دَامَــرَ (المَـذْبُــوح)!!
صَـابِنَّهَـا
محمد عبد الماجد
دَامَــرَ (المَـذْبُــوح)!!
عندما فَـازَ الهلال بالدوري الموريتاني ومَنحُـوه لقباً، صُنع له خِصيصاً (البطل الشرَفي) Made in Nouakchott، تحدّث المريخاب عن أنّ البطولة (شَرَفيّة) وهي لا تخصّـهم في شَـئٍ، رغم أنّ هذه البطولة الشّـرَفيّة المريخ جاب ليها أربعة أجهزة فنية، منها ثلاثة كانت (أجنبية) بالكامل، وسجّلوا لها خلال الموسم أكثر من (16) محترفاً أجنبياً، منهم من رحل بعد الوصول معه لتسوية، ومنهم مَـن ينتظر استحقاقاته.
وهنالك مديرٌ رياضيٌّ مصريٌّ في المريخ.. أنا ما عارف المدير الرياضي على شنو؟ وعندما تأتي ساعة الحساب بحجزوا المسكين علي جعفر (رهينة)!!
البطولة الشرفية دي يا سادة المريخ قاعد ليها في نواكشوط أكثر من ثمانية أشهر، ومدير الكرة علي جعفر المذكور أعلاه، كان محجوزاً (رهينة) من أجلها في أحد فنادق نواكشوط أكثر من ثلاثة أسابيع بعد نهاية الدوري.
البطولة الشرَفيّة دي فريق المريخ جاء فيها في المركز السادس.
هي شَرفيّة وكمان تجوا في المركز السادس؟
فضيحة السَّـواد!!
أول مرة في حياتي أشوف لي مركز سادس (شَـرَفي).
مركز سادس مُكلِّف جداً.
المريخ جاء في المركز السادس في الدوري الموريتاني عشان هناك مافي محمد حلفا ومافي شكاوى، ولهذا كان الفرق بين الهلال والمريخ 23 نقطة.
غايتو أنا قدر ما صنقعت عشان أشوف الفرق دا ما شفت حاجة.
فلسفياً، أعتقد أن البُعد (اللوجستي) بين الهلال والمريخ أصبح كبيراً، زي الفرق بين المطرة ونقّـاع الزير.
البُعد اللوجستي دا ما بتلقوه في حِتّة تانية ـ ولا تتعبوا تفتِّشوا ليه.
أصبح هنالك بُعدٌ (ضوئي) بين الهلال والمريخ بالسنين!!
فرق الـ23 نقطة دي زي الزول البيجيك عشان يبارك ليك عرسك في سماية ولدك البِكر.
دنيا!!
اتّساع الفارق كان قد جعلهم في المريخ يلجأون للخطة (ي) وهي بعد الخطة (ب) بكتير، لذلك اعتبروا فوز الهلال بالدوري الموريتاني لقباً (شرفيّاً).
سكتنا وما قلنا حاجة.
شَرَفي.. شَرَفي عاد نقول شنو في الحرب دي؟
قلنا ليهم نتلاقى في الدامر ـ كتمناها في قلبنا.
الحساب بجمع.
والأيام دول.
أحسن نمشي نتفاهم هناك في بلدنا.
عاوزين ندردقهم على (الدامر).
ونحن الدامر عندنا ليها مَعَــزّة خاصّـة، دامر المجذوب، وبلد العباقرة (عبد الله الطيب ومحمد المهدي المجذوب والطيب محمد الطيب والسر أحمد قدور وعكير الدامر)، حتى الأعزاء مصعب الصاوي وشقيقه معتصم المخرج الصحفي الرائع والطيب الصديق، ونحن في مثل هذه الأمكنة التاريخية، دائماً نكون في الموعد.
ودائماً نحنُ نحمل الحنين لتلك البقعة المباركة.
مع خالص الود والاحترام والتقدير.
أم درمان والدامر وبربر وعطبرة، ما فارقة عندنا كتير.
التاريخ يقول كلمته.
إنتوا عارفين، ودي معلومة أكيدة، نار المجاذيب ما بتلد الرماد، إنّها بلد الخلاوي والتبروقة والناس الصالحين.
أنا كنت فاكر شغل (جان) ما ح يمشي في دامر المجذوب.
جان طلع مبروك.
جان طلع بركة.
دامر المجذوب، تحوّلت بفعل فاعل إلى دامر المَـذبوح.
الحصل شنو ما عارف؟
الحاجة الوحيدة التي أستطيع أن أؤكِّدها لكم، أنا شفت مدافعي المريخ مُجدّعين في خط 18 زي الحمام.
طبنجة دا مرة يبدو طبنجة ومرة يبدو مطوة.. ومرات لا طبنجة لا مطوة.. مرة يبدو مطرق ساكت!!
وعلي بن رضا مرة يبقى لي جمال حسن سعيد (شعيرية)، ومرة يبقى لي محمد المهدي الفادني (مكرونة).
ومرات يبقى (عصيدة).
يبقى ربيع طه عديل كدا.
قبل ما نصل للأربعة، فكّرنا وقعدنا في الواطة، عشان ما نديهم فرقة للهروب (الكابو) المحسن أو الانسحاب (الزيكو) الجاري، مُتعَـوِّدة دائماً ـ قلنا ليهم نحن دوري النخبة دا ح نلعب فيه بالوطنيين، قلنا ليهم ما عندنا غرض كبير باللقب سوف نلعب بالوطنيين، وقد فعل الهلال ذلك ولعب أول أربع مباريات في النخبة بدون عناصره الأجنبية.
عملنا كدا ليه؟
نظام ما شغّالين بالمنافسة، ولا عندنا بيها قضية.
عشان يشعروا بالثقة، والطمأنينة، نحن عارفين لو سمعوا أو شموا ليهم خبر ساكت عن (جان كلود) ما بلعبوا.
جان كلود في المريخ بعمل شلل ارتعاشي ـ باكات المريخ من (جان) كلود بقوا زي الزول الشايل أوراق الفحص وطالع من دكتور ونازل على دكتور.
زي الطلاب البشيلوا دفتر العيادة مع الامتحانات.
باكاتكم بقوا زي الفول الما مصلح.
زي الملاح بدون بصل.
هيثم كابو قاعد ـ كابو وقت ما لقى ليه فرصة للانسحاب من الممتاز، انسحب من كأس السودان.
وعشان نمنحهم الأمان أكتر، ويطمعوا في البطولة ويشيلوا فكرة الانسحاب من رأسهم نهائي، إتعادلنا مع الأهلي مدني واتغلبنا من الأمل وإتعادلنا مرة أخرى مع حي الوادي.
لازم نشرك ليهم بالطريقة دي.
عاوزين نشعرهم بالطمأنينة.
والاتحاد بي هناك ما قصّر معاهم، لجنة محمد حلفا تشيل وتدفر في (الزعيم)، أنا أول مرة أشوف لي زعيم شغّال بالدفرة.
أول مرة أشوف لي زعيم في المركز السادس.
أول مرة أشوف لي (صفوة) عطّلوا اللائحة عشان يشاركوا في الأبطال.
الاتحاد اعتبرهم فائزين على مريخ الأبيض الذي تعادلوا معه، ومنحهم ثلاث نقاط، وعشان الظروف ما معروفة، والدنيا حرب، منحهم الاتحاد مع النقاط ثلاث أهدافاً، عشان المنافسة يمكن تُحسم بالأهداف.
الاتحاد عمل ليهم كل الاحتياطات لدرجة أنه عطّل لهم لائحة المنافسة.
الكونفدرالية منكورة.
ونحن قاعدين، ولا قلنا حاجة، بنلعب بي محمد مدني ومازن سيمبو وأحمد كنن وياسر جوباك وعلي كبه وخيري سليمان والعثيمين.
وكل دا عشان شنو؟
عشان ما ينسحبوا.
عشان نديهم الثقة.
يقولوا ليكم الكلام ألف مرة، عارفنهم ما بنستروا في (الحرب) دي.
جان كلود ظهر في بورتسودان ـ الصف التاني (حسب تعريف النمير) إتململ.. المسك ركبتهُ والقعد يشكي من المصران، والقال عنده لفة رأس، والطلع في رأس البيت.. والمشى يقلع ضرسه.
جان كلود وصل الدامر ـ تعال شوف الثكليبة.
الوقع في الشارع ـ والقعد يتكلم برّه من رأسه ـ والقرر يطلع من البلد ـ والطالب بفسخ عقده.
الحالة بقت صعبة، الوضع بقي خطير ـ علي جعفر قال من الحالة دي أخير لي أكون (محجوز) في نواكشوط.
جان في الدامر ـ شوف عيني شجر النيم جاب ليه (نبق)، وبطيخ الدامر عمل ليه (شــوك).
وطلب الفول معاه سمكة زيادة في سوق الدامر.
وشاي اللبن بالكباية الكبيرة.
جان في الدامر ـ امتحان الكيمياء في امتحانات الشهادة السودانية جابوه (نار).
جان في الدامر.
قالوا لي طبنجة يا زول أثبت، إنت أحسن زول في التيم.
وطبنجة النوم طار من رأسه!!
ورمضان عجب قال عاوز يتقدّم، قال ما بيلعب باك.
ومصعب مكين قال أنا لا مصعب ولا مكين.
وشوقي غريب قال ليهم الزول دا ما عنده حل.. قالوا ليه زول شنو؟ دا (جان) عديل كدا، لو كان (زول) كان مقدور عليه.
المساكين ما عارفين في (مارد) جديد اسمه روفا.
روفا دا قالوا بروّب الموية ـ وبمسك الموية في الغربال، وقالوا كمان بحوّل (الفاول) قوون، ولو كان من منتصف الملعب.
الجماعة وقت شافوا الهلال سجّل خمسة أهداف في مريخ الأبيض، هبشوا رأسهم ـ أو بلـــوه عديل كدا، وبيني وبينكم (جان) أصلو ما طمّنهم.
طمّم بطنهم.
جان كلود اشتغل ليك سواطة في دفاع مريخ الأبيض لمن أنا الما عندي علاقة بالموضوع شلت هَـم طبنجة ومصعب مكين وعلي رضا.
يبدو كدا والله أعلم، إنهم فكّـروا في الانسحاب.
فكّـروا في الهروب.
يا زول (جان) دا ما جان نصاح.
نحن عشان ناس شفوت قلنا نطمئنهم.
تفتكروا عملنا شنو؟
رتّبنا ليهم الأوضاع ـ قلنا ليهم الهلال ح يلعب أمام المريخ بفرصة واحدة.
المريخ دخل لمواجهة الهلال وهو يتقدم على الهلال بثلاث نقاط.
وقبل ذلك، كان الأهلي مدني عنده فرصة لحسم اللقب.
الهلال يلعب آخر جولة في النخبة وهو في المركز الثالث.
المريخ أي فوز يكسب البطولة، أي تعادل يكسب.
والهلال يلعب بفرصة واحدة في الحرب دي.
نعمل ليهم شنو؟
عملنا أي حاجة عشان ما يهربوا.
نهينا علاقة فلوران بالهلال.
منحنا الأجانب إجازة مفتوحة.
إتعادلنا مع الأهلي مدني.
اتغلبنا عديل من الأمل.
إتعادلنا تاني مع حي الوادي.
وهدّدونا بالمشاركة في الكونفدرالية.
الجماعة ديل ما عارفين في الهلال في لاعب اسمه (روفا) ساحر.
وفي جان.
وفي غربال.
والهلال بعد الحرب بفتِّش للمريخ فتّيش.
مشينا ليهم في دار السلام ـ انسحبوا من الملعب.
عملنا ليهم سيكافا مخصوص قالوا ما بلعبوا.
شركنا ليهم في موريتانيا، في أول مباراة فزنا عليهم بهدفين.
في المباراة الثانية خسرنا بهدف والهلال يلعب أمام المريخ منذ الشوط الأول بتسعة لاعبين!!
في نواكشوط جان عمل أي حاجة.
قلنا نمشي بلدنا ـ الفضيحة والسترة مُتباريات.
طبنجة جاب لينا الكلام في نواكشوط.
المريخاب خوفاً من جان كلود قالوا ما بيلعبوا في موريتانيا الدوري السوداني.
وقالوا ما بيلعبوا الدوري السوداني في ليبيا.
وقالوا ما بيلعبوا الدوري السوداني في جنوب السودان.
وقالوا ما بيلعبوا الدوري السوداني في إريتريا.
وقالوا ما بيلعبوا الدوري السوداني في تنزانيا.
قالوا ما بيلعبوا الدوري السوداني إلا في السودان.
السودان لا غير.
أعتقدوا أنّ الفرصة الأمثل لهم هو أن يلعبوا في السودان ـ لأنّ أجانب الهلال لن يحضروا.
قلنا ليهم (الدامر) ما بيناتنا.
بس (الذبح) في الدامر ح يكون من عصراً بدري.
وناس روفا ديل عندهم جن، يمكن بسلخوا قبل الذبح.
وعشان ما يشعروا بي حاجة.. إتعادلنا مرتين في دوري النخبة، واتهزمنا مرة.
ودخلنا المباراة في الحرب دي بي فرصة واحدة.
تاني نعمل ليكم أكتر من كدا شنو؟
وعشان ما يقولوا لينا (لقب شرفي)، أو يقعدوا ينظِّروا لينا، قلنا أحسن نحسمها بالمواجهات المباشرة مع المريخ، وبالأهداف مع الأهلي مدني، عشان ما يلقوا ليهم طريقة.
اشتغلنا معاهم شغل عالي.
شغل بي نظام.
شلنا فارق النقاط نهائي من الحسبة.. عشان شنو؟
عشان ما يقولوا لينا شرفي.
وجعلنا ثلاثة أندية متساوية في النقاط وإن كان المريخ تاميها (شكاوى)!!
الهلال 14 نقطة.
الأهلي مدني 14 نقطة.
المريخ 14 نقطة.
تغلّبنا على الأهلي مدني بالأهداف، لأن المواجهة المباشرة بين الهلال والأهلي مدني انتهت بالتعادل.
تغلّبنا على المريخ بالمواجهة المباشرة وذلك بتحقيق الفوز عليـــه 4 / صفر.
شفتوا النظام دا كيف؟
تاني في زول بقدر يقول حاجة؟
في زول بقدر بقول شرفي أو ما شرفي؟
بالنقاط الفارق بين الهلال والمريخ في الدوري الموريتاني 23 نقطة.
بالمواجهات المباشرة الهلال فائز 4 / صفر على المريخ.
بالأهداف، صافي أهداف الهلال 11 هدفاً، بينما صافي أهداف الأهلي مدني 6.
أعمل ليكم شنو أكتر من كدا؟
دا شغل (ضبح) عديل.
العاوز الضبح ضبحناه.
والعاوز النحر نحرناه.
أكتر من كدا نعمل ليكم شنو؟
…
متاريس
واضحٌ أنّ المريخ لا عنده صف أول، ولا صف تاني، ولا صف ثالث.
النمير ما غلطان.
أربعة في الدامر، ممكن تبقى ستة في بورتسودان.
كلّمناكم، عشان ما تعملوا فيها ما عارفين.
محمد حلفا، يجري جري الوحوش، غير الوصافة ما بتحوش.
لو عارفين الهلال بفوز بالنخبة، كانوا لغوا المنافسة وقالوا الحرب.
الدامر أصبحت أجمل ذكرى في تاريخ الهلال.
عقبال بورتسودان.
أكثر اثنين عملوا في ظروف صعبة وقاسية وأثبتوا جدارتهما هما المدير الفني للهلال خالد بخيت ومدير الكرة عبد المهيمن الأمين، بخيت والأمين يستحقّــان التقدير والاحترام، بل يستحقّــان التكريم.
أكثر اثنين تعرّضا للنقد والهجوم والتنمُّر ووجدهما الهلال عندما احتاجهما هما فارس عبد الله وعلي أبوعشرين.
أكبر مكاسب الهلال في البطولة، بل مكاسب السودان الثنائي مازن سيمبو وياسر جوباك.
أكثر اثنين كانا الأحق بنجومية المنافسة كلها هما عبد الرؤوف يعقوب (روفا)، وصلاح عادل، ويمكن إضافة بوغبا لهما.
هدف روفا الرابع هو الأجمل في البطولة.
خالد بخيت صرّح للصفحة الرسمية للهلال بكلمات قوية، أثبت من خلالها أنه فعلاً معلم، خالد قال إنّ القرار قرار الهلال، وإنّ الهلال عندما قرر أن يكون الأول كان الأول ـ دا كلام كبير، ما بقوله إلا فيلسوف.. مبروك يا خالد على هذا الكلام الكبير والجميل، مبروك قبل البطولة، على هذا الوعي.
فعلاً القرار في يد الهلال.
سوف أعود لاحقاً للكتابة عن بعض الأسماء إنصافاً لها.
التفريط في جان كلود كان سوف يكون كارثة حتى لو كان بديله مبابي، وهذا طبعاً ليس تقليلاً من مبابي، ولكن إيماناً في أنّه لن يستطيع التأقلم كما تأقلم جان كلود مع الهلال.
الكارثة الأكبر ـ يمكن أن تكون في التفريط في كوليبالي.
حتى الآن ومع كل الذي يفعله جان كلود ـ قناعتي بكوليبالي أكبر ـ ولو أدخل كوليبالي للهلال في هذا الموسم ثلاثة ملايين دولار، الهلال هو الخسران.
جان كلود وكوليبالي وإيمي وأحمد سالم مبارك يجب على مجلس الهلال أن لا يُفرِّط في أي اسم منهم.
حافظوا على هذه الأسماء، وأضيفوا لها، أما إذا فرّطوا في أي اسم فإنّ أي إضافة لا جدوي منها.
قلنا ليكم.
وبراكم شفتوا الفرق.
قرار لعب نهائي كأس السودان قرارٌ حميدٌ.
نحن ضد الانسحاب في كل الأحوال.
ننتظر قمة أخرى في بورتسودان.
جان في البورت.
انتهى الكلام.
لسه في التحليل الفلسفي للمباراة، وفي حاجات تانية يمكن أن تكون قبل ذلك.
شكراً للغربال.
أقول ليكم حاجة ـ يا مريخاب ما تزعلوا ، الاربعة دي اربعة (شرفية) ساكت.
وقت الشرفي ما فارق معاكم ، اعتبروها (شرفية) ، ونحن ح نحاول نقنع الغربال بالكلام دا.
…
ترس أخير: أعتقـد كـدا، إنّ الفرحَـة أصلها أزرق.