تُشَـاهِـد غَـدَاً (أيِّ دَمعَة حُـزن لا لا)
صَـابِنَّهَـا
محمد عبد الماجد
تُشَـاهِـد غَـدَاً (أيِّ دَمعَة حُـزن لا لا)
الدنيا دي فيها حاجات غريبة، طول عمري، من يوم ما قُمت بسمع إنه القميص بيصغر عليك.. عادي تقوم يوم الصباح تلقى قميصك صغر عليك.. ولامن يكون عندك أخ أصغر منك، أو قريبك أصغر منك في السن، بتقول ليه شيل القميص دا، عشان صغر عليك. ونحن ذاتو كنا بنلبس قمصان ناس بتصغر عليهم، هكذا كانت دورة القمصان في الحياة.. عادي لامن تنفخ روحك تلبس قميص أبوك.. وعادي تحصل بينك وبين أخوك الكبير مشاكل حول (قمصانه)، وبينك وبين أخوك الأصغر منك مشاكل حول (قمصانك)، كل ذلك يحدث في السودان والدول المجاورة.
نحنُ حسب قلة عقلنا كنا فاكرين أنّ القمصان هي البتصغر وليس نحنُ من يكبر ـ غايتو الإنسان دا أصلو ما بدور الكُـبر، يقول ليك القميص صغر عليّ ما بقول ليك أنا كِبرت عليه.
الواحد يدخل الجامعة ويعرس ويعمل المشكلة في (القميص).
هسع في الحرب دي الحكاية اتعكست، القميص بقى يكبر عليك.
عندي أربعة قمصان لامن أخش فيهم بقيت زي كأني دخلت في كيس مرتبة الدبل.
أخوجل في القميص زي الحواشة.
القميص في الحرب دي بقى متل الجلابية.
التضخم الاقتصادي بقى ينعكس على قميصك، يقوم فجأة كدا يتضخم.
زمان بسمع في النشرات الاقتصادية عن التضخم الاقتصادي، وكنت فاكر موضوع التضخم دا بعيد مننا، لامن ظهر لينا في قمصانا.
عندي حزام، بقيت كل يوم أقوم الصباح وأسخن المسمار عشان أخرم الحزام خرم جديد، عشان بقى كبير.
شوف لو الموضوع دا حصل عليك، يبقى راجع نفسك، في تدهور صحي حاصل.
أغرب من ذلك عندي جوارب، بقيت أدخِّل كرعيني الاتنين في فردة (شراب) واحد وامشي عادي.. عليكم الله الفاضي يلبس ليه جوز جوارب منو في الحرب دي؟
كرعيني الجوز بدخلن في فردة واحدة.
عندنا قريبنا كل سنة ممتحن، قلت المرة دي اجتهد معاه شوية وأشجِّعه، انتظرته قدام المدرسة، أول ما طلع قلت ليه: أها جابوا ليكم شنو في الجغرافيا؟
قال لي جابوا لينا بامية مفروكة طاعمة.
قلت ليه يا زول أنا بسألك عن الامتحان.
قال لي نحن في الحرب دي الامتحان من السماية بقينا ما قادرين نفرز.
كنت بمشي الفرن بمد ليه ألف جنيه بيديني 12 رغيفة.
بقيت أمشي أمد ليه ألف جنيه بيديني 10 رغيفات.
استمر الموضوع على هذا الوضع فترة.
بقيت أمد ليه ألف جنيه يديني 8 رغيفات.
ثم.. بقيت أمد ليه ألف جنيه ويديني 7 رغيفات.
وكل مرة العيشة ماشة تصغر.
مديت ليه ألف جنيه أداني 5 رغيفات.
ولا قاعد اتكلم.
نحن لو اتكلمنا بقولوا علينا نحن الصحفيين بتاعين تنظير، عشان كدا خشمنا بقى عندنا.
نقول شنو؟ البلد كلها بقت مليشيات، بتاع الفرن بقى بي بندقيته.. تتكلم يطلع ليك مليشيات من تحت البنك.
البنك دا تربيزة كبيرة بقيف قدامها بتاع الدكان.
مديت ليه ألف جنيه أداني ثلاث رغيفات.
آخر مرة مشيت الفرن مديت ليه ألف جنيه أداني كيس فاضي.
سكت.. عاد أقول شنو؟ نحن الصحفيين لو اتكلمنا بقولوا علينا قاعدين ننظر كتير.
شلت الكيس ومشيت البيت، قلت الليلة نعمل سليقة (أكياس).. قالوا طاعمة زي البامية المفروكة.
ما عارف الليلة ليه معلق في البامية المفروكة؟
مرة كنا بنلعب كوتشينة، الورق سمح، من التوزيعة عامل 75، قلت خليها تلف.
لفت، الورق قفل.
اللعب في بداياته، قلت أعمل فيها حريف أقفل على كرت صغير.. قفلت على (دو) وعملت رايح.
الزول القاعد شمالي، الظاهر عليه عرف قفلتي، بقى يرمي لي في ورق كبير.
تسعة هارتي.
سبعة طويلة.
شايب حركات مسلحة.
ولد ناشط سياسي.
بنت منظمات طوعية.
خمسة ـ لجان مقاومة.
أي كرت رماهو ما عمل حاجة.
في واحد قاعد برّه قال لي إنت قافل على شنو؟ إنت قافل على وزارة المالية؟
في واحد تاني مع آخر كرت في الصندوق والكوتشينة بتدك، قال لي: البلد دي لو قافل على (دو) لو ما عملت ليك مليشيات ما بدوك ليه.
الكوتشينة ادّكت، وشكلهُ كدا كامل إدريس ح يدكها ويوزع من جديد.
خلوه الحريق.. لو بنلعب (وست) بحصل شنو؟
أول حاجة ناس المشتركة قالوا القبول حقهم.. قالوا ما بدوا قبولهم.. قبول يجيبوه بالبندقية دا ما سمعنا بيهو إلا في السودان.
التوزيعة عند كامل إدريس لكن الورق عند البرهان.
الكيزان عاوزين يسموا تسمية كبيرة، وهم ما عندهم ورق، خايفين من (السيك).
ناس صمود عاوزين يحتوا اللاتو.
الشعب السوداني عارف إنها قدر ما تلف وتدور ح تجيهو راجعة تاني.
اللعب عند الشعب.
ألعبوا!!
عندنا زول وقت تأخِّــر اللعب وما تفك البايظ بقول ليك أنهر.
بعد كدا ندخل ليكم على أصحاب المركز السادس ـ فارق 23 نقطة.
قبل أي منافسة، أو في بداية كل المواسم، في مرحلة الإعداد تحديداً ومرحلة المعسكرات والصور والسيلفي في المطارات، إعلام المريخ أفضل من يتحدث عن الجاهزية وعن استعداد الفريق، ولاعبو المريخ أفضل من يتصوروا صور السيلفي، مرات أنا بصدقهم وأقول الله يستر. تنتهي المنافسة، تكتشف أن الموضوع كله كان عبارة عن الكاميرا الخفية.
شوفوا ما في فريق بحقق ليه بطولة بسيلفي المحترفين في المطار.
قبل بداية هذا الموسم، سبق المريخ فريق الهلال وهو يخاطب الاتحاد الموريتاني للمشاركة في الدوري الموريتاني، وكان المريخ قد أنجز تسجيلات (خيالية)، وأبرم صفقات (خرافية) حسب كلامهم، حتى الوطنيين وصفوهم بالموهبة وأنهم سوف يكسروا الدنيا.. وقالوا إنّ المريخ لقط كل المواهب الموجودة في البلد ولم يترك للهلال موهبة واحدة.
المريخ أنجز قبل بداية الموسم أكثر من 5 أو 6 معسكرات خارجية ـ عسكروا في مصر وفي تنزانيا وعسكروا في جنوب السودان وفي ليبيا، وعسكروا في موريتانيا، وما عارف إثيوبيا عسكروا فيها أم يُخيّل لي ـ اتذكرت وشاركوا في دورة ودية في نيجيريا.
وقبل ذلك عشان ما في زول يكشفهم انسحبوا من أمام الهلال مرتين، مرة في السوبر السوداني وأخرى في بطولة سيكافا.
لكن بعد التعب دا طلعوا من التمهيدي في البطولة الأفريقية، قلنا ما مشكلة من خلى عادته قلّت سعادته.
شاركوا في الدوري الموريتاني ونزلوا التسجيلات التكميلية بقوة أكبر، وأعلنوا أنّ الفريق أصبح قوة رهيبة، وأنّ المريخ تاني ما في فريق بقيف قدامه ـ لمن نحن صدقنا واتضايقنا. وهاجمنا مجلس الهلال على عدم التعاقد مع مهاجم سوبر، ما خلينا ليهم صفحة يتقلبوا عليها.
وكان المريخ قد تعاقد في هذا الموسم مع أربعة أجهزة فنية، منهم ثلاثة أجهزة كان طاقمهم أجنبي.. بقيادة إيطالي مرة، ومرة بقيادة صربي والآن المريخ بقيادة مصري مع مدير رياضي مصري متفرغ منذ بداية الموسم.
رئيس المريخ كان قد كتب في صفحته على مواقع التواصل الاجتماعي (بل بس)، ووعد المريخاب بمريخ يهز الأرض طولاً وعرضاً.
تتخيّلوا بعد الكلام دا حصل شنو؟
بعد كل هذا الكلام ومع أنّ المريخ رئيسه (النمير) ومهاجمه (أسد)، ولاعبه السابق صلاح (نمر)، وطرفه الشمال (طبنجة)، ومدافعه (مكين)، ولاعبهم تحت السن (عنتر) وعندهم برّه (مرفعين)، مع كل هذه القوات، جاء المريخ في الدوري الموريتاني في المركز السادس.
بعد كل هذه الأسماء، طلع الفرق بين الهلال والمريخ في الدوري الموريتاني (23) نقطة.
وبعد أن كان رئيس المريخ يرفع شعار (بل بس)، طلع وقال المريخ ما عنده صف أول.
رئيس المريخ قال كدا، نحن نقول شنو؟
هسه نسوا الكلام دا، نسوا فارق الـ23 نقطة والمركز السادس في الدوري الموريتاني وطلعوا تاني يتفاصحوا.
بعملوا في نفس الشئ وبرفعوا في نفس الشعارات.
تاني رجعوا لصور السيلفي في المطارات.
مفتكرين المريخ قادر على تحقيق البطولة بالسيلفي.
ناس (أي دمعة حزن لا لا)، قالوا عاوزين يشيلوا النخبة، قاموا تاني للنفخ، ونحن مُتعوِّدين على الحكاية دي وعارفين النهاية سوف تكون كيف؟
شوفوا من هسع بقدم ليكم (تشاهد غداً) أي دمعة حزن لا لا.
تشاهد غداً دي نحن كنا زمان بننتظرها بفارغ الصبر، عشان نعرف برامج بكرة في التلفزيون شنو؟
الوقت داك كان مافي موضوع، لا في فيس ولا في واتس ولا نت، قمة رفاهيتنا كانت (تشاهد غداً).
برشلونة وريال مدريد كنا بنسمع بيهم طشاش وهلال مريخ بننتظرها من السنة للسنة.
هسه بقول ليكم وأكون صريح معاك وواضح يا ناس المريخ أعصروا على (أي دمعة حزن لا لا).. ما عندكم مخرج غير عبد الحليم حافظ.. وأصلاً مدرب المريخ مصري والمدير الرياضي مصري يعني ما ح تكون عندكم مشكلة في (أي دمعة حزن لا لا)، وأصلاً هي ما غريبة عليكم.
دوري النخبة سوف يثبت ذلك وسوف نسمع بعده عن انتقادات للاعبين، وعن الإطاحة بالمدير الفني للمريخ.
وح يرجعوا يعملوا نفس الشئ وينفخوا تاني في التسجيلات ويتحدثوا عن الصور والمحترفين وسيلفي المطار.
قالوا في المريخ مواهب شابّة.. لكن المريخ لغاية الآن بيلعب بأمير كمال ورمضان عجب والسماني الصاوي.
واحتمال ناس الصف الأول للمريخ يرجعوا في التسجيلات القادمة، صلاح نمر وحمزة داؤود والتش وعمار طيفور وأحمد بيبو.
شكلها كدا.
وأي دمعة حزن لا لا.
نقّطت.
…
متاريس
الهلال أول فريق في الدنيا يدخل للبطولة المحلية الأولى بدون جهاز فني وبدون محترفين وبدون مجلس إدارة.
يقولوا ليكم الكلام ألف مرة.
بس عشان الناس تكون عارفة.
دوّروا في فلوران انتقادات وهجوم.. فلوران رحل.. من هو البديل؟!
إذا مجلس الإدارة قال للمحترفين على كيفكم وخيّرهم في الحضور أو عدمه، يبقى خادم دياو من حقّـه يلبس شعار فريق آخر وهو على ذمة الهلال!!
عندي إحساس جان كلود ح يجي يلعب الشوط التاني في مباراة الهلال والمريخ ويرجع.
شوط واحد كفاية.
طبنجة الأيامات دي مركز في مطار بورتسودان أكتر من تركيزه على التمارين والطرف الشمال.
متوقع في أيِّ لحظة يظهر (بعاتي) في بورتسودان.
أعملوا حسابكم.
غايتو عندي بعاتي كدا اسمو (إيمي) لو ظهر في بورتسودان، ناس المريخ أحسن يتخارجوا من بدري من الدامر.
إيمي وجان لو ظهروا في بورتسودان، لا طبنجة.. لا كابو ولا معاوية الجاك بقعدوا ليكم.
ما تسمعوا الفصاحة دي.
الناس ديل خايفين من (جان) أكتر من خوفهم من المُسيّرات.
المجاذيب ديل عندهم الخير والبركة.
وبركاتكم يا مجاذيب، في موسم واحد تأهل السهم الدامر للممتاز، والممتاز ذاته سوف يلعب في الدامر.
سوبر النار في الدامر وعطبرة.
القمة في الدامر.
مبروك للسهم الدامر الممتاز وهو اضافة حقيقية للدوري الممتاز.
مبروك لكفاح صالح ، مدرب يعرف كيف يصنع التأهل.. مدرب يعرف كيف يصل للممتاز.. والتأهل صنعة.
التسجيلات باقي ليها 39 يوماً.
ولسه ما في جديد.
بنسمع عن الراحلين، ما قاعدين نسمع عن القادمين.
الحاصل شنو؟
العليقي عرفناه مختفي، أين الفاضل التوم؟
الموضوع دا برضو فيه خيارات زي الخيارات التي منحها المجلس للمحترفين.
غايتو إذا فشل المجلس في إحضار المحترفين يبقوا فشلوا فشلاً ذريعاً.
دوري النخبة تبقت لانطلاقته 72 ساعة.
الجمعة الهلال والميرغني كسلا عصراً.
الميرغني بداية موفقة للهلال إن شاء الله.
الهلال سوف يلعب 7 مباريات بـ21 نقطة إن شاء الله.
تتخيّل فارق النقاط بين الهلال والمريخ في موريتانيا كان 23 نقطة، بينما مجموع كل نقاط السوبر 21 نقطة.
الهلال عظمة.
عظمة والله.
في الأخيرة دي قاصد الهلال السعودي ـ بس عشان تكونوا عارفين.
أهو كله هلال.
…
ترس أخير: الأهلي مـدني احتمَـال كبير يكُـون وصيف الهِـلال في دوري النخبة.. عندي إحسـاس تنقِّط من قُـولَـة تيـت.