جمهورية المريخ

*زمان لما كنا بنقول العضوية مهمة

*وكنا بنعني بالعضوية

*العضوية ام راس

*ما العضوية بالراس

*لانو العضوية بالراس هي نتاج طبيعي لسياسة القطيع التي تسيطر علي الوسط الرياضي

*اما العضوية ام راس فهي التي تقوم لمحاربة سياسة القطيع الوهمية

*ديمقراطية واهلية الحركة الرياضية كنا نسمع بها

*نشأنا عليها

*حلمنا بها

*حلمنا بها قبل ما الفيفا تعرفها وتفرضها

*منعول ابو امانة الشباب تلك

*حلمنا بديمقراطية واهلية الحركة الرياضية

*الي ان تحققت واقعا في ارض المريخ المقدسة ليلة توقيع السلام في التالت من اكتوبر

*ليلة افتقدنا فيها حقيقة تصريحات بروف جلال وخنفشاريات وعنتريات كتيرة

*وانتصرت العضوية ام راس معلنة ميلاد ديمقراطية واهلية الحركة الرياضية

*وتم رفع علم جمهورية المريخ الديمقراطية

*وتحية مدنية محترمة لشباب الجمهورية ولكل من ام جمعية العقول

*ايها الناس

*عليكم الله من خلقوكم

*شفتوا ليكم نادي في السودان ده اعضاء مجلس ادارتو اسقطوا قرار لرئيس النادي؟؟؟

*ياخ قبل كدة مجلس الهلال مجتمع مع الحيكومة بدون الارباب

*اتفقوا وباركوا الاتفاق

*الارباب مسكل ليهم قاموا فوق

*نظام رئاسي يقوم علي انا ادفع انا اقرر وحدي

*ومواقف اخري كتيرة المجال مامناسب لذكرها

*لكن عهد هذا المجلس قرر سودا اعفاء خيري

*المجلس اسقط قرار سودا لانو مخالف للقانون

*ودي كانت الاولي في تاريخ الاندية الرياضية

*وفي الجمعية اتي المجلس بمقترحات

*افتقدت تلك المقترحات السمع والطاعة المعهودان دوما

*وقررت الجمعية العمومية (السلطة العليا) اسقاط مقترح المجلس وقد كان

*وبرضو الحالة الاولي التي تسجلها جمعياتنا الرياضية

*عارفين ليه؟

*لانو العضوية ام راس كانت حاضرة

*والعضوية بالراس شكلت غيابا كاملا

*أيها الناس

*اكتملت الصورة الديمقراطية داخل النادي

*وعقبال الشارع

*وصدقنا لما قلنا ان الديمقراطية ستخرج من دار المريخ للشارع

*الذين يتبعون الناس

*لم يصدقوا ان اعضاء الجمعية يقفون ضد رغبة سوداكال

*لانهم لم يدركوا بعد ان الانتماء العميق للكيان يجعله مقدما علي الجميع ومتقدما علي كل المصالح

*مبروك مريخنا

*مبروك تاريخنا

*والبنجيبوا الديمقراطية حبابو والله جابو

*والراجي الركشة تجيبو حايطول وياخد مدة

*كانت هذه مقتطفات من الجمعية التاريخية

*بالطبع سنعود لها بالتفصيل

*ايها الناس

*ان تنصروا الله ينصركم

*اها

*نجي لي شمارات والي الخرتوم

*والينا

*العرضة العباسية حي الامراء ومناطق حوالينا

*زمن ماشافت موية بعينها

*الموية بقت في العيون والركب والرئة وجفت في مواسيرنا

*بالمناسبة يا والينا

*منو مواسيرنا؟؟؟؟

سلك كهربا

ننساك كيف والكلب قال مواسيرك مواسيرك قطن نشفن زيرك

والي لقاء

سلك