خليك فى البيت احسن ليك..حكايات مع الكورونا

حكايات مع الكورونا
خليك في البيت.. أحسن ليك..!
* قالوا مافي تجمعات.. كل مساجد الدنيا قفلت.. الأسواق محل معايش الناس.. قفلت برضو… ناس حلتنا ماشغالين بالموضوع.. لسع في ناس عندهم رأي في عين المرض ذااااتو…. وقالوا شنو؟: ما بنعرف زول جاتو كرونا..!
* وكمان ناس المسجد القدامي… قفلوا المسجد، قلنا ديل كويسين، لكن طلعوا الفرشات وبقوا يصلوا بره هههههههه

* أول أمس في أبها السعودية.. أولاد السريحة الجنب المعيلق حقتنا ديك، عندهم واحد والدته اتوفت، وطوااالي اتلقطوا ومشوا عليهو… وهاااك يا الكسير في الشقة نظام البكاء السوداني، قامت الدورية كبست… ومافي أي حل في الدنيا غير إنهم يتغرموا… عشرة آلاف ريال كل واحد.. وهم (22) نفر… يعني 220 ألف ريال …. بتساوي زي 6 مليار و600….. لو عزوا ولدهم ده بالتلفون، ورسلوا القروش للفقراء في حلتهم السريحة صدقة لروح المتوفية، كان دخلوا بيها الجنة هم والمرحومة كلهم ذاتا.. ودي أحسن من فاتحتهم الجابت الهواء دي.. لكن وللأسف نحن بنحب الغلط وبنعشق (الهواء).

* في حلتنا.. (الإسكان) ما حلتنا (أبوعشر) الفي الجزيرة.. ولا حلتنا الفي جبال النوبة… أصلوا ناس حلتنا الفي الجبال قلبهم كان مقطوع علينا من الكيزان، وطوالي زمان لما أتصل على الوالد أقول ليهو: عاملين كيف؟
يقول لي: نحن كويسين… بس خايفين عليكم انتوا ?????..!
* أها.. في حلتنا هنا في الإسكان، معظم الناس معايشها اتقطعت، وبقوا عطالى.. طبعا أنا أكبر عاطل ياخوانا.. لكن زي ما بقولوا شباب الجيل: (بي حقي) ?
.. كل الأعمال وقفت والناس إحتارت وجااااعت.. يقوموا أولاد الحلال يعملوا ليهم درب علي المزارع والجناين علي النيل، يطلعوا من الصباح نسوان وشباب وصبيان يمشوا يشتغلوا في المزارع دي (يلقطوا الليمون والجوافة ويحفروا البطاطس والأسود الباذنجان وباقي الخضروات ويجهزوها للسوق).. طبعا برجعوا آخر اليوم وأي زول شايل ليهو مصاريف وخضار… نحن بقى منتظرينهم في الحلة بنشتري الخضار ده بأقل من سعر السوق.. وأهو نضرب سرب العصافير (نياشين نيش شديد).
* الكلام ما هنا….. يقوموا الشباب والصبيان يعملوا ليهم دور سباحة ورشرشة في النيل، وعينك ما تشوف إلا النور… لحدي أمس غرقانين اتنين من الجيران…. الأول (صدام) شاب يادوووب اتزوج قبل كم سنة وعندو بنت صغيره وزوجتو ماشة علي ولادة.. غرق وقطع قلوب ناس الحلة والناس فرشت وبكت ?????، والتاني صبي دون العشرين غرق أول أمس.. يااا ألله..! ربنا يرحمهم ويغفر ليهم.
* خليك في البيت دي بقت ما مقنعة… والناس ماسكاها الهلا هلا….. شفقاااانه شفقت فلانه ديك.. عارفنها موش.. !
* نمشي نشوف أصحابي بتاعين نادي المريخ… ديل أصلا ما وقفوا.. إفطار يومي ولمة و(ليدو) كمان.. وأنا البتاع ده (بكجنو) عديل كده.. وصاحبي مزامير الحنين ده كمان جنو وجن يمشي النادي.. ويتلاقوا هناك مع صاحبنا وزميلنا بابكر سلك وهاك يا (شمارات والي الخرطوم)… تقوووم تكبس ليك عليهم الدورية قبل يومين… علي بالحلف المامعروف سلك قالوا بقى زي يوسين بولت.. وصاحبي مزامير الحنين بقى زي الغزال يقفز علي الأمشاط..???
والعجب صلاح موسى (بجبج) الزول الزي الكشك ده، بقى أخف من أحمد آدم بيبو.. وعبدالوكيل (رئيس اتحاد الليدو).. كمد نص جلابيتو في خشمو.. وقام صوووف… والناس جرت جري… لو قالوا ليهم القيامة قامت ما بجروا كده ????
… نان ما قلتوا نوبه..!؟
في داعي لي ده كلو؟… مافي داعي… خليك في البيت..!!
أبوعاقله أماسا