(ركشة) سيف تيري حدها قريب لا بتقطع الكبري ولا بتصل المجموعات!!
صابنها
محمد عبدالماجد
(ركشة) سيف تيري حدها قريب لا بتقطع الكبري ولا بتصل المجموعات!!
• لا اعتراض على ان يستقبل ملعب الهلال كل المباريات القارية والدولة للمنتخبات والأندية السودانية كافة.
• الواجب الوطني يحتم ذلك على نادي الحركة الوطنية.
• انتوا فاكرين (الوطنية) دي لعب؟
• فاكرنها شعارات ساكت؟
• انقذ الهلال الاتحاد العام والأندية السودانية كافة من الحرمان من لعب مباريات المنافسات الافريقية في السودان بعد ان استقبل استاد الهلال مباراة المنتخب السوداني مع نظيره الغاني في تصفيات الامم الافريقية.
• وجاء استاد الهلال واستقبل من المرحلة التمهيدية مباريات الهلال والمريخ والأمل في المنافسات الافريقية.
• وملعب الهلال سوف يستقبل أيضا مباريات فريق هلال الابيض في بطولة الكونفدرالية.
• الهلال والمريخ الاقرب للوصول لمرحلة المجموعات وهذا يعني ان استاد الهلال سوف يستقبل (6) مباريات للهلال والمريخ في مرحلة المجموعات.
• هذا امر يحتاج الى ترتيب وتجهيزات اخرى – وإلّا حرم الهلال من ان يلعب في ملعبه ، خاصة ان مرحلة المجموعات تدقيق (الكاف) وحرصه على جودة الملاعب سوف تكون اكبر.
• اذا كان الكاف في (التمهيدي) بعمل فينا كدا – في المجموعات يعملوا فينا شنو؟
• على الطاهر يونس ونزار عوض مالك وعبدالمهيمن الامين الانتباه لهذا الامر – لأن استاد الهلال بسبب ضغط المباريات اضحت مميزاته تتراجع بصورة كبيرة في الفترة الاخيرة.
• الامر الذي يجب ان يخضع للدراسة ان عدد المباريات في استاد الهلال يمكن ان يرتفع العدد فيها ويصل الى 8 مباريات اذا تأهل هلال الابيض والأمل عطبرة لمرحلة المجموعات في البطولة الكونفدرالية. اذ يعني تأهل هلال الابيض والامل عطبرة باذن الله من دور الـ 32 ان يلعبا دور الترضية مع الاندية الساقطة من دوري ابطال افريقيا وهذا ما سيرفع العدد الى (8) مباريات ليكون مجموع المباريات حتى مرحلة المجموعات في الابطال والكونفدرالية (14) مباراة.
• هذا طبعا بعد تأهل الرباعي السوداني للمجموعات باذن الله وتوفيقه.
• علما ان كل هذه المباريات تعطي الاندية الخارجية التى سوف تلعب في استاد الهلال الحق في ان يكون التمرين الاخير للمباراة في ملعب المباراة ، ليشغل الهلال بالمنافسات الافريقية 28 مرة.
• 14 مباراة زايد 14 تمرين قبل المباراة لكل الاندية الافريقية التى سوف تلعب امام الاندية السودانية في ملعب الهلال.
• اضف الى ذلك ان المنتخب السوداني سوف يلعب امام منتخب جنوب افريقيا في مارس القادم ليرتفع عدد شواغل استاد الهلال الى (30) مرة ، بما في ذلك مباراة السودان امام جنوب افريقيا اضافة الى التمرين الاخير لمنتخب جنوب افريقيا على نجيل استاد الهلال.
• النجيلة تتقطع!!
• حرام عليكم.
• بعد هذه الحسبة (الافريقية) هل يمكن ان يرهق استاد الهلال ونجيله كل ذلك الارهاق بمباريات الدوري الممتاز ليستقبل الهلال مباريات الدوري عصرا ومساء.
• هذا تعريض رسمي لنجيل استاد الهلال الى (التهلكة) ، وهو ما يمكن ان يحرم الهلال نفسه من اقامة مبارياته الافريقية على ملعبه لأن كل هذه المباريات على ملعب الهلال (الجوهرة الزرقاء) سوف تحول الاستاد الى خرابة ، وقد تصبح نجيلة استاد الهلال مجرد ذكرى للنجيلة.
• ويمكن ان نقول بعد ذلك هنا كان يوجد ملعب استاد الهلال.
• كان يفترض من اتحاد الكرة ان يحرص على المحافظة على (الجوهرة الزرقاء) ، لأن تلف النجيل او عدم صلاحية الاستاد لاستقبال المباريات القارية سوف يحرم السودان كله من اللعب داخل السودان وليس الهلال وحده.
• بنرحب بفريق المريخ في استاد الهلال في البطولة الافريقية بـ (ركشاته) وقد وحقق الاحمر نتائج جيدة كانت غائبة عنه حتى في استاد المريخ ، لكن هذا لا يمنح اتحاد الكرة وفريق المريخ الحق ان تبرمج مباريات المريخ في الدوري الممتاز في ملعب الهلال.
• خلاص عاوزين تعملوها شغلة.
• اخوك لو بقى ليك (نجيلة) ما تدردق فيها.
• هذا الامر سوف يجعل استاد الهلال يفقد خاصيته ، لأن استاد الهلال اصبح ملعبا للمريخ حتى في مباريات الدوري الممتاز.
• ما اراهن عليه ان مباراة القمة في الدوري الممتاز بعد كل هذا سوف تنقل من ملعب الهلال لتلعب في استاد الخرطوم الذي لا يلعب فيه الهلال ولا يلعب فيه المريخ ايضا بسبب عدم الصلاحية.
• المريخ وجد الحكاية ماشه معاه (باسطة) وهو يترك ملعبه ويهمله بهذه الصورة ويحول كل مبارياته لتلعب في استاد الهلال بما في ذلك مباريات المريخ (المحلية) في الدوري الممتاز.
• الناس ديل تاني ما برجعوا تاني لأراضي (التمهيدي) حقكم.
• لا اعتراض في استقبال ملعب الهلال لمباريات المريخ (الافريقية) ، هذا واجب على هلال السودان، لكن ليس هناك مبررا لأن يستقبل ملعب الهلال مباريات المريخ (المحلية) خاصة ان المريخ اعلامه ولاعبوه ظلوا يشكوا من استاد الهلال ويتحدثوا عن (حفرة) تسببت في اصابة نجم المريخ احمد التش.
• هل بعد تلك (الحفرة) يستقبل ملعب الهلال مباريات المريخ (المحلية)؟
• الاخطر من هذا ان استقبال (الجوهرة الزرقاء) لكل هذا العدد من المباريات سوف يجعل ملعب الهلال غير صالح لاستقبال المباريات الافريقية نفسها.
• بل يمكن ان يكون ذلك سببا في ان لا يجد الهلال الفرصة للتمرين على ملعبه بعد ضغط المباريات على نجيل الاستاد.
• كما جاء في صحيفة ريمونتادا امس فان الهلال قبل مباراة الهلال الافريقية امام الاشانتي سوف يستقبل (8) مباريات في الجولتين الاولي والثانية للممتاز.
• 8 مباريات مع الكورونا دي!!
• اكثر من 1500 دقيقة من الركض على ارضية الجوهرة الزرقاء قبل مواجهة الهلال والاشانتي.
• وهناك تمرين لمنافس الهلال في البطولة الافريقية ومنافس هلال الابيض في الكونفدرالية على ارضية الجوهرة الزرقاء.
• ماذا سوف يتبقى بعد ذلك من نجيل استاد الهلال والتى اضحت في صورة من الغوش والغبش في الجولات الاخيرة.
• الناس ديل عاوزين يحولوا ملعب الهلال الى (سوق القش) فعلا.
• نجيلة استاد الهلال سوف تصبح (قش).
• ارحموا نجيل استاد الهلال وحافظوا عليها من اجل الوطن لا من اجل الهلال حتى لا يحرم السودان من ان تلعب منتخباتها وأنديته في العاصمة السودانية.
• فريق المريخ حول لنا ملعب الهلال الى موقف (ركشات) في البطولة الافريقية ، ولا اعرف ماذا يريد ان يفعل المريخ واتحاد الكرة بملعب الهلال في بطولة الدوري الممتاز؟
• سيف تيري فعلها على طريقة بكري المدينة من قبل من اجل (الاعلان) فقط لماركة ركشات وموترات يمتلكها قطب المريخ الخندقاوي.
• السمسرة بقت تظهر حتى في الاقوان.
• هذه الحركات ما تعملوها لينا في استاد الهلال – بتخربوا لينا طبع (النجيلة).
• نذكر ان ملعب الهلال هذا كان اعلام المريخ يطلق عليه اسم (سوق القش) وكان يسخر منه ليتجاوز المريخ فيه مرحلة (التمهيدي) بعد الخروج من هذه المرحلة لمدة ثلاثة مواسم تواليا.
• والمريخ الآن قريبا من الوصول لمرحلة المجموعات بعد الانتصار الكبير الذي حققه على فريق انيمبا النيجيري في استاد الهلال.
• دعونا من بعد هذا العدد الكبير للمباريات على ملعب استاد الهلال نقول من يفعل ذلك بأرضية الجوهرة الزرقاء؟
• نجيل استاد الهلال لو كان يتكلم لقال ان ما يفعله الفاتح باني في ارضية الملعب لا تفعله حتى (الدولة العميقة).
• هذا استنزاف.
• هذا اتلاف مع سبق الاصرار والترصد لنجيل ارضية الجوهرة الزرقاء.
• ارحموا نجيل استاد الهلال.
• لا اعرف اين سوف يتمرن الهلال في الايام القادمة؟ – قد يكون الهلال ومع ظروف كورونا مجبور على ان يحول تمارينه لملاعب اخرى غير الملعب الرسمي للهلال.
• مجلس الهلال يجب ان يكون له موقف حفاظا على ملعب استاد الهلال والذي كلف لجنة التطبيع مليارات الجنيه حتى يكون صالحا لاستقبال المباريات الافريقية.
• النجيلة ما بتستحمل الكلام البتعملوا فيه دا.
• …………..
متاريس
• المريخ وصل مرحلة المجموعات عن طريق (التوك توك).
• وعشان تبقوا عارفين (التوك توك) ما بتعدي الكبري.
• يعني حدها قريب.
• ما تفرحوا ساكت.
• القطاع الرياضي في المريخ يجب ان يحسم امر هذه (الاعلانات) التى تستغل اللاعبين عندما يسجلوا هدفا.
• الخندقاوي حتى في الهدف وفي عرق اللاعبين عاوز يعلن عن بضاعته.
• لكن في النهاية ابقوا عارفين (التوك توك) حدها قريب.
• اول رجل مرور في البطولة يقابلكم ح يشيل منكم اللوحات.
• كلمناكم.
• وابقوا عارفين.
• الركشة حدها قريب.
• ………
• ترس اخير : ابتسم انت في استاد الهلال…انتصر انت في استاد الهلال!!
أستغرب كيف يتم منحك انت وأمثالك تصريح ممارسة الكتابة الصحفية وعضوية الصحافة ؟؟!
عجبي !!!!
للاسف هذا حال الصحافه الهلاليه ما لقيت ماده تكتب فيها غير استاد الهلال والتفاخر
شنو البحصل ده واحديكتب عن الفانله الصفراء وواحد الاستاد وواحد زوجات الصحفين وواحد الرشاوي واخرين يتملقو الكرسي
حليل فطوم وقت كانت قاعده الشله دي كلها مدسوسه خوفا من اللسته وكل شخص قدامه رقم
انتو ما فرحانين بالسوباط لكن فرحانين بذهاب فطوم .. ولكن ان ذهبت فطوم فالدفتر موجود
صحافه فارغه وفكر خالي من الموضوع وتفاهة اسلوب وانحطاط مستوي
صدقت يا ود عبد الماجد، ينبغي ألا يستباح ملعب الهلال بهذه الطريقة المهلكة، وإلا سوف تجد كل الفرق السودانية نفسها تلعب خارج السودان عما قريب، وكان على الدلاقين أصلا هم مطاريد وما عندهم قشة مرة وممكن يلعبوا في روابط الناشئين، وهم بصراحة حسودين وحاقدين ونفسهم ومني عينهم ملعب الجوهرة يتنسف لأنهم زعلانين منه من زمان، عشان كدة كل يومين تلاتة جارين عليهو ويجيبوا مواسيرهم يعنفطوا فيهو……..
أطردوا الدلاقين وخليهم يمشوا يلعبوا في إستاد الخرطوم ولا الأبيض، قليلين أدب وعينهم قوية ولحدي يوم الليلة بيشتموا في سيدهم الهلال ……..
المرخرخ ما فيهو حسنة 😬😬😬