جريمة بيع كأس الذهب
اصل الحكاية
حسن فاروق
* مفروض نقول شنو لما نكتشف انه قبل ستة سنة تقريبا جمال الوالي باع بقرار مجلس ولا بمزاجه جزء من ممتلكات النادي بدون ما اي زول يعرف.. نقول شنو لما نعرف باع كأس الدهب .. نقول جمال الوالي رئيس طوالي ولانقول المريخ اصلا مريخ الوالي .. ولا نقول هوي اقيفو يعيد وماتعملوا اي حاجة ..
* نقول قولو للوالي شكرا ياريس فداك مليون كأس دهب ويعني شنو كان بعتو انت الدفعتو شوية ولاشوية .. نقول هسي هو يجيب كم والوالي دفع كم .. الوالي دفع كم يعني شنو كاس .. وقول دساهو مننا وماكلمنا .. يعني هو ومتين اصلا بكلمنا نحن النادي ده كاتبنوا ليهو بيع وشراء … النادي ناديهو وحرالبعملو فيهو دي غنيتنا ليهو .
* وانت الدهب وكلامك دهب نعمل بيهو شنو كأس الدهب .. وبنقولها ليك ولايهمك ياوالي ولاتزعل اعتبرنا ماسمعنا كلام بيع الكاس ده .. وناكد ليك مسحناهو باستيكة من روسينا.
* كأس الذهب بس .. بيع الاستاد ذاتو والنادي بيع الفريق كلو .. غير اسمو سميهو فريق جمال الوالي بدل المريخ ما عندنا اي مشكلة قبلانين راضين شاكرين وحامدين ..
* يعني هسي ناس المجلس الجديد المفلسين ديل وعاملين فيها غنيانين قايلين جنس كلامهم ده بهز ثقتنا فيك .. لو غلبتهم وقالوا الروب .. استقيلوا لا انتو اول ولا انتو اخر ناس يغلبهم إدارة النادي وغيركم كان اشطر اسألوا اسامة ونسي وعصام الحاج بوركم انه الجمرة دي مابمسكها غير راجل واحد اسمه جمال الوالي .. جابت ليها كمان .. باع كاس الدهب .. نقول سرقو ما باعو .. اها باعو عايزين تعملوا شنو .. افتحوا بلاغ افتحوا تحقيق ..
* قول مجلس الادارة الفي عهدو اتباع الكاس ذاتو ماعارف لا اجتمع لا قرر ، لا اتكتب في محضر .. والعارفين جمال وواحد اتنين تلاتة .. ومن ومتين جمال بياخد قراراتو في اجتماعات مجالس ادارات ولا لجان تسيير ..متين قول لي بس .. نحن بنجيب جمال رئيس في كل مجالس الادارات ولجان التسيير والبقية مامهمين .. سموهم تمومة جرتق .. سموهم كمبارس .. هم راضين ونحن راضين وعارفين .. عشان ماتقولو لينا قرار البيع قانوني ولا ماقانوني.
* لا وواحد يقول ليك مفروض يكون قرار جمعية عمومية ماقرار مجلس ادارة ..ليه.. يقول ليك لانها أصول وممتلكات لاتملك الادارة التنفيذية المنتخبة من الجمعية العمومية حق التصرف فيها بدون ما ترجع الجمعية العمومية .. الغريبة الواحد يكون جادي لما يقول الكلام ده ..
* ده تاريخ وعمر 14سنة والنادي ماشي بالطريقة .. لافي زول فتح خشمو لاقال بغم .. تجو هسي عشان كاس تمنو اقل من القروش السجلو بيها الحضري ..عايزين تنصبو المشانق لوالينا الغالي .. امشي يازول طلقانة بالتلاتة .. لو زول فتح خشمو وجاب سيرة الموضوع ده .. بيع يا زول يعني شنو كاس دهب .. انت الدفعتو شوية
حمل تطبيق كورة سودانية لتصفح أسرع وأسهل
لزوارنا من السودان متجر موبايل1
http://www.1mobile.com/net.koorasudan.app-2451076.html
3,699 حملو التطبيق
لزوارنا من جميع انحاء العالم من متجر قوقل
https://play.google.com/store/apps/details…
13230 حملو التطبيق
على متجر mobogenie
http://www.mobogenie.com/download-net.koorasudan.app-357365…
5000+ حملوا التطبيق
