ده بالنسبة للزول البيأكل (تسالي) بايت !!
بالعربي الكسيح
محمد الطيب الأمين
ده بالنسبة للزول البيأكل (تسالي) بايت !!
* من الأشياء المُعيبة ذوقياً أن يقوم (رجل ثري) بتشييد عمارة من (3) طوابق في (حي شعبي جداً) ..
* من حق أي إنسان أن يبني بيته بالطريقة التى تعجبه وليس لنا الحق في أن نمنعه أو نحسده ..
* طالما ربنا فتحها له ورزقه المال فمن حقه أن يُحسن بنيان منزله ..
* ولكن الملاحظ أن بعض الأثرياء يتطاولون في البنيان داخل أحياء شعبية فقيرة بيوتها عبارة عن بيوت طين محدودة الغرف والسُترة ..
* بيوت من طين لا توفر إلا الحد الأدني من السُترة ..
* ومع ذلك تجد بعض من أبناء الأثرياء في الأحياء الشعبية يستغلون (سطح المنزل) للمعاينة في الشارع و(بيوت الجيران) وهذا أمر قبيح جداً ..
* أعرف بعض الأسر تعيش في حالة (قلق) حتى داخل المنزل ..
* أسرة تتألف من (5) بنات وجيرانهم يملكون عمارة يطل من خلالها (الأولاد) وعبر (السطوح) فيقيدون حركة (بنات الجيران) حتى داخل منزلهن ..
* البنات في بطن البيت ما لاقيات راحتهن ..
* وهذه من المشكلات الكبيرة التي تهدد السلامة الإجتماعية ويمكن أن توفر بيئة صالحة للحسد والعياذ بالله ..
* ربنا بسط ليك في رزقك ما عندنا مشكلة وإن شاء الله بالزيادة لكن كمان للجيران حرمة ومحارم وحق عليك ..
* المهم ..
* نحن نحمد الله أن (الجوهرة الزرقاء) ليس بالقرب منها (بيوت شعبية) ..
* مقصورة الجوهرة الزرقاء (ماشاء الله) بقت زي (برج المراقبة) ..
* زي العمارة في الحي الشعبي ..
* تكون قاعد في مقصورة الجوهرة عادي ممكن تشوف تمرين المريخ في إستاد الحكومة الشهير بـ(الرد كاسل) ..
* من مقصورة الجوهرة ممكن تشوف الناس القاعدين في طابق شاخور هناك في إستاد المريخ الحكومي ..
* من مقصورتنا دي لو في واحد قاعد في طابق شاخور بيأكل في (تسالي بايت) إحنا بهنا بنعرفو ..
* عشان كده اعملوا حسابكم ..
* وأنا والله ما في حاجة واجعاني إلا طابق شاخور ..
* ناس المريخ لما عملوا طابق شاخور كرهونا العيشة ذاتو ..
* كانوا فرحانين جداً بطابق شاخور ده ..
* لدرجة إنو في ناس بيمشوا الإستاد عشان يقعدوا في طابق شاخور ما عشان يشوفوا المباراة ..
* هسه طابق شاخوركم ده بالنسبة لينا أقل من المدرجات الشعبية ..
* والغريبة بعض المريخاب قالوا زعلانين لأنو رئيس الجمهورية قال الشغل العملو الكاردينال ما سبقه عليهو زول ..
* قالوا جمال الوالي سبقو على الشغل ده ..
* جمال الوالي فعلاً عمل كده بواسطة الحكومة ..
* الفرق بين الجوهرة وإستاد المريخ أن الجوهرة من حر مال الكاردينال وإستاد المريخ من حر مال الحكومة ..
* ده الفرق يا مولانا ..
* الآن إنتهت الجوهرة وأظن أن الكاردينال يعلم علم اليقين أن الجوهرة تحتاج لفريق جوهرة..
* لازم يكون الإستاد جوهرة والبيلعبوا جوة الإستاد جواهر برضو ..
* ومثلما خطط الكاردينال لهذا العمل العظيم الذي تم إفتتاحه عل يد رئيس الجمهورية، عليه الآن أن يخطط تخطيطاً سليماً لبناء فريق يشرف كل السودان..
* لو لم يكن هنالك تخطيط لما إكتملت الجوهرة ولما أصبحت بكل هذا الجمال..
* تجربة الجوهرة يجب أن ينقلها الكاردينال لفريق الكرة حتى يصيب ذات النجاح الذي حققه فيما يتعلق بـ(المباني) ..
* الشغل بتاع الجوهرة تم بدون سماسرة وبدون مصلحجية وبدون منتفعين عشان كده طلع أحسن ما يكون، وببساطة نرجو من الكاردينال أن يشتغل شغل الجوهرة في فريق الكرة بعيداً عن السماسرة والمنتفعين والمصلحجية..
* شكر الكاردينال واجب وعندما ننتظر المزيد فاننا نتعشم في هذا الرجل لتحقيق لقب أفريقي (يبل شوق السنين)..
* بمناسبة السنين ..
* ورد في (عمود) الأستاذ مزمل أبو القاسم أن مجلس المريخ قام بشراء (سكر ودقيق) بكميات كبيرة وباعها عن طريق (الكسر) لتسيير نشاط النادي..
* شغالين كسر الجماعة..
* يشيلو من التاجر شوال السكر بـ(مليون ومية) ويجوا يفكوا في السوق بـ(850) ألف جنيه ..
* وده كلو في سبيل إيجاد (كاش) ..
* والكسر حوله كثير من الحديث بل أنه يدخل ضمن شبهات الربا والله أعلم ..
* إذا صح الحديث الذي تناوله مزمل أبو القاسم فان ذلك أمر خطير جداً ..
* الحال في المريخ أصبح صعباً جداً ..
* المريخ بلغ مرحلة حرجة ..
* قالوا مازدا طالب مجلس الإدارة بتحسين (الوجبات) للاعبين ..
* سبحان الله ..
* ده المريخ الكان شغال (بوفيه مفتوح) ؟؟
* دنيا والله ..
* مازدا يطالب بتحسين الوجبات ..
* الوجبات دي يحسنوها ليك كيف يا مازدا مع الظروف دي ؟؟
* المريخ معسكر في (بيت) والوجبات المقدمة (فول أغبش) ..
* وبعد ده يجوا يتفاصحوا ويقول ليك الهلال وما أدراك ما الهلال ..
* خليك من ده كلو ..
* في صحيفة (قوون) الصادرة أمس ورد خبر يقول ان هنالك صراع عنيف بين مجموعتين ينتميان للنادي بسبب (النجيلة) ..
* في مجموعة جات الإستاد وعملت صيانة للنجيلة ..
* وفي مجموعة تانية جات الإستاد برضو وقابلت مدير الإستاد وقالت دايرة تعمل صيانة للنجيلة ..
* والمجموعتين إتشاكلوا ..
* كل مجموعة دايرة تصين ..
* عشان كده أنا عندي ليكم مقترح ..
* بما إنو نجيلة إستاد المريخ الحكومي بتشبه (وش البت الما نفع معاها الكريم) فأنا أقترح أن تقوم المجموعة الأولى بصيانة الأرضية على أن تقوم المجموعة الثانية بصيانة الأرضية بعد أسبوع من تاريخ صيانة المجموعة الأولى ..
* هكذا أقترح ..
* وأي زول طبعاً حر في (إقتراحاتو) ..
* أصلاً نجيلتكم دي محتاجة صيانة وزراعة كل (10) أيام ..
* نجيلة يا كافي البلا أ تقول بسقوها موية نار ..
* وغايتو جنس غايتو ..
* ونركب صافنات ونجيبة (جعلية) وأصلو الزول بيموت والذكرى تفضل حية ..
* و..و..
* وإذا الخاطر سرح عنك تأكد إنو راح ……(يشوف الجوهرة الزرقاء) ..
حمل تطبيق كورة سودانية لتصفح أسرع وأسهل
لزوارنا من السودان متجر موبايل1
http://www.1mobile.com/net.koorasudan.app-2451076.html
2,456حملو التطبيق
لزوارنا من جميع انحاء العالم من متجر قوقل
https://play.google.com/store/apps/details?id=net.koorasudan.app
17756 حملو التطبيق
على متجر apkpure
https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app
على متجر facequizz
http://www.facequizz.com/android/apk/1995361/
على متجر mobogenie
https://www.mobogenie.com/download-net.koorasudan.app-3573651.html
على متجر apk-dl
http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9
على متجر apkname
https://apkname.com/ar/net.koorasudan.app
