سيكافا: من كأس صفيح زمان … مع الهلال بقت قيافة وزادت لطافه!

سيكافا: من كأس صفيح زمان … مع الهلال بقت قيافة وزادت لطافه!
العمود الحر
كاس صفيح .. ولا حبوبة؟

يا ناس المريخ… بالله خلونا ساي!
كل ما الهلال ينتصر… تقوموا تفتحوا دفاتركم القديمة، وتبكوا على بطولة سيكافا بتاعت زمن الكاس الصفيح!
أها يا جماعة الخير، البطولة دي في زمنها كانت عبارة عن “دوري محلي مطعّم” تلاتة ولا أربعة فرق، المريخ يعمل نفسو منظم، وفي النهاية يجيك زول يكتب تاريخ على ورق مقوى ويقول ليك: “أبطال سيكافا!”
الهلال لمن شارك زمان فيها، شارك بي النقاوة، بي هداف زي النقي، وبي عزة نفس، لمن شاف الظلم الحاصل على الباقين… انسحب!
يعني يا حبايب، الموضوع ما كان بطولة حقيقية… كان محطة زي “ملعب توتو كورة” ساي.
لكن الزمن دا اتغير… سيكافا بقت قيافة، بقت منظمة، بقت بي فرق من شرق ووسط أفريقيا، بقت بطولة فيها عرق وجدّ، واتحاد سيكافا ذاتو بيترجى الهلال يشارك… عارفين ليه؟
لأنو الهلال دا الاسم الرفع قيمة البطولة، الهلال البحقق أعلى النتائج، الهلال البيمثل سيكافا في الأبطال، الهلال البكبر أي محفل يشارك فيهو.
أها الليلة، بعد ما الهلال كسر الجيش، المريخاب قلبوا صفحاتهم بالدموع… زي العادة!
الهلال اتقدم؟ يفتحوا دفاترهم!
الهلال فاز؟ يفتشوا في “صندوق حبوبة”!
أها الحبوبة دي قصتها شنو؟
الحبوبة عندها صندوق خشب ولا صفيحة قديمة، تقول لأولاد أولاد أولادها “ما عندي قروش”، لكن لمن يزنقوا شديد… تقول ليهم “أمشوا افتحوا الصفيحة”.
الأولاد يجروا بي فرح، يفتحوا الصفيحة، يلقوا فيها ملاليم من زمن الجد جدهم… قروش ما بتكفي حق ساندويتش فول!
أها دا حالكم بالضبط يا مريخاب… كل ما الهلال يتألق، تجروا على صفيحة سيكافا القديمة وتفتشوا فيها زي أولاد الحبوبة!
لكن الفرق شنو؟
الفرق إنو الهلال اليوم جاب السوبر… صنداي!
ولد طويل، هادي، زول كورة بجد… ما بشتت، ما بلهث، يمسك الكورة زي البيمسك كباية شاي، ولمن يسدد، يسدد بي راحة… الكورة تمشي في القون والحارس يتفرج ساي، لا قادر يمسكها ولا قادر يسيبها!
دا يا ناس، دا المهاجم السوبر البيعمل الفارق.
الهلال ماشي عاوز كأس سيكافا الجديد جنب بطولات الكونغو الخارجية، جنب كاس السودان، جنب النخبة، جنب كاس شيخ زايد والنعسان، وجنب النهايات من 87 أجيال وأجيال… ودا الخلا السودان زاتو يحافظ على مكانتو ويمثل بأربعة فرق في بطولات أفريقيا. الأربعة دي متذكرنها كويس… ما بتنسوها؟ ولا أذكركم؟
وأها دا السجل البحرق .
الهلال دايماً فاتح الباب للآخرين… بيلعب بيأخذ فرصو، وبيديكم “مقعد مجاني” معاه صحبة راكب… مرات المريخ، مرات أهلي مدني، مرات زول تاني… لكن دايماً الهلال هو الأساس.
يا مريخاب… بدل ما تبكوا وتغنوا بأغاني “زمان يا مكان”… أحسن تشوفوا فريقكم الحالي الحاصل فيهو شنو.
لأنو الذكريات مهما طالت… برضو ترديدها بيألم.
والوجع الحقيقي… إنو الهلال ماشي لقدام، وأنتم لسه ماسكين في صفيحة حبوبة!
التراث زاتو انتهى، أسه الناس زمان بقولوا وصلوا القمر، أسه الأولاد بضغط زر يختوا العالم كلو قدامك.
في الصين في شنو؟ وآخر صيحات الاندومي بقت خضراء وحمراء!
ولو على التيك توك كمان زادت المساخر وبقت الشغلة: الواحد يقوم من النوم على الموبايل!
أسه مش كان أحسن ليكم تبقوا “تكتاكا” بدل تفتشوا في تاريخ قديم أجدادنا زاتو نسوهو؟
ويا حبايب، بما إنكم بقيتوا تحفروا في تاريخكم القديم وتمشوا لي صفيحة حبوبة سيكافا، حقو كمان تفكروا في الفرق الحتلاقوها قدام.
ونحن، والله مبسوطين وسعيدين ليكم، إنو الاتحاد الأفريقي وافق يخلي مباراتكم الجاية في التمهيدي مع بطل الكونغو.
أها ما عندنا مشكلة، واقفين معاكم، لكن عاوزين نشوف المريخ وشكلو بعد ما جبتوا المدرب “العالمي” الكان بيدرب ستات هلال السعودية!
أنا بصراحة متوقع المدرب دا ينجح، لكن عندي سؤال: هو بخاف مالو؟
الفريق معسكر في رواندا، وكل ما المنسق يعمل مباراة ودية، المدرب يقوم يلغيها! خايف من شنو يعني؟ الوضع عادي… أصلو المريخ دا ما هزايمو كتيرة؟!
الجماهير ذاتا قلبها مات… بقوا ما بيفهموا أي حاجة، بس فاهمين إنو الهلال لازم ينهزم، بس! والهلال يطير… ودي بقت أكبر هموم جمهور المريخ المغلوب على أمره.
عشان كدا، يا ناس المريخ… ألعبوا مباريات ودية، أستعدوا كويس… لأنو بكرة أفريقيا بقت أصعب من أي زمن، وما حرام عليكم الطيران من التمهيدي؟!
يا خسارة قروش لجنة التسيير ساي!
إذا كان المدرب بخاف من الوديات يبقى القادم أصعب.
..والهلال ماشي… المرة دي أنا زاتي بقيت لي أكثر من شهر شغال عاوز أحفظ لعيبة الهلال وأشكالهم.
عاوز أبحث عن اللاعب السوبر.
غلبن عدلان ولقيتهم كلهم سوبر.
وسوبر صاح… والوابور جاز، خلي يشتغل الشغل بالجاز.
كلمة أخيرة
يا مريخاب ما تزعلوا… الكورة دي حلاوتها في القفشات والضحكات.
ونحنا بنكون سعيدين ومبسوطين أوي أوي لمن نرفع مستوى الأدرينالين عندكم.
ويا هلا بكم…
سيكافا يا هلال!
سيكافا المن كأس صفيح مع الهلال بقت قيافه