جدودنا زمان

في السلك

بابكر سلك

جدودنا زمان

*وصونا علي الوطن
*على التراب الغالي الماليهو تمن
*جدودنا زمان جدودنا زماااااان
*تلك كانت وصية جدودنا لينا
*فهل كنا حافظين للوصية بعد حققنا استقلالنا ؟؟؟
*العين لا تحجبها غشاوة عن واقع اهمالنا للوطن وتفريطنا في الوصية
*ولنا أن نعود بذاكرة التاريخ لذاكرة التاريخ
*التسعينات أفضل من الألفينات
*والتمنينات أفضل من التسعينات
*وسنة سبعين كنا أفضل من سنة تمنين
*وسنة ستين قمة الحضارة والجمال أفضل من سنة سبعين
*والخمسينات زمن الخواجات وما ادراك ما الخواجات
*فهل بعد هذه المقارنة نحن حافظين للوصية ؟؟؟؟
*الإنقاذ اتجدعت فينا أيام انقلابها جديد
*وصرحت وقتها أنها لو لم تجينا
*الدولار كان حصل عشرين جنيه فينا
*لاحظ عشرين جنيه الزمن داك تساوي عشرين قرش بحسابات اليوم
*الإنقاذ جات لقت عندنا سودانير وسكك حديد السودان وخطوط بحرية ومشروع جزيرة وقطن طويل تيلة وآخر قصير تيلة وشركة صمغ عربي وشركة أقطان وتصدير
*قلعناها منها لا سودانير لا لبن الطير ولا سكة حديد لا سكة سفر لا مشروع جزيرة
*وافتقدتنا مصانع يورك شير ولانك شير
*وشفنا صمغنا العربي في عبوات إنتاج الإمارات
*وكان غابات الطلح تسور أبوظبي وغابات الهشاب تفصل بين دبي والشارقة
*حتى دهبنا بقى ضهبنا
*وخطوطنا البحرية أضحت نسيا منسيا
*والحلو مر شفناهو في القنوات كعصير محلي لأهل أسوان
*تم كل ذلك بأيد سودانية
*فهل كنا حافظين للوصية ؟؟؟
*في زمن نميري كان محو الأمية والتعليم الأساسي مطوق بالإلزامية
*ولما تلقى محو أمية وإلزامية بتعرف طوالي إنو للتعليم مجانية
*جاءت الديمقراطية بعد انتفاضة أبريل 85 وجهلونا وعملوا على تجهيلنا
*واستمر التدهور في التعليم إلى أن طال التعليم العالي
*شهادات فوق الجامعية لجهلة
*وزير تربية وتعليم قادي إنجليزي يا مرسي
*وانتشرت المدارس الخاصة فينا والتعليم الحكومي يئن إهمالا مقصودا ومخططا له
*وبقت البدع
*النسوة يفخرن بانتماء أبنائهن لمدرسة كذا
*وبندفع بالدولار مصاريف وبالمليار إذا كان السداد بالسوداني غير رسوم التسجيل
*وسنويا في رسوم تسجيل
*يعني عشان تقرأ الأساس تدفع رسوم تسجيل تمنية مرات
*وتفخر النسوة
*ويفخر أبان شنبة
*فمعظم شنبة هذا الزمان للزينة
*أيوه في شنب زينة
*أسي مش في كلب زينة ؟
*المهم
*يتدهور التعليم
*ويتجهل الإنسان ويتجوهل
*وهو أهم عناصر الإنتاج
*وبعد ده دايرين الدولار ينزل
*أيها الناس
*خلونا من النظرة الحزبية والنعرة القبلية وتعالوا نعترف
*مافي كارثة حلت بالسودان إلا وكان خلفها سوداني برغم وصية جدودنا زمان
*أيها الناس
*نحتفل بالاستقلال سنويا
*ونحن نمضي للهاوية سنويا
*ما كان في احتفال بالاستقلال مخصص كيوم للإنتاج مجاني
*ما كانت في وقفة مع النفس لمراجعة الموقف
*ويمضي فينا قانون بيت أبوك كان خرب جر ليك عود
*ويا حليل أبونا السودان
*والتحية للذين لم يجروا بعد عود
*لأنهم ما دايرين بيت أبوهم يخرب
*خلونا حافظين للوصية
*فأعظم انجازاتنا كان الاستقلال
*وما جبناهو بحرب وتمرد
*ولكنه كان بالحجة والمنطق والفهم
*وكلنا يذكر الزعيم الراحل الأزهري حينما جلس علي كرسي ملكة بريطانيا (قاصد)
*ولما غضب الخواجات قال ليهم
*قعدت دقائق علي كرسي ملكتكم زعلتوا
*طيب أنا أعمل شنو وانتوا قاعدين على وطني أكتر من خمسين سنة
*أيها الناس
*كل سنة والوطن بخير
*وربنا يخلص السودان والسودانيين المتأثرين بالكوارث من السودانيين اسباب الكوارث
*أيها الناس
*إن تنصروا الله ينصركم
*أها
*نجي لي شمارات والي الخرتوم
*والينا
*المدارس السنة دي احتسبوها وما تلعبوا بينا
*ولا تلعبوا علينا

سلك كهربا

ننساك كيف والكلب قال إنتوا ما بتعرفوا حسن إدارة الزمن والناس أسي وصلت لفنون إدارة الزمن
وإلى لقاء