زعلان مع إنو الباقي دقيقة!!
بالعربي الكسيح
محمد الطيب الأمين
زعلان مع إنو الباقي دقيقة!!
* قبل إنتشار صالات الأفراح والاعراس المُعلبة والافراح المغلقة كانت الأحياء تعج بالطرب والزغاريد و(الغبار) .
* لو داير تعرف (الحفلة) جميلة ولا ما جميلة تعاين للسماء .
* لو في غبار معناها الحفلة رابة ، ما في غبار معناها الحفلة أي كلام .
* الفنان كنا بنقيمو من غبارو .
* والله صحي .
* لو في حفلتك ما قام غبار معناها أنت فنان وهمي .
* الغبار أهم من العشاء .
* في بنات بجوا الحفلة بعد الناس تتملي غبار .
* عادة الفاصل الأول ما بكون فيهو غبار لأنو الأغاني بتكون رايقة .
* الغبار بيجي من الفاصل التالت وانت ماشي .
* بتذكر في حلتنا كان عندنا تلاتة بنات في غاية الجمال ، البنات التلاتة ديل أي حفلة بيجن في الأغنية قبل الأخيرة.
* بيجن بعد نحن ملامحنا تتغير من الغبار .
* بنات يشهنك (إعادة الحفلة) .
* أو يخلنك تتمنى الحفلة ما تنتهي .
* في مستوى من الجمال بيخليك تتمنى إنو الحفلة ما تنتهي.
* وبما أن ذلك كذلك فإن احساسنا مع مباريات الهلال أصبح يشبه إحساسنا بالحفلة المحضورة والغبارها فوق .
* إحساس إنك تعاين للزمن تلقى المباراة في الدقيقة (٨٩) وأنت غالب خارج الأرض ومع ذلك تزعل لأن (الباقي دقيقة) .
* تتمنى لو المباراة ما تخلص .
* مثل هذا الإحساس اتحرمنا منه زمن طويل .
* ولكن بحمد لله أمبارح راودنا هذا الإحساس.
* عندما رفع الحكم الرابع الزمن بدل الضائع (٦) دقايق تمنيت لو أنه رفع (١٦) دقيقة.
* وهذا الإحساس لم يأت من فراغ .
* الهلال يقدم نفسه في هذه النسخة بشكل مختلف .
* يقدم نفسه والغبار فوووق .
* وهذا ما أكدته مباراة الأمس .
* أهم ملاحظة ظهرت في لقاء الهلال بالأمس هي (الثقة) .
* الهلال لعب بثقة الكبار رغم أن أكثر من عنصر في التشكيلة تنقصه خبرة المباريات الكبيرة .
* أكثر لاعب تنقصه خبرة المباريات الكبيرة هو محمد أحمد ارنق.
* وقد كان ارنق نجم المباراة .
* بدون سابق خبرة شارك ارنق وقدم مباراة كبيرة أثبتت أن الهلال كسب مدافع قوي ومتمكن وصاحب عقل كبير .
* بدأ الهلال اللقاء وكأنه يلعب بأم درمان .
* ثبات واريحية وشجاعة هجومية ظهرت شكلاً (تلاتة مهاجمين) وظهرت مضمونا (سيل من الهجمات) ومنذ الدقيقة الأولى.
* الشجاعة الهجومية التي استهل بها الهلال اللقاء كانت سبباً في تأخر ظهور الاشانتي بمستواه المعهود .
* الجماعة اتخلعوا .
* فاكرين الهلال ح يعتمد على المرتدات ولكن حدث العكس .
* الهلال كان يبادر ويأتي ب(الفعل) بينما اكتفى الاشانتي ب(رد الفعل) .
* وهذه شخصية متى ما توفرت في أى فريق يستطيع أن يفعل الكثير .
* صحيح أهدر الهلال عديد الفرص المضمونة وعلى رأسها فرصة نزار حامد ولكن في نهاية المطاف كسب الأزرق الجولة وقطع شوطاً مهماً في طريق التأهل للمجموعات.
* الفرصة الثمينة التي أهدرها نزار في الدقائق الأولى أثرت على مستواه بصورة كبيرة بعد ذلك .
* لعب أبو عاقلة مباراة كبيرة وأكدت بيان بالعمل أنه (حجر أساس) في بنيان اي تشكيل للهلال .
* كذلك كان الشغيل في الموعد وكذا عيد مقدم النجم القادم بقوة .
* تحرك الشعلة بإيجابية وثبت مؤيد عابدين اقدامه.
* تميز ارنق في الدفاع اراح اوتارا وكذلك أبو عشرين .
* اجتهد فارس والعين أصابت الغربال .
* فوز مهم أمام فريق كبير .
* حدث هذا برغم أن التشكيلة الأمثل لم يصل لها زوران بعد .
* بإمكان زوران أن يفاجئ الاشانتي بتشكيلة جديدة في لقاء الإياب تؤدي بذات القوة والبسالة.
* من حق جماهير الهلال أن تخلف رجل فوق رجل فهذا فريق يدعو للفخر والرهان .
* ولسه حالتو الانسجام لم يبلغ درجة التناغم .
* شكراً نجوم الهلال الأشاوس ، شكراً الجهاز الفني، شكراً البعثة الإدارية.
* مبروك لجماهير الهلال الوفية هذا الإنتصار الغالي ومبروك هذا الفريق المحترم .
* ملحوظة : (اعتباراً من السنة الجديدة سأقوم بتغيير إسم عمودي هذا لاسم آخر إن شاء الله) .
* ونركب صافنات ونجيبة (هلالابية) واصلو الزول بيموت والذكرى تفضل حية .
* و..و..
* وكل ما تواجه وتنتصر لنصر تاني يجينا شوق .
حلوة منك يا فردتي كنت قايلك بتختلف عن باقي الكتاب الفالصو وتكتب بحياديه لا تخلو من الدعابات لكن دربك فرق معاي طلعت زيك وزي الباقين حرقه وحقد وكمد
عموما مبروك فوز الهلال خارج الديار وبنقولها ليك لانه انت غلبك تقولها طلعت من ناس هوت دوك يا استاذ
تاني زول يجيب سيرة الوطنيه بردمو ردم الجن بالنسبه لي وطني المريخ وما دون ذلك فلول متفلته
دربك فرق معاي وانتظر المعامله بالمثل
مبروووك للهلال وللسودان .. أهم ما في مباراة الأمس :-
1- وضح للجميع أن المدرب زوران صاحب شخصية قوية وفكر تدريبي متقدم
2- وضع الخطة المناسبة وتطبيق طريقة اللعب
3- قلة الأخطاء في التمرير والتمركز وسرعة الأداء والتحول هجوما ودفاعا
4-اللياقة البدنية العالية للاعبين مما ساعدهم في تنفيذ المهام
5- الاستفادة من غياب عامل الأرض والجمهور وأصبحت المباريات دات فهم وطبيعة واحدة ومن الممكن ان تنهزم في أرضك وتفوز خارجها والعكس فاختفت فكرة الخروج باقل الخسائر
ولدنا العجوز صبي الكاهن الأعظم أليخماو أبو المستعار المندلاوي عاوز يتشق من الغيظ، وطبعا فرحته بفوز المرخرخ على أنيميا النيجيري ما بتكتمل إلا بهزيمة الهلال سيد البلد أبزرد مصدر ألمه ووجعه، عشان كدة حايم يتقيأ في أعمدة كتاب الهلال الأماجد ومستكثر عليهم الفرحة ومدح فريقهم، مع إنو الكاهن الأعظم أليخماو وباقي شلته مامصدقين حكاية الخروج من عقبة التمهيدي، وشغالين مدح ووصف خيالي لفوز مواسيرهم على فريق أنيميا 😆😆😆
مووووووت بي غيظك يا أبو المستعار 😝😝😝
المانط عتبة التمهيدي بتخلعة مجموعات الأبطال !!
الجماعة قالوا الليلة شافوا البلوله في نص الكعة الحصلت بين حلة ام صيقعون وحلة ود بندق..قالولك البلوله شايل سكينو وحالف طلاق علا يجيب تار الجنا الكتلوهو في الكورة..دحين يا يلوله انت كان ماك فايق وما عندك شغلة البوديك من الرتينة بقت تمرق في ام صيقعون عشان لعبه فارغه ات اجنا ما عندك شغله تقضاها خليت الحواشات وجيت البندر وبقيت تكتب مع الجنيات في الجرايد اللت الكورة والله اتسقفت يا جنا.