دوري وكَـأس.. ميدَان ومَكْتَـب

صَـابِنَّهَـا
محمد عبد الماجد

دوري وكَـأس.. ميدَان ومَكْتَـب

عمنا (عثمان قنب واقف) كانت أضانه تقيلة، وكان لا يعترف بذلك، ولا يتوقّف عند هذا الأمر ـ عامل فيها سامع أي حاجة. عمنا (عثمان قنب واقف) كان حريف، ما بديك أي فرصة وما بخلِّي حاجة تثبت عليه أو تدل على أنه ما سمعك، كان عندما تسأله سؤالاً يجيب عليك على سؤالك بإجابة ما عندها أي علاقة بالسؤال ـ زي البعملوا فيه ناس المريخ الآن.
عمنا (عثمان قنب واقف) كان وقت تقول ليه يا (عثمان قنب واقف) إنت إتزوجت سنة كم؟ بقول ليك الهلال غالب أربعة.
تقول ليه يا (عثمان قنب واقف) مباراة الهلال انتهت كم؟ بقول ليك أنا إتزوجت سنة 1964م، تقول ليه يا (عثمان قنب واقف) ولدك الكبير شغّال شنو؟ بقول ليك أول شارع خلِّيه، تاني شارع خش شمال بتلقى ليك دومة، الدومة دي في البيت.. أو الصحيح هو أنّ البيت في الدومة.. تقول ليه يا (عثمان قنب واقف)، إنت ساكن وين؟ بقول ليك دكتور.. تقول ليه الإنجليز طلعوا متين من البلد دي؟ بقول ليك البامية المفروكة.. تقول ليه، بتحب تأكل شنو؟ بقول ليك 1956م.
تقول ليه يا (عثمان قنب واقف)، فنانك المفضل منو؟ بقول ليك شاي باللبن.
تقول ليه تشرب شنو؟ يقول ليك عبد العزيز محمد داؤود.
بس شغال لينا كدا ـ موجاته ملخبطة شديد، إذاعة الكوثر داخلة في مانقو، وهلا 96 في صوت العرب، وإذاعة وادي النيل في الرياضية، والطبية في الاقتصادية، لخبطة شديدة، زي البعملوا فيه ناس المريخ في الوقت الحالي.. تقول ليهم انسحبتوا من كأس السودان ليه؟ يقولوا ليك رامي كمال.
الناس ديل لو كانوا واضحين وقالوا جان كلود، كان لقينا ليهم عذر، كان قدّرنا ظروفهم.
محسن سيد مدرب المريخ قال إنّ لاعبي المريخ قبل مواجهة الهلال كانوا يشعرون بالخوف.
ليهم حق، (جان) بخوف.
في المريخ يتحدثون عن عدم احترام الهلال لاتفاقيته مع المريخ متمثلة في الصورة التي جمعت بين رامي كمال من الهلال وهيثم كابو من المريخ، وينتقدون تراجع الهلال، رغم أنّ الهلال تراجع بشكل مُعلن ومن وقت مبكر، ولم يتفاجأ مجلس المريخ ولا إعلامه بتراجع الهلال وعودته لخوض نهائي كأس السودان، والدليل على ذلك إنّهم يتحدّثون عن أنّ رامي كمال بعد لحظات من البيان المشترك بين الهلال والمريخ، هاتف محمد حلفا وأكّد له مشاركة الهلال، (إنتوا وقت عارفين كدا البخليكم تنسحبوا شنو؟) هذا شئٌ يُدين المريخ لا الهلال، لأنّ مجلس المريخ كان يعلم ويعرف خطوات الهلال ـ الأكيد أنّ محمد حلفا نقل ذلك لمجلس المريخ، ليدفعهم للعودة وليس هنالك شئٌ يُخفى على مجلس المريخ وإعلامه في اتحاد كرة القدم السوداني، كما أنّ الهلال غادر في اليوم التالي لمباراة القمة إلى بورتسودان، وكانت تلك المغادرة مُعلنة ومعلومة للجميع ـ لم تكن عملاً سرياً قام به الهلال، ولا كانت هجرة خفية، ولا أحسب أنّ مجلس المريخ كان يعتقد أنّ سفر بعثة الهلال إلى بورتسودان وتمارين الفريق في استاد بورتسودان كان من أجل النزهة، كما ظلّت صفحة الهلال الرسمية على مواقع التواصل الاجتماعي، تُعلن عن استعدادات الفريق لقمة كأس السودان خطوة بخطوة، وكان هنالك وقت كاف للمريخ للتراجع والسفر إلى بورتسودان مثلما فعل الهلال، ولكن مجلس المريخ لم يقصد من فض المعسكر وتسريح اللاعبين إلا الهروب ووضع الاتحاد والهلال أمام الأمر الواقع.. مجلس المريخ ظنّ أنّ ما بينهم وبين الاتحاد من وُدٍّ وعلاقات ومصالح ودولارات يسمح لهم بأن يفعلوا كل شئ!!
ومجلس المريخ منذ مَقْدَم عمر النمير رئيساً كان مُتمِّهلاً في كل شئٍ، لم يتعجّل مجلس المريخ إلا في فض معسكره خوفاً من مواجهة الهلال.
لماذا فَضّ مجلس المريخ معسكر الفريق بهذه السرعة؟ إنّ مجلس المريخ لم يقصد من ذلك إلا سد الطريق لعودته، وما الذي جعل مجلس المريخ يرسل خطاباً لاتحاد الكرة يؤكد فيه انسحابه؟ هذا خطاب كان يفترض أن يرسل مع خطاب الهلال إذا كان هنالك اتفاقٌ حقيقيٌّ بين الهلال والمريخ، لكن يبدو أنّ المريخ كان مع سبق الإصرار والترصُّد يقصد عدم المشاركة، والهزيمة برباعية من الهلال زادت من مخاوف المريخ وجعلتهم يهرعون إلى الانسحاب!!
لقد عمل مجلس المريخ على استغلال ظروف الهلال في دوري النخبة، وظنوا أنّ غياب المحترفين الأجانب، وانتهاء التعاقد مع فلوران فرصة مواتية لهم للفوز بالدوري في ظل معاناة الهلال ـ عملوا على قيام الدوري وعلى أن يلعب في السودان حتى يحرموا الهلال من أجانبه ـ ومثلما عمل مجلس المريخ على استغلال ظروف الهلال في دوري النخبة، لماذا يستنكرون على الهلال أن يستفيد من ظروف المريخ بعد الهزيمة برباعية، وهو استغلالٌ شَـرعيٌّ للهلال، خاصةً أنّ عودة الهلال لخوض نهائي كأس السودان فرضته العقوبات التي تهدِّد القمة في حال الانسحاب، مما يؤدي إلى سحب التراخيص، والحرمان من المشاركة في البطولات الأفريقية، بعد أن هدّد الاتحاد العام بذلك.
إنّ من يستنكر على الهلال تراجعه المُعلن عن خوض النهائي، عليه أن يتذكّر خرق مجلس المريخ بقيادة محمد الشيخ مدني وعصام الحاج لاتفاقية الجنتلمان عندما قام المريخ بتسجيل هيثم مصطفى وعلاء الدين يوسف، ثُمّ رفض جمال الوالي لشطب هيثم مصطفى لتصحيح مساره من جديد ـ هذه الواقعة تثبت أنّ العلاقة بين الهلال والمريخ لا يعنيها الطرف الآخر في شئ، كما أنّ الاتفاقات بينهما ما هي إلا مجرد حبر على ورق.
مجلس المريخ فعل أكثر من ذلك عندما أجبر رمضان عجب ومحمد الرشيد وبخيت بالقوة الجبرية على التراجع من تعاقداتهم مع الهلال ـ أين كان احترام العقود والعهود والكلمة؟ والمريخ يتعاقد مع لاعبين تعاقدوا مع الهلال ليُعرِّض اللاعبين للعقوبة ويحرم المريخ من فترة تعاقدات.
لم يحترم مجلس المريخ وقتها عقوداً رسمية دفع الهلال مليارات الجنيهات لإبرامها، أيحترم الهلال اتفاقاً إطارياً زالت مسبباته؟
هذا حدث في عهد مجلس آدم سوداكال، وكان تسجيل البرنس وفييرا في فترة محمد الشيخ مدني وعصام الحاج، أما في فترة حازم مصطفى والجكومي، فقد حدثت الفضيحة الأكبر، وذلك عندما اتفق المريخ مع الأهلي المصري لخوض مباريات المريخ في مرحلة المجموعات بمصر، من أجل مصلحة الأهلي وما قصدوا من ذلك إلّا إلحَــاق الضرر بالهلال!!!
هل تعتقدون أنّ جماهير الهلال يمكن أن ترحب بأية اتفاقيات مع نادٍ *لُـدِغَ* منه الهلال أكثر من مرة؟
الغباء هو أن تتوافق مع نادٍ ظل ينفض تعاقداته عندما تكون ضد مصلحته.
الآن يحدثونا عن احترام العهود، أسألوا عنها عصام الحاج، فهو خير من يحدثكم كيف تُنقض؟
إنّ الهلال يكتب حكايته بيده ـ لا ينتظر أحداً، بل لا ينظر لأحدٍ.
دعونا نعيش في أجمل حكاياتنا الأخيرة.. إنّنا نعيش أحلى الأيام مع الهلال في هذه الفترة.
في نهر عطبرة، صاد الهلال فريق المريخ وفاز عليه برباعية نظيفة، توّجته بطلاً لدوري النخبة.
أربعة أهداف في شِباك علي الجمل ـ هدفٌ بضربة جوية من الغربال، وهدفٌ لروفا بعد عملية تمشيطية لجان كلود، وهدف نيران صديقة تسبّب فيه بوغبا وهو يُحسب له، وهدفٌ صاروخيٌّ من سقط لقط لروفا يُسأل عنه ناس الأرصاد الجوي ـ جرّبَ الهلال في المريخ كل (تكتيكات) العمل الحربي.
في البحر الأحمر، وفي نهائي الكأس، حضر الهلال ولم يحضر المريخ، لتثبت الواقعتان صحة المثل الذي يقول (يوجد في النهر ما لا يوجد في البحر).
دا فهم عالي شديد.
فقد وجدنا في النهر المريخ، فهزمه الهلال برباعية، وفي البحر لم يحضر المريخ ولم نجـده.
الزميل هشام عز الدين وهو مريخي بكاتل كتب على صفحته في الفيس بوك، إنّ انسحاب المريخ من نهائي كأس السودان كان أمرّ عليه من هزيمة المريخ برباعية من الهلال في دوري النخبة!!
وأنا أقول إنّ تتويج الهلال بكأس السودان بعد انسحاب المريخ لا يقل عندي (فرحة) من تتويج الهلال ببطولته المُحَـبّبة الدوري الممتاز، مع اختلاف القيمة بين البطولتين.. ومع أنّه بالنسبة لي ليس هنالك أجمل من رؤية شباك المريخ تتهادى في مباريات القمة، إلا أنّ (هروب) المريخ أو انسحابه أو رفضه خوض المباراة سَمِّـهِ ما شئت لا يقل عندي قيمةً من رؤية أهداف الهلال في مرمى المريخ ـ الانسحاب هو هروبٌ يقصدون تجميله في ثوب الانسحاب، خاصةً إذا وقع ذلك الانسحاب بعد رباعية تاريخية شهدها نهر عطبرة وضحك لها، حتى إنّ بعضهم زعم أنّ فيضان الأتبراوي في هذا الخريف سوف يكون (شربات).
البحر الأحمر كان ينتظر مواجهة الهلال والمريخ حتى يتخلّص من حمرته ويدخل إلى مرحلة (الهداية) فيصير أزرق بسحر روفا والجان وجوباك.
الطريف في انسحاب المريخ من نهائي كأس السودان، هو أنّ الأحمر أثبت فعلياً أنّه (ضُـل) الهلال، حتى في انسحابهم يتمثلون بالهلال ويستشهدون به ـ دعكم من الهلال، أين قرار المريخ وأين موقفه؟ ليس من المنطق في شئ أن تُعلِّل انسحابك من النهائي بالاستشهاد بالهلال.
هل من المنطق أن يكون الهلال هو قُـدوتك حتى في الانسحاب؟ وهو شاهدك ومبرِّرك على الانسحاب!!
عاد الهلال وحاول المريخ أن يعود مثله، لكنه تعذّر عليه ذلك.
وقت ما بتقدروا ترجعوا بتنسحبوا ليه؟ حاجة ما بتقدروا تتراجعوا عنها ما تعملوها.
إنّ فرحتنا بما يحدث للهلال في الفترة الأخيرة كبيرةٌ ـ رغم جِـراحات البلد، فها هو الهلال يضمد الجروح.
دوري وكأس في أسبوع.
الدامر وبورتسودان.
ميدان ومكتب.
لقد أحكم الهلال قبضته على كل البطولات، حتى إنّـه منذ العام 2020م لم يُتوّج المريخ بلقب محلي إلّا ما حدث في مباراة غير رسمية (80 دقيقة) ومن جهة غير رسمية (حميدتي) عندما توّج المريخ في الجنينة في مباراة غير قانونية بكأس السلام ـ غير ذلك أو حتى به، فإنّ المريخ ظل لأكثر من خمس سنوات بعيداً عن منصات التتويج المحلية، داخل البلاد وخارجها.
الهلال حقّق حوالي سبع ألقاب، (4) دوري ممتاز، (2) كأس السودان والدوري الموريتاني كبطل شرفي له.. في حين غاب المريخ تماماً، هُـزم في الملعب تارات، وانسحب من الملعب تارات أخرى، وليس له من كل ذلك غير المركز السادس في الدوري الموريتاني وعدد من (الوصافات) التي لا حدود لها في الدوري والكأس.
في ظرف سنة وشهر، ونحنُ في هذه الحرب اللعينة، حقّق الهلال الدوري مرتين، في دار السلام مرة وفي الدامر مرة، وحقّق كأس السودان في بورتسودان، وفاز بالدوري الموريتاني في أراضي الشناقيط الطيبة.
في يوم الأحد 30 يونيو 2024 انسحب المريخ من الملعب أمام الهلال في دار السلام وقبل أن نكمل عاماً وشهر من ذلك التاريخ، حقّق الهلال الدوري الموريتاني عندما تُـوِّج فيه كبطل شرفي، ثم جاء الهلال وفاز بدوري النخبة التي أُقيمت مبارياته في عطبرة والدامر وبربر، ثم فاز الهلال بكأس السودان في بورتسودان بعد انسحاب المريخ، مكرراً ما حدث في دار السلام.
كل تلك الألقاب تحقّقت في ظرف سنة وشهر، فماذا بعد ذلك؟ إنه تاريخٌ يجب أن يُكْتَــب بماء الذّهــب.
أن تفوز بدوريين مختلفين في بلدين مختلفين في نفس الموسم، هذا أمرٌ لم يُحقِّقه في العالم إلّا الهلال.
أن تفوز بالدوري عندنا وهو يُنظّم خارج البلاد، وتفوز به عندما يُنظّم في الولايات، هذا تاريخٌ يُحقِّقه الهلال وحده.
أن تغالب كل الصِّعَـاب وتتجاوز كل الظروف والبلاد تعيش أوضاعاً صعبة، فتحقِّق في الحرب ما يعجز تحقيقه الآخرون في السلم.
مثل هذه الأحداث وتلك التواريخ، يمكن أن لا تتحقّق مرةً ثانيةً، لذلك تبقى ألقاب الهلال فيها إنجازات ستظل مُتفرِّدة في التاريخ، ليس تاريخ الهلال وحده، بل تاريخ كل الأندية.
لقد استطاع الهلال أن يُحقِّق في ظروف الحرب تلك، ما يجعلنا عندما نذكر هذه الحرب نذكر بعض الإشراقات، ونجد فيها بعض ما يثبت عظمة الهلال وتفــرُّده.
شُكراً والحمد لله على نعمة الهلال.
دوري وكأس.
شرفي ورسمي.
ميدان ومكتب.
داخل البلاد وخارجها.
الدامر وبورتسودان.
كل شئ يبدو أزرق حتى البحر الأحمر.
….
متاريس
ينتظر الهلال الكثير في الموسم الجديد.. المسؤولية أصبحت كبيرة، لذلك على مجلس الهلال أن ينجز تسجيلات قوية، حتى يحقق نجاحات أفضل في الموسم الجديد.
عودة عماد الصيني أكبر مكسب.. الصيني لاعب وسط بمواصفات توجد فقط عنده.
أتمنى عودة سليمان عز الله وأمجد قلق.
أهم حاجة عندي وبعتبرها خطاً أحمر ـ استمرارية كوليبالي.
إذا فرّط الهلال في كوليبالي، يبقى مافي أي فائدة.
محمد حلفا يستحق أن يجد منا الإشادة بعد انتقاداتنا له، سوف أكتب عنه في (فاطي سطر).
ما عندنا مشكلة مع زول ـ عندنا مشكلة في بعض القرارات والتصرُّفات التي تصدر ممن يشغل منصباً عاماً.
البلد رايقَـة، بعد تتويج الهلال دوري وكأس.
الهلال حقّق بطولاته في الميدان والمكتب، في العصر وفي المساء.
تاني شنو؟
الجماعة هربوا من الملعب، مشينا ليهم في المكتب.
أصلو ما في مفر من الهلال.
فقدت البلاد الأستاذ والقامة الإعلامية واحد منارات ام درمان الأستاذ عيسى السراج ، نسأل الله له الرحمة والمغفرة ، والعزاء لأسرته والزملاء موسى السراج ونوح السراج.
….
ترس أخير: النشاط ســوف يتوقّف.. كـدا، ناس المريخ يُمكن لهم أن يتفاصَحُـوا.