دبابيس ود الشريف

دبابيس

ودالشريف

** أصبحت حياتنا كلها سوداكال.. ننوم ونصحي على سوداكال… الدولة ما قادرة على سوداكال… الاتحاد العام ما قادر على سوداكال… اتحاد الخرطوم ما قادر على سوداكال… الأمن والشرطة ما قادرة على سوداكال… جماهير المريخ فشلت في إيقافه عند حده… لديه شركة أمنية وهمية تقف أمام الاستاد والنادي وتمنع اي شخص من الاقتراب والتصوير… في مباراة امس سمح لانس نصرالدين مدير الكرة المبعد بالدخول وفرض مدرب اللياقة الفرنسي الجديد على كنبة الاحتياطي وطرد خالد المصطفى وحاتم محمد أحمد… وللأسف لم يوجد رجال شرطة في الإستاد لحفظ النظام وادعاء أسامة عبدالسلام مراقب المباراة بأن خالد المصطفى وحاتم ومجدي اشانتي وصلوا الاستاد بعد قفل الأبواب ادعاء باطل ونسأله. كيف سمحتم لانس نصرالدين بالدخول..وقمتم بطرده من الكنبة بعد ذلك

** ما يحدث في المريخ مأساة والسؤال من يقف وراء سوداكال ويجعله في موقف تحدي للاتحاد العام ولكل الجهات

** الاتحاد العام فشل في إنزال قراراته بشأن أزمة المريخ إلى أرض الواقع وهاهو سوداكال يتحدى ويسرح ويمرح وما شغال بأي زول… أين أنت يا د كمال شداد

** جماهير المريخ فالحة بس في النقة والكلام الفارغ في القروبات وما قادرة تحمي ناديها وقبل مباراة امس لم يتواجد اي شخص حول الاستاد.. كلهم خايفين

** الان الاتحاد العام بصدد تحويل مباريات المريخ من استاده عشان سوداكال.. يا للماساة ويا للفضيحة..

** نقبل بتحويل مباريات المريخ من ملعبه لان الملعب سيئ وما نافع لكن ان كان التحويل عشان سوداكال.. تبقى دي هزيمة للاتحاد العام وفضيحة كبيرة

** نسمع أن مجموعة موسى الكندو اتفقت مع الشرطة على استلام الاستاد.. والكلام ليهو ٤ ايام… ووضح انو كلام ساكت وفقاقيع في الهواء… مجموعة الكندو لا حول لها ولا قوة… اهي بتتفرج زينا كده

** فرد واحد يهزم ٣٠ مليون مريخابي…

** الهرجلة التي شهدها ملعب المريخ مساء أمس واطلقنا عليها مباراة في كرة القدم انتهت بفوز المريخ على توتي بهدفين نظيفين أحرزهما الشبل الجزولي وعاد الأحمر لمكانه الطبيعي في الصدارة

** بعد الهرجلة بين المريخ وتوتي تحولت لمشاهدة مباراة انجلترا وكرواتيا ووقفت على الفارق الكبير بينهم وبيننا.. ملاعب تاكل فيها وانارة ربما تكون أفضل من شمس النهار وكرة قدم حقيقية. لا فيها برطعة ولا جرى.. وممكن أيضا أن تشاهدوا الدوري المصري وتشوفوا الكورة وحلاوة الملاعب…. نحن لسة متخلفون.. بس عندنا طولة اللسان

** بالله هسي ملعب المريخ ده ملعب كرة قدم… ده سباق الخيل كتير عليهو

** العالم يتطور ونحن مليون سنة. في سوداكال والسوباط ومادبو والكندو واسد.. وشداد ومعتصم وأسامة ومش عارف ايه

** إعلام الهلال وكالعادة هيص لانتصار فريقه على الاهلي شندي ( الهلال تو) أضعف فرق الدوري الممتاز وشبعنا من الغزل في وليد الشعلة ومحمد عبدالرحمن وعبد الرءوف وبوجبا

** اهلي شندي وبهذا المستوى لن يبق في الدرجة الممتازة

** الشاذلي عبدالمجيد وعكس ما كتبنا رجل ذكي. جدا والان يدير معركته الانتخابية بكفاءة وخطة محكمة واستطاع أن يرجح الكفة وتحدث حديثا رائعا عبر قناة أمدرمان وأكد على برنامج طموح يهدف إلى دعم الأندية والنهوض بها.. ولا نملك إلا نقف خلفه وندعمه طالما نذر نفسه لخدمة الأندية واتحاد الخرطوم نفسه.. ونعود

** انديتنا المشاركة في بطولتي أفريقيا مهددة باللعب خارج السودان بسبب ملاعبنا المهترئة

** من يحكم الهلال.. السوباط ام تركي آل الشيخ

** إضاءة استاد الهلال وصلت بورتسودان ولما تصل الخرطوم وتتركب تكون البطولة الأفريقية انتهت

** متين تشرق سماء المريخ.. ومتين جرح البلد يشفي

** علمت أن عبد الله القاضي مقيم في الدوحة ومشجع متعصب للهلال وحاقد على المنتخب الوطني

** الاخ مجذوب المجذوب رئيس رابطة مشجعي المريخ بالدوحة.. لك احترامي وتقديري واسف ان أصابك بعض الرشاش

** واللهيب البكوي في روحي في زاتي.. هو انت قلبي دايرك وحبي عارفك

** آخر دبوس

** إذا لم يستطع الاتحاد العام وضع حد لسوداكال.. مافي داعي لاستمراره..