* لكل منا مواصفات (شريكة حياة) ..
* في ناس الواحد ممكن مواصفات شريكة حياتو تكون: (بيضاء، عيونها كبار، بتنوم بدري، لا قصيرة ولا طويلة) ..
* وفي واحد بيكون خاتي مواصفات: ( طويلة ، نخرتها مستقيمة ، عندها وجنات ، ما بتعمل كريم)..
* وبتذكر عندنا صديقنا كانت مواصفات شريكة حياتو إنو أمها تكون متوفية ..
* والله صحي ..
* قال ما عندو مشكلة طويلة ولا قصيرة ما فرقت لكن شرط أمها تكون متوفية ..
* وحقيقة الزول ده كان جادي وظل يبحث لأكثر من سنة عن شريكة أمها متوفية والله على ما أقول شهيد ..
* تتعدد المواصفات والطلبات كشئ طبيعي وهذا حق مكفول ..
* وتقريباً كل الرجال متفقين علي المرا (الما نقناقة) ..
* الرجال اتفقوا علي (الما نقناقة) أما باقي الحاجات فهي نسبية وتتفاوت من شخص لآخر ..
* وحقيقة في ناس قنوعين جداً، الواحد يقول ليك أنا عايز لي (بت حلال بس) ..
* نفس المواصفات التي نطلبها في شريك الحياة يطلبها كل نادي فيما يتعلق بنجوم التسجيلات..
* قبل سنوات البرير حدد مواصفات لاعب الهلال واشترط ان يكون اللاعب طويل القامة وقوي فكان أن سجل نزار حامد وصالح الأمين ..
* كل الأندية تحدد مواصفات اللاعب الذي يجب ان يرتدي شعار فريقها ..
* كل الأندية ما عدا المريخ الشهير بـ(المدفور) ..
* المريخ السنة دي مواصفات اللاعب العايزو هي :(يكون لاعب) ..
* مواصفاتهم عايزين ليهم زول بيلعب كورة ..
* يعني دايرين ليهم (ود حلال وبس)..
* ما مهم بيلعب في ياتو خانة أو مستواه أو النادي الجاي منو ..
* المهم إنو يكون لاعب وبس ..
* بشرط يكون بيعرف يجري وبيعرف يشوت ..
* وأهم حاجة يكون بيعرف يجري ..
* هسه أنت لو بتعرف تجري وحلقت حلاقة شاذة ممكن تسجل في المريخ ..
* قال ليك ناس المريخ الأيام دي مع الفلس بعاينو للاعب في راسو …
* لو شافو حلاقة شعرو شاذة معناها لعاب طوالي بدخلو الغرفة ..
* ولو حالق حلاقة عادية معناها ما عندو حاجة ..
* الأندية بتسجل حسب (الحاجة) وناس المريخ بسجلو حسب (الحلاقة) ..
* أي شاب الأيام دي ما لاقي شغل طوالي يمشي يحلق نيمار ويرفع صورتو في الفيسبوك وبإذن الله غرفة تسجيلات المريخ ستخطفه ..
* بخطفوك من الفيسبوك لو حلاقتك سمحة ..
* المريخ يرصد اللاعبين من الفيسبوك..
* الناس ديل عندهم (كشيفين في الفيسبوك وفنيين في الواتساب) ..
* هسه أنا عندي احساس إنو محمد داوود ده لقوهو في الفيسبوك ..
* عندي احساس كده ..
* وطبعا اي زول حر في (محاسيسو) ..
* المهم ..
* التسجيل من أجل التسجيل لا يسمى قناعة كما انه لا يسمى تسجيلاً فنياً ..
* هذه لا تسمى (قناعة) وإنما تسمى فلس ..
* طبعاً هم الأيام دي بيقولوا ليك: تسجيلاتنا فنية ومحدودة جداً..
* محدودة بـ(خاء) ..
* المريخ سجل محمد داوود بعد صراع شرس مع أندية تريعة البجا وسواكن وقلب الأسد النهود ..
* كسب المريخ معركة التسجيلات وظفر بهذا اللاعب الفلتة ..
* يحدث هذا برغم أن هنالك ثلاثة من نجوم الهلال مفكوكين والهلال لم يجدد عقوداتهم بعد ..
* بشة عقده انتهى وبوي ووليد ..
* وكل واحد من التلاتة ديل خانتو فاضية في المريخ ..
* ورغم هذا المريخ ما قدر يفكر مجرد تفكير في مفاوضتهم ..
* ولا حتى من باب الكشكرة ساكت..
* العين بصيرة واليد قصيرة ..
* زمان لو في لاعب عقدو منتهي نجد أن الهلال يجدد عقد اللاعب في اليوم الأول للتسجيلات ..
* أما الآن لا خوف على من ينتهي عقده ..
* تسجيلات هادية وظريفة ..
* وهذا كله بسبب فلس المريخ ..
* الهلال كان ممكن يستغل ظروف المريخ ويسجل كل اللاعبين الذين رصدهم المريخ ..
* كان ممكن نعمل كده عادي ..
* لكن في النهاية الهلال أكبر من إنو يخش في حركات الشفع الصغار ..
* الهلال استفاد من الدروس السابقة ..
* شلنا العايزنو والما عايزنو خليناهو يمشي المريخ ..
* وكل الشلناهم المريخ كان عايزهم وفاوضهم بالفعل ..
* فاوضو حسين أفول وجينا شلناهو لأنو فعلا نحن محتاجين ليهو ..
* فاوضو محمد موسى (الأهلي) وجينا شلناهو لأنو فعلاً نحن محتاجين ليهو ..
* فاوضو دراج والمعتصم وشلناهم ..
* والآن سيقوم الهلال بالتجديد للثلاثي المفكوك وفي هدوء تام ..
* ولو عايزين هسه بنسجل ضفر ونطلعو إعارة هلال الفاشر ..
* وممكن نشيل راجي نسجلو ونطلعو إعارة لهلال نيالا ..
* وافتكر انكم قبل كده جربتونا في موضوع شيبوب ..
* شلنا شيبوب وطلعناهو (اعارتين) ..
* الاعارة الاولى في (جوبا) ، والاعارة التانية في تونس ..
* هسه يا تبيعوا لينا طابق شاخور ويا كمان بنطلع التش اعارة..
* أصلاً انتو بتوعين بيع ..
* زول ببيع الكاسات طبيعي جداً يبيع اصول النادي والاستاد ..
* خليك من طابق شاخور، انتو مش مطلوبين ديون..؟
* الكاردينال يحل ليكم جزء من الديون دي مقابل (المسبح) ..
* شايف عندكم مسبح كده فياريت نصل معاكم لتسوية ..
* عندكم ديون وراجيكم اعداد ومعسكر ولبس وكدارات وبرنامج طوييييل ..
* نحن فكرتنا إنو محل المسبح حقكم ده نعمل فندق صغير كده لفريقنا بتاع الشباب ..
* الفندق بتاع الجوهرة ح يكون للفريق الأول ..
* عشان كده نحن بنوسعها عليكم بالمال وانتو وسعوا علينا بقطعة الأرض الفيها المسبح دي ..
* نفك ليكم كربة ونتكفل بمعسكركم وانتو برضو فكوا لينا كربتنا المتمثلة في ايجاد قطعة أرض قريبة من استاد الهلال ..
* وكمان في مقترح تاني لو بتوافقوا عليهو ..
* نشتري منكم استادكم ونعمل ليكم استاد على قدر مستواكم في مدينة الصالحة ..
* صالحة ب(ثاء) ..
* ونركب صافنات ونجيبة (جعلية) واصلو الزول بيموت والذكرى تفضل حية ..
* و..و..
* ولو تعرف غلاوة الريد كنت ….(غيرت حلاقة شعرك) .
