سوداكال .. زي المستأجر لمن يرفض يطلع ليك من بيتك

صابنها

سوداكال .. زي المستأجر لمن يرفض يطلع ليك من بيتك

محمد عبدالماجد

· كتبنا عن رئيس نادي المريخ (المنتخب) آدم سوداكال كثيرا وقلنا ان ما حققه لم يحققه جمال الوالي بميزانية دولة طوال (12) عاما.

· التوفيق حالف ادم سوداكال كثيرا ليدير المريخ من (محبسه) افضل من اشخاص اداروا المريخ من (قصورهم).

· الارقام تقف في صالح ادم سوداكال – لكن هذه الارقام لن تجعلنا نسقط الوضع الذي يعيش فيه المريخ الآن.

· المريخ مع تلك الانتصارات والبطولات التى حققها إلّا انه فقد هيبته وبريقه في عهد آدم سوداكال.

· هذه حقيقة لا يجب ان نغيبها.

· المريخ يعيش اوضاع ماسوية.

· ما نقف عنده هو ان ادم سوداكال بكل تلك الاشكاليات والسلبيات وعدم رغبة اهل المريخ فيه فاز برئاسة نادي المريخ عن طريق (التزكية).

· يعني ما تسمعوا الفصاحة دي والتنظير واللوائح والقوانين التى نسمع بيها من اهل المريخ.

· آدم سوداكال دا وقت نزل انتخابات ما لقى (مريخابي) واحد يقيف قدامو.

· ما في واحد طلع ودق صدرو.

· كلهم عملوا (حمد لبد).

· ما تقعدوا تشرعوا ساكت.

· ادم سوداكال الآن فترته انتهت وبرضو قااااعد كرئيس للمريخ بالقانون.

· وما في زول قادر يقول ليه شيء.

· ما تقعدوا تدوشونا ساكت.

· استمرار ادم سوداكال في رئاسة المريخ ورفضه لكل الاقتراحات وتمسكه بحقه في رئاسة المريخ باعتباره الرئيس الشرعي للمريخ ، ذكرني الزول البكون مستأجر ليه بيت بسعر رخيص ويرفض يطلع من البيت.

· سيد البيت الحقيقي قدر ما يحاول ويمشي المحاكم – الزول المستأجر منو البيت ما بطلع ليه.

· هسع ادم سوداكال بعمل في نفس الشيء.

· رافض يترك رئاسة المريخ.

· بالله شوفوا الدنيا.

· المريخاب كانوا قد رفضوا رئاسة ادم سوداكال للمريخ ، وهو منتخب وبعد قرار المحكمة الادارية والمفوضية التى أيدت رئاسته للمريخ ، الآن وبعد ان انتهت فترة ادم سوداكال وكمّل سنواته كرئيس لنادي المريخ جمعية المريخ العمومية وعضوية النادي الاحمر فشلت في ابعاد سوداكال.

· والله يا جماعة الزول دا ما ساهل.

· المريخاب قالوا عاوزين يسحبوا منه الثقة وفشلوا في ذلك.

· بل فشلوا في ابعاده حتى بعد انتهاء فترة ادم سوداكال كرئيس للمريخ.

· الموضوع الآن ما عاوز ليه سحب ثقة.

· مع ذلك المريخاب فشلوا في ابعاد ادم سوداكال من المريخ.

· مشوا الاتحاد العام.

· اجتماعات.

· ولجان.

· وبرضو فشلوا في ابعاده.

· الفيفا ما بتقدر تشيل آدم سوداكال.

· سوداكال مسيطر.

· شوفوا ليكم (حل) تاني.

· الفصاحة البتعملوها لي شداد …اعملوها لي ادم سوداكال.

· الزول دا سيطر سيطرة تامة على المريخ.

· المريخ تحت السيطرة.

· وعلى ما يبدو كدا – ان ادم سوداكال سوف يستمر رئيسا للمريخ لدورة قادمة.

· الصور التى يظهر فيها سوداكال دي ما صور زول ماشي.

· دي صور زول قاعد تاني 4 سنوات.

· ما معقول سوداكال يدفع في هذه المليارات ويسجل في تمبش وسيف الدمازين ووجدي عوض وكردمان وجمعة واحمد عبدالعظيم ويمشي يخلي ليكم المريخ.

· وما منطقي ولا مقبول …يكون ادم سوداكال بتصور …والقنصل حازم هو البدفع في هذه المليارات.

· قولوا ليكم كلام غير دا.

· على العموم دي قضية المريخ واهله يحلوها بي طريقتهم.

· الذي اريد التحدث عنه الآن هو الاوضاع (الماسوية) التى وصل لها المريخ.

· ما معقول اعداد المريخ يبدأ بي (6) لاعبين فيهم اتنين حرّاس.

· 6 فيهم احمد عبدالعظيم وجمعة جينارو.

· واعداد الهلال وصل الى مراحله الاخيرة ..وبلغ ذروته.

· تمارين الهلال فيها (22) لاعبا …غير (8) يشاركون مع منتخابات بلادهم (7) مع المنتخب السوداني وواحد مع منتخب يوغندا وفي طريق العودة جيسي الذي ابعد اخيرا من منتخب بلاده.

· ازياء وقناة ناقلة للتمارين…و6 في الجهاز الفني.

· شيء صربي برتغالي …وشيء بوسني وشيء توانسة وشيء بشه.

· الهلال ينتظر ان يغادر الى القاهرة …وناس المريخ بفتشوا ليهم في ملعب يتمرنوا فيه.

· العمل في الهلال ماشي زي الساعة ..تسجيلات ومحترفين وترتيبات لاستاد الهلال لاستقبال مباريات المنتخب ومباريات الهلال.

· تسجيلات الهلال تجاوزت 2 مليون دولار.

· وجهاز فني مرتباته في الشهر اكثر من 30 الف دولار..ومحترفين مرتباتهم تقارب من هذا الرقم.

· المريخ اعلن عن نقل مبارياته الافريقية لتلعب في استاد الابيض.

· كمان.

· دا وضع صعب.

· وما بنقبله للمريخ.

· واذا سوداكال عملها (صور) فان هذه الصور غير كافية لإقناع القاعدة المريخية.

· ريشموند محترف المريخ الذي انهى المريخ معه تعاقده قال في تصريحات سابقة : ايام الدوري سوداكال كان بهاتفني يوميا والآن حظر رقمي.

· كل الناس بتشكي من سوداكال في هذه الحتة.

· التعامل بهذه الصورة مرفوض وهو يعكس صورة غير حضارية عن السودان.

· ريشموند قال اعاني في الاكل والشرب والكهرباء وانام على الارض.

· انا ما عارف ناس رمضان عجب ومحمد الرشيد البصبرهم على هذه الاوضاع شنو؟

· رشيموند بعد انهاء التعاقد معه قال ان سوداكال لم يلتزم بالوعد الذي قطعه معه بصرف راتب شهر اكتوبر بعد التنازل عن راتب شهر نوفمبر وديسمبر.

· الوضع للأمانة لا يشبه المريخ.

· قبل ذلك كان الزلفاني قد شكي من سوداكال وفعل نفس الشيء المدرب السوداني محمد موسي وابراهومة الذي شاف الويل في المريخ.

· وامتد الموضوع الى المدربين الاجانب وقال التونسي المسلمي ان سوداكال اسوأ شخصية يقابلها في حياته.

· حقيقة الوضع لا يطاق.

· مدرب المريخ خشارم ومدرب الاحمال موير اللذان حققا مع المريخ بطولة الممتاز في اوضاع صعبة اعادا في حوار مع صحيفة (الصيحة) السودانية كلام المسلمي وقالا لم يقابلوا في حياتهما اسوأ من سوداكال.

· خشارم قال عشنا معاناة غير مسبوقة.

· وقال خشارم عن المريخ لا ملعب ولا معدات ولا ازياء ولا رواتب وسوداكال لا يحترم احد.

· اظن ان الحال في معسكرات اللاجئين افضل من الحال في المريخ.

· حقيقة اعلام المريخ وجمهوره ليهم حق في المطالبة بابعاد سوداكال.

· الحكاية كدا ما بتمشي.

· يمكن تعدي يوم.

· موسم.

· لكن عواقب هذه الاشياء وخيمة.

· التعامل الانساني والاخلاقي اهم من البطولات.

· سوداكال لا يشكي منه اعضاء الجهاز الفني في المريخ او اللاعبين وحدهم …سوداكال يشكي منه حتى اعضاء مجلسه.

· محمد عبدالله عمر قال عن تسجيلات المريخ هي تسجيلات فردية ولم يشاور فيها سوداكال احد.

· سوداكال بجيب اللاعب يتصور معاه.

· قروش ما بستلمها منه.

· يتصور معاه ويفكو.

· المريخ تنتظره معضلة اخرى …وهي توقيع عقود مع رمضان عجب ومحمد الرشيد وبخيت خميس بعد توقيعهم عقود مع الهلال.

· اضافة الى توقيع عقد مع مصعب كردمان بعد ان وقع معه نادي الخرطوم الوطني عقدا.

· المريخاب بفتكروا الموضوع دا بسيط.

· الموضوع دا لو وصل الفيفا …ممكن يجيب خبر المريخ.

· افضل للمريخ ان يبعد من الرشيد وعجب ..لأن اعلان التعاقد معهم سوف يجعل الفيفا تنزل عقوبات قاسية على المريخ.

· الموضوع دا ما لعب.

· ولا الحكاية (مكاواة) ساكت.

· احسن للمريخ يتخارج من الحتة دي.

· بي سوداكال.

· او بدون سوداكال.

· ممكن نشاهد اقسى عقوبة على المريخ.

· لن تتخيلوا العقوبة التى سوف تفرض على المريخ.

· العقلاء في المريخ احسن ليهم يتحركوا.

· ما تقعدوا تكابروا ساكت.

· عقود الهلال نهائية وملزمة وما فيها أي ثغرة.

· حكاية التمديد وكتابة خطاب لفسخ التعاقد مع الهلال دي كلها مواضيع يمكن ان تدين المريخ اكتر.

· تحريض اللاعب على كتابة خطاب يطالب فيه بفسخ تعاقده سوف تدين المريخ وتؤكد تورطه.

· الموضوع دا والله خطير.

· احسن ليكم تتطلعوا منو.

· العنتريات ما بتحلكم.

· الموضوع دا ما بحلو الفاتح باني ولا عامر ولا شداد.

· الموضوع دا عند (الفيفا).

· وملفات المريخ في الفيفا كلها سوداء.

· ….

متاريس

· قرعة الهلال ما كعبة.

· الهلال سوف يلعب في التمهيدي ضد فايبرز الاوغندي ، وحال التأهل سوف يواجه الهلال الفائز من نوذايبو الموريتاني والاشانتي كوتوكو الغاني.

· قرعة ممتازة.

· ما في مشكلة.

· الهلال وصل المجموعات في ظروف اعصب من دي.

· الهلال الآن عنده فريق ممكن يشيل البطولة.

· أي حاجة ظابطة.

· نحن في شوق كبير لرؤية الهلال بعد التحديث.

· عزيزي الهلالابي ..عضويتك.

· اكسب عضويتك.

· الطريق الى البطولات يمر عن طريق عضويتك.

· …………

· ترس اخير : المريخاب غلبهم سوداكال قاموا قبلوا على شداد.