«ستة من ستة»

صَـابِنَّهَا
محمد عبد للماجد

«ستة من ستة»

عندنا (سوّاق) حافلة، لو الحافلة ما قفّلت ما بتحرّك.
وعندنا زول كبير في السِّن شويه.. لو ما لقى ليه شُبّاك فاضي في الحافلة ما بركب.
أعتقد أنّ هذا النظام ـ نظام روسي.
شُبّاك فاضي ومحمود عبد العزيز شغال في الحافلة (يجلي النظر يا صاح)، وقت الحافلة تمر بكوبري النيل الأبيض زي كأنك بتأكل ليك في كاسترد.
الكاسترد زمان كان في عضمو براهو (ثقافة).
الهوا يجيك بارد مع الشُّبّاك.. ما عارف (الهوا البارد) دا كان من النيل أم من محمود عبد العزيز؟
وعندنا (فرّاني) لو ما الطاولة اكتملت ما بيبدأ البيع.
أعتقد أنّ هذا النظام نظام سويسري!!
النظام السويسري في البرد دا بقع ليكم كيف؟
والله ما عارف.
وعندنا قريبنا لمن يشيل (بستلة) اللبن ويمشي يجيب اللبن لو اللبّاني ما ملأ ليه (الرطل) لمن يدفِّق ما بمشي من قِـدّامو.. وكباية الشاي لو ما مشت بي كرعينها ما بمشي عليها.
الكباية تتملي لي ود عينها.
دا نظام أسترالي.
قالوا لمن محمد كرم الله غنى للطيف من كلمات محمد سعيد دفع الله، الطيف بقى أغلى من الحقيقة.. الطيف طلّع ليه أوراق ثبوتية وبقى حايم مع الناس في السوق العربي.
تذكّروا زمان لمن كانن هنالك صينيات بقيفن قدام الجامع الكبير ويكوركن بلغة صينية مُعدّلة (فكس.. فكس.. فكس)، أها الزول البمشي يفتِّش على (الفكس) دا بكون رايح ليه (طيف).
وعندنا ود خالتنا الموبايل لو ما عمل 100% ما بطلِّعو من الشاحن.
دا نظام قاطعو من رأسي.
قولوا للسوّاق وقولوا للفرّاني واللبّاني وود خالتنا ولو في زول تاني ما عندنا مشكلة.. قولوا ليهم عندنا فريق قفّل المجموعة.
بل قفّل المجموعات كلها. بي أهليها وصن داونزها.
في اعتقاد حايم في المدارس أنّ (الإنشاء) ما بتتقفّل.
متل عمود المستشفى ـ قدر ما تحاول تقفِّلو ما بتقفّل ليك.. لازم تكون فيه (طاسة) مفندرة.
عادةً تكون طاسَــة (الرز).
القال كدا منو؟
ما عارف القاعدة دي جات من وين؟
لكن نحن لقيناها كدا.
يا ربي دا أرخميدس بتاع (وجدتها وجدتها)، واللّا علي الجارم بتاع اللغة العربية؟
في حاجات كدا، كانت ثابتة عند الناس كلها، متل العصر عندي مشوار!! ونفسي الليلة في كوارع!! وشاحن الموبايل رايح وما لاقيهو!!
الحاجات دي عند كل زول.
ثوابت كدا.
هسع كلكم تلقاكم فكرتوا في الكوارع.
الهلال قفّل الفيزياء وقفّل الكيمياء والأحياء والرياضيات والإنشاء، وحسن عطية.
الليلة مالي شابك في حسن عطية كدا، زي كأني عاوز أقول حاجة في الحِتّة.
والله ما أقولها.
«ستة من ستة»
أول مرة أفهم ليه الدكتور وقت يلقى نظرك تمام، وما عندك مشكلة بقول ليك «ستة من ستة».
نحن زمان كنا فاكرين نضارة القراية دي (عولمة)، قبل ما العولمة تبقى كدا.
جان كلود يجيب ليه قوون، باسكال في ساحل العاج يتململ.
يا زول مالك.
والله إنت وعلي جعفر مفروض تحمدوا ربكم، لو لعبتوا في زمن جان كلود دا، كان الواحد منكم من الدقيقة التانية برفع إيدو للغيار.
الما عندو ركبة بمسك ركبتو.
تتخيّلوا أنّ الهلال هو الفريق الوحيد في مرحلة المجموعات من بين الـ16 فريقاً يلعب خارج ملعبه، بل خارج وطنه.
نحن وقت نبعد من أم درمان بنبقى زي الزول الرايح ليه (مفتاح).
لمن تدخل أم درمان.. البيت العلى يدك اليمين بيتكم!!
والبيت العلى يدك الشمال بيتكم!!
والبيت القدامك طوّالي بيتكم!!
والبيت الوراك بيتكم!!
عارفين ليه؟
عشان أيِّ بيت في أم درمان بيتكم.
أيِّ بيت.
وقت تسأل زول ساكن وين؟ ما بقول ليك الموردة أو بيت المال أو أبوروف أو أمبدة أو الحارة السادسة.. بقول ليك ساكن أم درمان.
أم درمان تكفي.
أم درمان البيت الكبير.
والهلال الآن بعيد عن أم درمانك.
في زول وقت ينزل في الكوتشينة وقت النزول يكون حكم، ما في زول بعدو بنزل تاني.
ينزل 140.
زي قوون بشّــه زمان ـ فد واحد ـ وقت بشّــه يسجل هدف.. المباراة بتنتهي 1 / صفر.
قفّلنا.
مَـرّة بشّــه سجّل هدف في الحضري ـ عصام الحضري قال لجمال الوالي عاوز لي حوض سباحة في البيت وواحد وعشرين حُقنة ضد التّسمُّم!!
الحُقن عرفناها.. حوض السباحة لي شنو؟!!
الهلال هو الفريق الوحيد من بين الـ16 فريقاً، الذي تعيش بلاده في حالة حرب طاحنة أدّت إلى توقُّف النشاط الرياضي في البلاد، بل أدّت إلى توقُّف الحياة.
يمين الطلقة تقع جنبك متل التاء المربوطة.
والهلال هو الفريق الوحيد الذي يلعب في دوري ما دوريه.. يلعب كضيف، رغم أنّ موريتانيا منحت الهلال دفء الوطن وإلفة الأسرة، وهدير الجماهير، مع أنّه (لا شئ يعدل الوطن).
والهلال يحمل شعار: (الله ـ الوطن ـ الهلال)، الشعار دا دائماً بذكِّرني شجرابي.
والهلال هو الفريق الوحيد من بين الـ16 فريقاً بما فيهم الترجي التونسي وصن داونز الجنوب أفريقي والأهلي المصري ومازيمبي الكونغولي والرجاء المغربي وبيراميدز المصري، الذي حقّق العلامة الكاملة وفاز في الجولتين خارج ملعبه وداخل ملعبه الافتراضي.
برّه وجوّه.
«ستة من ستة» في الحرب د
في ناس شوية برد بتجهجهم.
مطرة بتطلِّعهم من الخدمة.
مرة بسطاوي سجّل في المريخ قالوا (النافورة).
قالوا الكورة دقّت في النافورة!!
سجّل معتز كبير قالوا (الحُفرة).
الكورة غيّرت في الحُفرة.
معتز كبير هدّاف الدوري خمس مرات على التوالي بالاشتراك مع (الحُفرة)!!
حُفرة شنو في الحرب دي؟
ناس بيلعبوا في الحرب وبحقِّقوا العلامة الكاملة.
زمن صلاح إدريس وكلتشي وسيدا وقودوين وبشّـــه ومهند وسادومبا ما حصل كلام زي دا.
زمن داريوكان ويوسف محمد وديمبا وإمبيلي الكلام دا ما حصل.
الهلال، لا لاتحاد الأفريقي، ولا الأهلي المصري، ولا الترجي، ولا مازيمبي قدروا عليه، ولا الحرب.
وعند الفيتوري (دواء) يصلح للقهوة.. يصلح لمشوار العصاري وشارع المدرسة وأنّـة المجروح والشاي باللبن والطحنية بالزبادي.
لم نكن نظن أنّنا في هذه الحرب يُمكن أن نضحك ونشرب شاي اللبن ونخلي الباب مفتوح.
ليس هنالك أفضل من هذا الكلام الذي قرضه الفيتوري:
لم يتركوا لك ما تقول
والشعر صوتك.. حين يغدو الصمت مائدة.. وتنسكب المجاعة في العقول
لم يعرفوك، وأنت توغل عارياً في الكون إلا من بنفسجة الذبول
لم يبصروا عينيك.. كيف تقلبان تراب أزمنة الخمول
لم يسكتوا شفتيك.. ساعة تطبقان على ارتجافات الذهول
لم يشبهوك.. وأنت تُولد مثل عشب الأرض في وجع الفصول
لم يتركوا لك ما تقول.. لم يتركوا لك ما تقول
عشب الأرض في وجع الفصول دي إبداع.
نعم إنّهم لم يتركوا لنا ما نقول، حتى عن حقّنا في التعليق عن هدف جان كلود.
لكن حقّنا في الفرحة محفوظٌ.
لقد منحنا الهلال حق الفيتو في الفرح.
ونحن الفيتو دا ما كنا بنسمع بيه إلا في النشرة العالمية.
النشرة العالمية دي زمان مع (الخنافس) وحسن عطية، كانت قِمّـة الثقافة.
يمين في الحرب دي جبناها (6) نقاط من الشباب ومن مازيمبي.
من كف عفريت.
دي لا الأهلي قدر عليها، ولا صن داونز.
ست نقاط في البرد دا.
بعد كدا الواحد لو وقع فيه صاروخ.. الصاروخ بفهم حاجة.
الهلال سجّل قبل منتصف الشوط الأول عن طريق الغربال.
لبست النضارة وانتظرت الهدف الثاني.
أصلاً أنا ما بفرح إلا في الهدف الثاني.
لكن مازيمبي قبل أن ينتصف الشوط الثاني سجّل هدف التعادل.
نقبِّل وين؟
نقول شنو؟
انتظرت لغاية الدقيقة 92 أدخل وامرق.
لا والله كنت أمرق وادخل.. لأنِّي أصلاً كنت جوّه الغرفة في البرد دا.
طلعت.
رجعت تاني.
وكنت بين الفينة والأخرى بقنع في نفسي أنّ النقطة ما كعبة.
لكن الموضوع ما واقع لي.
خلّيت الكورة.
تابعت حاجة تانية.
رجعت للكورة، هو أنا أصلاً عرفت أمرق منها.
الحكم احتسب خمس دقائق كزمن بدل ضائع.
كوليبالي خرج.
الغربال.
يا رب قوون.
الوقت الرسمي للمباراة انتهى.
والعشم موجود.
جان كلود طلع من وين؟
أكيد في زول فتح الجَــرّة.
قام طلع ليه شنو؟
طلع ليه جان.
الجان قال ليه عاوز شنو؟
قال ليه عاوز قوون.
جان جاب القوون.
جان طيفو طائف.
يا رب تنتهي على كدا.
آخر تلاتة دقائق بقت لي أطول من (العام الدراسي) بي إجازتو الصيفية.
الحكم صفّر على نهاية المباراة.
شكّيت في الموضوع.
يمكن عاوز أأكد الفرحة.
مشيت قناة تانية.. عشان أشوف الخبر في الشريط الإخباري.
شفت الخبر في القناة السعودية.
قلت أحسن أتأكد من قناة العربية.
لقيت خبر انتصار الهلال في شريط العربية الإخباري.
برضو كان عندي شك.
مشيت على الراديو.
قلت أحسن شئ اأسمع الخبر.
الهلال انتصر.
مَـــرَقْتَ.
رَجَــعْتَ.
قلت أنوم، لقيت أحسن أقوم أتأكد تاني من الخبر.
عاوز استمتع بخبر الانتصار.
عاوزين نعيش الفرحة.
الهلال فاز.
الهلال عمل 6 نقاط.
نقفِّل على كدا.
….
متاريس
أعتقد زي ما بقول كل مرة الطيب عبد الرازق عاوز ليه عمود براهو.
ما عاوزين نجربن العمود بكلمة أو جملة أو فقرة.
الطيب عاوز عمود منفصل.
عمود خاص.
تفاجأت بمستوى مازيمبي.
الفريق ما ساهل.
والكبير كبير.
قطعتوا نفسنا.
أهم استراتيجية هي أنّ الهلال أصبح يلعب للفوز.
برّه وجوّه بيلعب للفوز.
بغض النظر عن المنافس.. الهلال بيلعب للانتصار.
وهذا أهم بَند دخل في أجندة مباريات الهلال حديثاً.
على ضوء ذلك، لا بُـدّ من الانتصار على مولودية الجزائري.
جوّه وبرّه.
خاصةً بعد أن أصبح مولودية هو المنافس الرئيسي للهلال في المجموعة.
حسم التأهُّل يجب أن يكون في الجولتين القادمتين.
بل يجب على الهلال أن يحسم صدارة المجموعة.
أهم حاجة هو أن يلعب الهلال من أجل صدارة المجموعة.
«ستة من ستة».
عاوزين «12 من 12».
ما تنقص ولا نقطة.
لو عندك فريق زي الهلال من حَقّـك تطمع.
بل الطمع واجب.
اطمعوا.. الطموح هو ما يحتاجه الهلال في هذا التوقيت.
والطموح عاوز عمل.
والعمل عاوز الصبر.
نرجع ونقول لا بُـدّ من إضافة لاعب أو اثنين على مستوى عالٍ في فترة التسجيلات القادمة.
أسماء معروفة على مستوى القارة مُهِـمٌ إضافتها لكشوفات الفريق، إذا أراد الهلال أن يُنافِس على اللقب.
هذا إلى جانب مواهب وطنيّـة، لا بُـدّ أن تدخل لكشوفات الهلال.
التخطيط والتدبير.. هو طريق النجاح.. وطريق البطولات يمر من هناك.
لاحقاً، نعود إن شاء الله للتحليل (الفلسفي) لمباراة الهلال ومازيمبي.
لافتةٌ رائعةٌ من المريخ تمثلت في زيارة وفد عالي المستوى لمعسكر الهلال.
ديمبا يحتاج إلى تفاصيل أخرى.
شُكْــراً ديمبا.
شُكْــراً المريخ.
…
ترس أخير: في صوت بعيد.