تفرغ زينة عملها فينا ..!
هلال وظلال
عبد المنعم هلال
تفرغ زينة عملها فينا ..!
ـ المريخ بادر بتهنئة نواذيبو ببطولة الدوري الموريتاني نكاية في الهلال وقبل أن يفش الغبينة نال الضربة المميتة من تفرغ زينة ..!
ـ جاءت خاتمة المريخ صادمة ومؤلمة بعد أن خسر من تفرغ زينة برباعية نظيفة خسارة كشفت الحال وعرت الواقع الفني للفريق المنهار وورتهم النجوم في عز النهار.
ـ القصة ما بس في الهزيمة القصة في الطريقة البخسر بيها المريخ فالفريق ظهر مفكك وتايه لا انسجام ولا تركيز والدفاع مفتوح زي بوابة عبد القيوم أي كورة كانت هدف محتمل والفريق كله واقف يتفرج وتفرغ زينة بيتفرعن ويباصي ويخترق براحتو ويرقص على أنغام إنتي كلك زينة..!
ـ المنافسات الأفريقية على الأبواب فلو المريخ خسر بالأربعة قدام تفرغ زينة راح يعمل شنو قدام الجماعة بتاعين فرق شمال أفريقيا ولا فرق غرب القارة اللي بيلعبوا ضغط وسرعة وتكتيك عالي والأربعة هينات الخوف من سبعات الوحدات ..؟!!
ـ المشكلة ما بس في اللاعبين رغم ان بعضهم ما قدم أي شيء يذكر لكن المشكلة الأكبر في الجهاز الفني وعدم الاستقرار (من وقت قريب ولحدي ما جا غريب) الحال ياهو نفس الحال تغيير في التشكيلة وتبديلات ما مفهومة وجوقة محترفين ساكت لافين وما في شكل ثابت للفريق وكل مباراة بتبدأ من الصفر وأمير كمال متحكر.
ـ حراس المريخ بما فيهم الحارس التونسي (مش هو تونسي ولا أنا نسيت) كلهم مشهورين بالكرم وأكرم من أكرم.
ـ المريخ لسه بيفتش في نفسو وفي تشكيلتو وفي هويتو وكلما يعمل لإصلاح العيوب يكتشف عيوب جديدة ..!
ـ جماهير المريخ كاتمة الغبن ورغم إنو قلبها كبير لكن صبرها قرب ينفد الخسارة الكبيرة دي جات في توقيت حساس قبل أيام قليلة من بداية دوري النخبة وغمار المنافسات الأفريقية والناس بتسأل .. هل المريخ جاهز ولا لا ..؟ هل في خطة واضحة ولا ماشي بالبركة ..؟ هل سوف يستمر النمير ولا يطير ..؟ وهل تنتهي أيام (غريب) قريب ولا راح يمشي و(يسيب) ..؟
ـ الصراحة شكل شقيقنا الصغير دا بخوف ولو ما في مراجعة عاجلة وجدية الأخ الأحمر الوهاج ممكن يودع من الباب الضيق ويكرر سيناريوهات الخروج المبكر المؤلم ويطلع من كل البطولات يا مولاي كما خلقتني.
ـ تفرغ زينة فرغ كل شي من المريخ في التسعين دقيقة فرغ الهيبة ..فرغ الثقة وفرغ التوقعات.
ـ الخسارة ما عيب لكن تكرار الأخطاء والظهور الباهت في كل مباراة بقى شيء مقلق وعلى الإدارة والجهاز الفني يشتغلوا بسرعة لأنو الزمن داهم والمنافسات ما بترحم.
ـ عافيتكم تهمنا يا الساكنين جنبنا..
ـ عووووك الحقوا المريخ …!
ـ برضكم حبايبنا وبندور مصلحتكم ..!
ـ وبنردد معاكم (نهواهو في كل الظروف.)
