جزولي زولي وحبة بندولي

في السلك

بابكر سلك

جزولي زولي وحبة بندولي

*بح صوتنا ونحن ننادي بضرورة الاعتماد على المواهب الشابة
*كنا نعتمد على الجاهز
*حتي ولو كان الجاهز قد ناهز عمر النبوة
*المهم الشوفونية
*وحتى النشء كان يغادر لإكتمال السن وعدم وجود خانة للتصعيد
*لأنو أساسا لم نشركه كي نعرف مقدراته
*ها هو شداد بقراره الأخير يلزم الأندية على إشراك اتنين من الشباب ديل
*وها هم الشباب ديل يدهشون الناس مع أول ظهور
*في كل أندية الممتاز مش في المريخ وبس
*وها هي أولى خطوات المضي بكرتنا السودانية نحو منصات التتويج
*من عزام مروراً بالجزولي ولي قدام
*في المريخ الجزولي وعزام وطبنجة والغربال الصغير وغيرهم
*يشكلون نواة التشكيلة التي حتماً ستصعد يوماً على منصات التتويج القارية
*وأهداف الجزولي الأخيرة تعبر عن موهبة أكبر من العمر وثقة بالنفس كبيرة
*إذا سارت الكرة السودانية على هذا النحو
*صدقوني سنمحو إخفاقات الشيوخ الماضية
*الشيوخ الذين يحتكرون التشكيلة في كل الأندية وجميع المنتخبات ولا يأتونا إلا بالخيبات
*وهي خيبات إدارية حيث ينعدم التخطيط ولا ذكر للاستراتيجيات
*الدولة كانت تعتبر الرياضة كرة قدم
*وفي كرة القدم القمة بس
*لذا كانت إسهاماتها في الرياضة عطية مزين
*حتي وزراء الرياضة كانوا يأتون لترضيات سياسية وبس
*وآن الأوان بعد ثورة الشباب
*أن يقود الرياضة الشباب
*وأن يمارس الرياضة الشباب
*وأن تهتم الثورة بالشباب
*ففهم الثورة القومي يجب أن يسود
*ويجب أن نستمده من تشكيلة أتيامنا ومنتخباتنا
*كل قبائلنا في تشكيلة واحدة
*إذن لا للقبلية
*كل مدنا وأريافنا لها ممثلين في التشكيلة
*إذن لا للجهوية
*حتى أدياننا نجدها متمثلة في تشكيلة واحدة
*إذن لكم دينكم ولي دين
*ولكن الوطن للجميع
*أيها الناس
*أين اتحادات المناشط الأخرى
*الناس ديل وين يا لجنة يا أولمبية
*إنت ذاتك وين يا لجنة يا أولمبية
*وإنت وين يا وزارة يا اتحادية
*وإنتن وين يا اتحادات مناشط محلية
*أسئلة تحتاج لإجابات صريحة حتى ولو كانت الإجابات فضيحة
*لا لشيء سوى جمع الداتا عشان نعرف روحنا وين ونعد استراتيجيتنا لنذهب حيث نريد محل ما دايرن نبقى
*أيها الناس
*بحمد الله أفراح المريخ مدورة
*إنه زمن الشباب
*ها هو الشبل المريخي الشفت محمد الصادق يحرز المرتبة الثانية على مستوى السودان من مدرسة الشيخ مصطفي الأمين
*التحية للمريخ ولأسرته ولأسرة مدرسة الشيخ مصطفي الأمين
*أيها الناس
*الأهلة قالوا إتملوا قروش
*ورغم ذلك إتملوا مواسير
*سجلوا عشرين وأبو عشرين
*ولا زالت التشكيلة جمال سالم وسموأل وأبو عاقلة والشغيل
*شافوا رمضان قالوا دايرنو
*شافوا بخيت قالوا دايرنو
*شافوا محمد الرشيد قالوا دايرنو
*شافوا تيري قالوا دايرنو
*شافوا عزام قالوا دايرنو
*شافوا الجزولي قالوا دايرنو
*ذكروني حبوبة الحبيب إسماعيل حسن
*قالوا زماااان جابوها الخرتوم من البلد
*قالوا يفسحوها
*ودوها جنينة الحيوانات
*شافت القرد
*قالت وا شريري ده شنو ده؟
*قالوا ليها ده الككو
*قالت دايره لي واحد أوديهو البلد
*شافت القرنتية
*وا شريري ده شنو ده؟
*دي القرنتية يا حبوبة
*دايره لي واحد أوديهو البلد
*شافت الفيل
*وا شريري ده شنو ده؟
*ده الفيل يا حبوبة
*دايره لي واحد أوديهو البلد
*وهكذا الحال مع الأسد والنمر وأبو القدح والغزال
*لما جات جمب الزراف عاينت ساي ومشت
*قالوا ليها ما دايره ليكي واحد من ده توديهو البلد ياحبوبة؟
*قالت لا لا ياكلنا التمر
*أها دحين يا روشا الجزولي ده ياكلكم التمر
*ما شفتو في الرأسيات كيف
*لكن بصراحة يا محمد عبد الماجد
*بدل دايره واحد أوديهو البلد دايره لي واحد أوديهو البلد
*قدموا طلب نديكم حداشر
*زمان أديناكم شلة
*ناس طلعت فريد متذكر
*نديكم حداشر ما فيهم زول بياكلكم التمر ولا ياكلكم الصفر
*بس قدموا الطلب
*أيها الناس
*إن تنصروا الله ينصركم
*أها
*نجي لي شمارات والي الخرتوم
*كان شفت يا والينا
*في فوضى مطلعه عينينا
*فوضي في استعمال الشارع العام يا والينا
*وفوضى في الأسعار من كل الببيع لينا
*الرغيف التجاري وصل خمسطاشر ألف للرغيفة يا والينا
*كلم حمدوك يكلم مدنوك بالبحصل لينا
*ولا
*والله
*ولا خليك يا والينا
*قالوا السواي ما حداث يا أخينا

سلك كهربا

ننساك كيف والكلب عض واحد بتاع الغاز قايلو بتاع الغاز
وإلى لقاء.