تقيل وطموحو عالي !!

قزاز ورذاذ

محمد الطيب الأمين

تقيل وطموحو عالي !!

* تِحت تِحت قالوا (الرغيف) ح يكون بالكيلو.
* واحتمال كبير يعملوا (اللبن) بالمتر ، و(الهواء) بالوقية .
* اخشى أن يصبح الإشتراك في قناة (بن سبورت) باللقطة.
* كل ما تشوف (لقطة) تدفع أكتر.
* لو كملت المباراة تطلع مديون.
* صراحة الإشتراك في القناة أصبح غالي جداً بعد إرتفاع سعر الدولار .
* سببين اتنين رفعوا سعر الإشتراك في القناة .
* إرتفاع سعر الدولار وتأهل المريخ .
* والله صحي .
* المريخاب طبعاً وبما أنهم مخلوعين بالمجموعات عملوا زحمة في مكاتب القناة .
* سنين ما اشتروا كروت القناة والسنة دي رفعوا لينا سعر الإشتراك.
* ده كان يوم أسود الإتأهلتوا فيهو ده .
* يوم تأهلكم كان أسود من اليوم المات فيهو محمود عبد العزيز.
* وغايتو جنس غايتو .
* العاجبني في سعادة المستشار تركي آل الشيخ إنو زول تقيل .
* تقيل وطموحو عالي .
* تكفل بالاضاءة الجديدة ووقع مع السنغالي العالمي .
* وشغال مع أتنين تاني .
* كما أنه قطع شوط فيما يتعلق باللبس الجديد للفريق .
* أنا والله اتمنى من سعادة المستشار أن يتكفل بنجيلة إستاد المريخ فذلك سيكون من مصلحة الهلال .
* عشان نحن نرتاح إلا نجيلتهم تقوم.
* طول ما نجيلة إستاد المريخ عاملة زي (وش البت الما نفع معاها الكريم) نحن ما ح نرتاح .
* نتمنى من السوباط أن يتكفل بنجيلة إستاد المريخ وهو (إستاد حكومي) طبعاً .
* وبالمناسبة .. مساهمة الرئيس المخلوع عمر البشير في الجوهرة الزرقاء كانت (رقصة بس) .
* جا رقص ومشى .
* اما مساهمة البشير في إستاد المريخ فقد كانت (إستاد عديل) .
* وتعال أناقشك.
* الكاردينال رفض يشيل من الحكومة قروش .
* وجمال الوالي رفض يشيل قروش من زول غير الحكومة.
* حكومة الإنقاذ (كتلت) مشروع الجزيرة عشان تشيد إستاد المريخ .
* عشان كده نحن وأولاد حلتنا بنقول إنو (إستاد المريخ وسد مروي اخوان في الرضاعة) .
* حاجة تكسف .
* جميل أن يقيم الهلال معسكر تحضيري في دولة تنزانيا.
* المعسكر من شأنه أن يجعل الهلال في وضع أكثر من ممتاز برغم أن النجوم الدوليين سيكونوا برفقة المنتخب.
* هي فرصة كبيرة للعناصر التي لم تشارك خلال الفترة الماضية حتى تقدم الأفضل من خلال هذا المعسكر .
* صراحة لجنة التطبيع تقوم بعمل كبير جداً تجاه الفريق .
* نتحفظ في المشاركة التى وافق عليها الجهاز الفني في الدورة الثلاثية لنادي سيمبا التنزاني .
* الدورة يشارك فيها مازيمبي وهو معنا في مجموعة واحدة .
* الهلال السنة دي هو (كتاب مقفول) بالنسبة لكل أفريقيا فيجب أن لا نتيح لمازيمبي فرصة مطالعة الكتاب الأزرق من خلال هذه الدورة .
* يمكن أن نلعب أمام سيمبا مباراتين من خلال هذا المعسكر دون المشاركة في الدورة.
* سيمبا يبحث عن مصلحته ولذلك هو لم يختار فريقاً من مجموعته للمشاركة في هذه الدورة .
* ونحن برضو دايرين مصلحتنا.
* وعلى فكرة .
* دورة سيمبا هذه تشبه دورة مانديلا التي شارك فيها المريخ وجاب كأسها سنة (٨٩) .
* كانت دورة وشالوا كأسها.
* واوع تجي تقول لي لوح الشرف والكاف والكلام الما جايب حقو ده .
* دورة مانديلا انت لعبت النهائي مع الترجي التونسي ؟ قال لا .
* لعبت النهائي مع الأهلي المصري ؟ قال لا .
* لعبت مع الزمالك؟ قال لا .
* مع الوداد ؟ قال لا .
* قوم على حيلك .
* دي دورة ليس إلا.
* أنت سميها بطولة ونحن عارفنها دورة .
* لن أتحدث عن تعادل (الإصيفر) مع توتي لأن النتيجة عادية .
* ولسه المريخ ما شاف حاجة .
* المريخ عمل ليهو إعداد ١٤ يوم في دار الرياضة وداير يجي يتفاصح .
* كل النتائج الإيجابية التي حققها (الإصيفر) خلال الفترة الأخيرة كانت بدافع الحماس .
* والحماس ما بلعب معاك السنة كلها.
* أراهن أن المريخ تنتظره خسارة سيتحدث عنها كل السودان .
* متين ووين ؟ ننتظر ونشوف .
* المهم .
* الحمد لله (دشنت قناتي على اليوتيوب وقد أخترت لها إسم دقايق) والرابط منشور بصفحتي الشخصية على الفيسبوك .
* سأقدم من خلال قناة (دقايق) برنامج اسبوعي كل خميس يحمل نفس إسم القناة .
* اتمنى التوفيق من عند الله ومؤكد أنني أنتظر دعم الجمهور العظيم وكلنا مع بعض ح نقدم حاجة مرضية إن شاء الله .
* دقايق .. وراء كل دقيقة حقيقة .
* ونركب صافنات ونجيبة (شايقية) واصلو الزول بيموت والذكرى تفضل حية .
* و..و..
* والوردة لو خانها الفراش ما اظنو تلومو مع ……. (الرغيف الوسخان ده) .