دخلنا في اجواء القلعة……. وجماهيرنا منتظرة المتعة…
تغريدة واتساب
بقلم : معاذ ابومؤيد
دخلنا في اجواء القلعة…….
وجماهيرنا منتظرة المتعة….،،..
لما تكون علي ارتفاع الف قدم ويجيك المضيف يقول ليك في المكرفون نحن الان في الاجواء السودانية احساس مختلف شديد يظهر ليك في مخيلتك
احداث كتيرة ومواقف
اصحابك واهلك واولادك وناس الحلة وريحه ( النيل) وشارع ( النيل) !!!
نحن حاليا نعلن للجميع
الان نحن في اجواء القلعة الحمراء السودانية وطبعا المشاعر الحالية بيعرفوها الشفوت ورواد الاستاد…
زولنا الاول اختلط عليه ريحة الوطن بالاهل وقعده
شارع ( النيل)!!!
ونحن بتختلط علينا الان اجواء القلعه وريحه العجاج علي اضواء الكشافات علي اكل التسالي علي ريحة اللبن المقنن و ( اللقيمات)!!
علي صور الاحماء علي هتاف المساطب وصفوف التذاكر دي كلها مشاعرنا واحاسيسنا الآن !!
كيف ونحن الان في اجواء القلعة الحمراء علي حسب الزمن والوقت ياخي دي جنس مشاعر مابتتوصف بحسوها ناس المدرجات فقط!!
**************************
اها ياناس وياشفوت مرايلنا جاهزة وناس المشرفين رفعوا التمام والعندو ذيادة مرايل يجيبها لينا والقروب الماحصل نفرة اللبس الموحد يشوف ناس المك وابوالجاز وودالشاهر وهاشم الصفوة طريقهم وين
ديل ناس اللبس الموحد منتظرين اي ذيادة !!!
ولو الناس لبست كمان معاه شعار النادي تكون اجمل لوحة…
كمان ناس قروب محبي المريخ الكيان ديل جابو زاد الحبان ولي ناس الاسعاف جابو أربعة لبسات بدل نشوفهم خلف الشاشات لابسين ارقام قدامى اللاعبين واساميهم في التشيرتات !!
ناس محبي الكيان جابو ليهم لبس ينور الشاشات دي غير الأعلام الوفروها…
كدي كلو شي ماشي تمام
شكرا ليكم ياشفوت وياها المحرية فيكم ….
**************************
يلا بعد دا نمشي لناس قناة الملاعب ماعايزين نوصيكم حنحسبكم من ضمن الشفوت وسمعنا انكم اكملتوا التجهيزات وقلتو يتم نقل مباراة المريخ عبر 8 كاميرات حديثة .. منها 5 كاميرات متحركة و 2 كاميرات ثابتة
وعملتوا استعانة بعدد 2 طائرة لتصوير الاستاد ومنطقة أم درمان كعمل جديد يعكس الاجواء الخارجية للإستاد للعالم الخارجي
و استديو تحليلى بصورة مميزة ويبداء قبل الكورة بساعتين
لحدى هنا نحن حلوين بس وصيتنا ياناس الملاعب عشان مجهود الشفوت مايضيع خلصوا لينا تحليلكم بدري بدري وانتقلوا بالصورة للملعب قبل عشرة دقايق من اللقاء عشان الناس تشوف مجهود الشفوت من المدرجات ….
سمعتونا ياناس الملاعب قبل عشرة دقايق!!
ياريت تنقلوا الاجواء اثناء التحليل لانو ناس التحليل عارفين اشكالهم وحافظنهم صم. اعملوا اتنين وندو ظريف او خلو الشاشة صريحة مع الملعب وصوت الضيوف والمحللين خلفية……
ماتنتقلوا للملعب والكورة في نص الميدان !!!
الشفوت ديل تعبانين وتعبنا دا أمانة في رقبتكم…
**************************
مسئول الإستثمار بالمريخ قال لينا
خمسة شركات كبري ترعى وتعلن عن نفسها عبر قمصان المريخ
وتم تسويق كل اللافتات الإعلانية داخل الملعب…
تم تسويق الغرفة الخاصة بالمؤتمر الصحفى..
اها باقي ليكم مراقبة البوابات وشباك التذاكر …
مافيا التذاكر في المبارة الفاتت تم تحجيم دورهم المباراة دا مباراة اعدامهم !!
باكر لنا عودة ليهم
ووصيتنا ليكم بخصوصهم !!
**************************
ختاما
شكرا لكل شفت خاتي المريخ في حدقات العيون
دروس حب الكيان توزع مجانا الايام دي في القروبات
**************************
ونحن علي المدرج ومنتظرين المرايل ومنتظرين توجيهات المشرفين علي التيفو واللبس الموحد ….
كل زول يلاقي مريلة او تيفو في المدرج يستخدمها الاستخدام الامثل وبعد المباراة يخليها في مكانها عشان حنستخدمها تاني مامحتاجين وصية ياشفوت….،
**************************
خارج النص
الحصل في القاهرة ياناس التسيير من مستحقات مالية والخلافات من اللاعبين الاجانب وقصة تسجيل مباراة المقاصة دا بنسميه فشل اداري وعشان ماعندنا زمن ليه حاليا سنرجع ليه بالتفصيل بعد المعركة ابقو رقاق وجاهزين لمناقشة الحصل !!
ناس تعبانة وناس شقيانة
وانتو سنه اولى إدارة !!!!
( عييييييييييييييييييب )….
**************************
همسة اخيرة
اجري يانيل الحياة
لولاك ماطابت حياة
اجري يانيل الحياة
بالله اقروها باللحن حقها عشان متعتكم تكمل ……
والباقي تمو خيااااااال ياشفوت
