شايل (سبحتو) وعندو (علامة صلاة) !!

بالعربي الكسيح

محمد الطيب الأمين

شايل (سبحتو) وعندو (علامة صلاة) !!

* الحرامية في السودان (٣) أنواع.
* النوع الأول .. (حرامي تقليدي) ، بيشتغل في البيوت بعد الناس تنوم .
* ومن مواصفاتو (كراعو كبيرة وبيلبس فانلة سوداء وبيشتغل حفيان) .
* وده بسرق (ملايا) وما دونها .
* ويعتبر حرامي (خجول وخواف) .
* النوع الثاني .. (حرامي حديث) بيشتغل أثناء النهار وعلى عينك يا مواطن .
* ومن مواصفاتو (عندو كرش كبيرة ودقن ضلالية وقبل ثورة الإنقاذ ما كان عندو التكتح) .
* وده بيسرق (ولاية) وما فوقها .
* ويعتبر (حرامي عينو قوية ولا بخاف من الله ولا مننا) .
* بل هو بيسرقنا باسم الله واسم الدين.
* النوع التالت .. (حرامي اقوان) بيشتغل (٩٠) دقيقة وانت بتشوفو وبيشوفك ومع ذلك بيسرقك.
* ومن مواصفاتو (قصير القامة وبيلعب في الوسط وادروب) .
* واسمو عبد الرؤوف.
* ده الحرامي يا بلاش.
* والله كل ما أتذكر الهلال فيهو عبد الرؤوف بضحك براي.
* منتظرين متين الدوري يبدأ عشان نشوف (حرامي الهلال الفنان) .
* عبد الرؤوف بدون دقن وبدون فانلة سوداء سرق قلوبنا.
* حرامي جعلنا نشتهي الأمسيات.
* وبمناسبة الحرامي .
* هذه الأيام مصر كلها (واقفة برجل واحدة) بعد سرقة كأس الأمم الأفريقية من مقر الإتحاد المصري .
* ما لقوا الكأس وما عارفنوا طلع كيف وطلع بي وين ولشنو .
* وبجانب الكأس فقدوا مجموعة من الدروع والهدايا التذكارية والكؤوس الصغيرة .
* ودي طبعا فضيحة لا تعلو عليها إلا فضيحة نادي المريخ .
* المريخ في زمن جمال الوالي عندهم كأس شالوا من النادي وركبوهو الطيارة وباعوه في مصر .
* والله صحي .
* شالوا عديل ، شالوا بدون سرقة ودخلو في كرتونة وسفرهو وباعوه في مصر .
* هم قالوا (كأس دهب) .
* قالوا كده .
* والقول ما بالقروش.
* باعوا الكأس وفي زمن جمال الوالي (الكوز المدلل) .
* ودي طبعا فضيحة أكبر من فضيحة مصر التي (فقدت كأس الأمم الأفريقية) .
* فضيحة مصر اهون من فضيحة المريخ .
* على الأقل المصريين ما لقوا الكأس ، يعني اتسرق، لكن ناس المريخ باعوا الكأس وقبضوا القروش.
* ومؤكد الكأس ده ناس المريخ ما تعبوا فيهو كتير عشان كده باعوهو.
* اصلا الزول الحاجة وقت يكون ما تعبان فيها ما بتهمو كتير .
* ومعظم كاسات المريخ و(على قلتها) ما تعبوا فيها .
* جابوها بالتحكيم وقرارات المكاتب .
* اكيد زول بشيل كأس بقرار مكتبي أو بمساعدة الحكم ما بيكون عندو غيرة تجاه الكأس.
* المهم .
* ما علينا ب(البائع ولا المشتري) .
* شداد ألمح بعودة الدوري منتصف هذا الشهر .
* يعني بعد أسبوع.
* وصراحة ده الكنا خايفين منو .
* كتبناها وقلناها بدل المرة عشرة مرات .
* قلنا الهلال ما يوقف إعداده.
* قلنا الفريق يواصل حتى بعد قرار البوشي المقرون بقرار لجنة الطوارئ الصحية والذي تم بموجبه تعليق الدوري .
* كتبنا وقلنا الدوري (معلق) وليس (ملغي) .
* والفرق كبير بين الإلغاء والتعليق .
* التعليق ممكن يتفك في أي لحظة وبالتالي بالمنطق انت يفترض تكون جاهز مية ونور عشان لما يتفك التعليق تكون في الميدان قدام .
* قلنا الهلال سيعاني وسيكون الإعداد ناقصا .
* قلنا كده لكن ناس خالد النقر وخالد الذومة والفاتح النقر قالوا لا .
* فضوا المعسكر والآن سنعاني.
* أسبوع لا يكفى حتى على الإعداد النفسي ناهيك عن الإعداد البدني والفني .
* بعد هذا التوقف الطويل ، شهر لا يكفى لتجهيز الفريق .
* غايتو البركة في المنتخب الوطني .
* نستفيد من نجوم المنتخب ونبدأ الدوري وبعد داك الله كريم .
* غدا يبدأ إعداد الهلال ، ونأمل حقيقة أن ينخرط جميع اللاعبين وبسرعة .
* وبالذات انت يا نزار حامد .
* ما دايرين جرجرة.
* وياريت جمال سالم يعود خلال اليومين القادمين .
* ما تفرطوا في جمال سالم يا السوباط .
* جيبوهو وادوهو قروشو المتأخرة واتفاوضوا معاهو لمواسم قادمة .
* جمال ما كعب ، وبصراحة مع شداد ده من الصعب لو جمال فات نقدر نجيب حارس أجنبي.
* نثق في يونس الطيب لكن كمان يونس ما بنستر والله .
* عموما .. الله يوفق الهلال ويبعد عن لاعبينا الإصابات إن شاء الله .
* و..و..
* وأول مرة في حياتي أشوف لي حرامي شايل (سبحة) وعندو (علامة صلاة) .