان نحفظ لنائب رئيس لجنة تطبيع الهلال الطاهر يونس بحقه ..فقد اصابنا الملل واليأس بسبب طول ألانتظار ، لكن مع ذلك ظل الطاهر يونس يلاحق القضية ويبشر بها حتى انصفت (كاس) الهلال اخيرا.
• الغريب المطرة صبت في (لوزن) ونقطت في (الخرطوم).
• نقطت.
• القرار طوالي انعكس اثره على المريخ امام هلال الساحل.
• عليكم الله ذكروني اتكلم ليكم عن تعادل المريخ وهلال الساحل امس في الخرطوم في الفقرات القادمة – هسع ما فاضي للكلام دا.
• خلوني مع الاداء الذي قدمه الهلال امس ومع العرض الرائع الذي ظهر به فريق الهلال امام فريق الشرطة القضارف.
• نحمدك يا رب.
• احفظها يا الله نعمة من الزوال.
• وابقى على هذه الفرحة على وجوه وقلوب كل الهلالاب.
• المحكمة الدولية الرياضية لو شافوا هدف فيري جيرالد في الشرطة القضارف كان اوققوا ثلاثي المريخ مدى الحياة.
• ناس المريخ بعد ذلك الهدف مفروض يشطبوا رمضان عجب ومحمد الرشيد وبخيت خميس والجاكومي.
• الجاكومي زي الهدف دا ما بفهمو لينا.
• بخيت خميس كان شطبوه او ما شطبوه نحن عندنا واحد.
• ولا فارقة معانا.
• اجاجون في الشوط الاول عمل لينا (فطير بي لبن) وجيرالد في الشوط التاني عمل لينا (قراصة بالسمن).
• بموت في الحاجات دي.
• حتى المحترف الكاميروني سالمون قدم مباراة كبيرة بعد الهجمة التى تعرض لها اللاعب من المريخاب وبعض الاهلة بعد مباراة القمة.
• خمسة ما كتيرة على الشرطة.
• لكن الشرطة تستاهل الخمسة …البمبان بتاعهم دا ما بمبان طبيعي.
• طبعا أي زول في الهلال يتعرض للهجوم من المريخ فذلك اكبر دليل لنجاحه.
• هاجموا سالمون.
• وهاجموا موتا.
• المشكلة بعض الاهلة جاروا المريخاب في هجومهم على الثنائي وحققوا لهم مآربهم.
• ذكروني بعدين اتكلم ليكم عن تعادل المريخ مع هلال الساحل.
• محمد عبدالرحمن في مباراة الامس اثبت فعلا ان الشرطة في خدمة الشعب …الغربال عمل ليه عملية في احد لاعبي فريق الشرطة القضارف لمن الارسال قطع.
• الله يسألني ناس قناة النيلين ما عرفوا يمشوا وين؟
• نحن الكهربة كانت عندنا قاطعة بعد المرور الذي قام به الغربال الكهربة جات.
• وملينا الباقات فرحة وسرور.
• نرجع لقرار محكمة كاس وتعليق الدكتور مدثر خيري الذي قال ان المحكمة لم تستجب للهلال الذي طالب بحرمان المريخ 6 فترات تسجيلات.
• انت يا مدثر خيري صدقت ان الهلال عاوز المحكمة تحقق له هذا الطلب …الزول وقت يشتكي ليه زول في قضية نشر او أي قضية تضرر منها بطلب بتعويض مالي خرافي ..ممكن يقول عاوز تعويض مثلا (10) مليار جنيه وفي النهاية المحكمة تحكم ليه بـ (10) الف جنيه ويعتبر نفسه منتصر بهذا الحكم.
• نوع الطلب دا تكتيك قانوني يا دكتور مدثر.
• الطلبات في التقاضي والمحاكم تكون على هذا النحو.
• كفاية علينا ان يحرم المريخ فترة تسجيلات واحدة.
• نحن قاصدنها كدا.
• عشان عمار طيفور يتلم على الغربال وابوعشرين ومحمد المنذر.
• كمان المنذر ما شاءالله عليه.
• موعد مع ارتكاز قاطع.
• وحسين النور ولا كلمة.
• وعثمان ميسي …بقى اخطر من ميسي ذاتو.
• اتكلم ليكم عن تعادل المريخ وهلال الساحل.
• المريخ خرج عن النص امام الهلال في الابيض …والجاكومي وكابو رفعو صوتهم اكتر من اللازم بعد المباراة.
• صدقوا نفسهم.
• الصدارة هلالية مع افضلية مباراة مؤجلة للهلال.
• نشكرك يا رب.
• المريخاب كملوا الفرحة في التعادل مع الهلال.
• اعتبروا هذا الامر انجاز لهم.
• عشان كدا اتوا وتعادلوا مع هلال الساحل.
• قلنا الانتصارات التى لا تبنى على علمية ولا تقوم على اسس صحيحة لا تصمد كثيرا.
• عاوزين تنتصروا بحلقوم الجاكومي وتصريحات هيثم كابو.
• الحاجات دي لو بتعمل فائدة ما كان المريخ جاء (طيش) المجموعة بعد اتفاقه مع الاهلي المصري.
• في النهاية لا يصح إلّا الصحيح.
• نحمدك يا رب.
• سعيد بهذا الانتصار الذي تحقق امس على الشرطة القضارف ..والعرض الذي قدمه الهلال.
• سعيد لأن كرة القدم انصفت موتا، ولأن المدير الفني للهلال كسب جولة.
• والمعركة لسه.
• الدرب طويل.
• والحفر مستمر.
• ابقوا سند للهلال.
• ما ترجعوا لينا ايام الكاردينال التى خسر فيها الهلال ثلاث بطولات لدوري الممتاز بسبب الاطاحة بالأجهزة الفنية.
• عاوزين ترجعوا لينا ايام الكاردينال تاني.
• يبقى الفرق شنو بين الكاردينال والسوباط.
• المدرب يشيلوه من العتبة الثانية في سلم الطائرة ايام الكاردينال.
• العلمية والمنهجية والانتصارات والبطولات لا تتحقق إلّا بالاستقرار الفني.
• أي زول بقول ليكم غير ذلك ما عاوز مصلحة الهلال ، وما عندو علاقة بالكورة.
• لكن صبت برة.
• ونقطت جوة.
• يوم امس كان يوم سعيد للهلال.
• الله يديم الافراح على الهلال ويبقى على السعادة الزرقاء بشكل مستمر.
• ………………
متاريس
• حسين النور يمكن ان يصبح لاعب الوسط الافضل في البلاد.
• محمد المنذر مكسب كبير للهلال.
• الهلال كان يعاني في الارتكاز.
• اعتقد ان هذا الثنائي مع صلاح عادل وعودة بوجبا الى مستواه يمكن ان يحلوا ازمة الهلال بشكل نهائي.
• الغربال لعب بي مزاج ..تقول كان بيلعب في قاعة الصداقة.
• جيرالد ….رجع لينا (السكر) لمباريات كرة القدم.
• السكر شالوه من (التموين) وجابوه لمباريات الهلال.
• اجاجون ..اختصاصي التمرير الرائع.
• عبدالرؤوف مكانه اساسي في تشكيلة الهلال.
• عثمان ميسي تاني مفروض ما ينقطع من تشكيلة الهلال.
• ياسر مويس ..الممول الاول لأهداف الهلال.
• ارنق رجع.
• ولسه.
• الدرب طويل.
• ابقوا عشرة على الهلال.
• …..
• ترس اخير : بكرة يوم جديد.