شبح المتوالية
نبض الصفوة
امير عوض
شبح المتوالية
الحي الله و الكاتل الله..
في عز مشاكلنا و أزماتنا بقينا نضرب الهلال زي الماف حاجة..
أسهل مباراة لينا في الدوري بقت قدام الزبون..
معسكرين واللا ما معسكرين.. النتيجة واحدة..
بمدرب واللا بمساعد ياي.. المهرسة شغالة..
برئيس أو بدون.. التلطيش مدور..
بمجلس أو بمجموعة متسلبطين.. فالهلال مسكين مهروس موجوع..
ده شنو البتعملوا فيه ده يا مريخاب؟
ياخ الهلالاب ديل جاهم بهق بكترة الكفوف الاخدوها منكم..
أربعة سنة شغالين فيهم طاخ طراخ لما زلطتو جضومهم..
سمعنا بالمتواليات التمانية.. لكن قصة انه الهلال اربع سنة قاعد في السهلة دي ما درسونا ليها..
ده شغل بره مقرر السيادة الحمراء المُطلقة علي القمة..
الشغل ده دخل في باب الحقرة عدييييل..
بقيتو حقارين يا مريخاب!
لا بتراعوا جيرة لا بتعرفوا للعُشرة!!
حرام عليكم ياخ..
الناس ديل فاض بيهم عديل..
عيونهم رموشها اتسلخوا من كترة البكاء و الجعير..
ياخ الطاهر يونس قبيل عمل ليه تغريدة تحنن الكافر..
الطاهر (قمصان) قال ينقصنا درهم توفيق!!
توفيق ده منو؟
مشكلتو شنو مع الطاهر الزول ده؟
بالله يا توفيق درهم واحد ما عايز تديه الطاهر؟!
ياخ الزول ناقصو درهم يتم بيه شغل تقوم تغنج بالراجل؟!
عرفنا عصمت غنج بالشعار..
توفيق كمان غانج بالدرهم؟!
بالله البعرف توفيق ده يقول ليه الكلام ده عيب..
الطاهر (صور و قمصان مزكرشة) ما هو الزول البحموهو درهم!!
بالغت لكن معاه يا تيفا..
خليت الزول يهضرب براه..
قال عملنا معسكر مثالي..
15 يوم كمان بتعمل ليها معسكر مثالي؟!
الطاهر ده جديد في الكورة واللا شنو؟
حليل زمن الفرحان..
اشتهينا بياناته مع التلطيشات دي..
لكن الحمدلله ربنا عوضنا بتغريدات الطاهر..
الطاهر قال نتمني (التوفيق) امام فريق شعاره ان يكسب بغض النظر عن الوسيلة..
يطرشني لو سمعت بالوسيلة ده كمان!!
الزول ده بعرف الناس ديل من وين؟
مرة توفيق و تاني وسيلة!!
ديل لعيبة واللا حكام؟
يعني ده حنكك يا الطاهر قدام جمهور الهلال قبل الهزيمة؟
هل نعتبر انو دي كانت الموسيقي التصويرية لفليم (ترترني و انت قاطع الزلط)؟
الطاهر ذكرني قصة ابريق الفكي..
قاليك الفكي جالد رمضان..
خاتي ليهو كركدي في الابريق كل مرة مرة يشيل ليه جغمة جغمتين..
الحيران متخيلين الابريق ده الشيخ عازم في مويته و ماليها بركة..
واحد فيهم غفل الشيخ و ختف الابريق عايز يتبرك بمويته..
الشيخ سكاه لما فترّ ما لحقه..
كورك فيه (ان شاء الله المويه الفيهو تتقلب ليك كركدي يا النجس)!
فهلللل تعتقد يا الطاهر ان مثل هذه المكنات ستقسم مع الموج الازرغ؟!
هلللل تظن بأنهم سيتركونك و شأنك بعد أن ورم تيري جضومهم بالكفيت؟
والله بقيت تحنن..
ياخ انا لما قريت التغريدة دي بالنهار ضحكت ضحك لما دموعي نزلن شوووو..
الطاهر ختم التغريدة بقوله (هيهات فكل الطرق مغلقة)!!
عليكم الله ماف زول يضحك..
بطلوا البتعملوا فيه ده..
نحن وسط البكاء و في نص الصيوان..
الطاهر قال أغلق الطرق!!
اتلطش اتنين و هو مُغلِق الطرق..
اخد كفين زي السم و هو كاتب (هيهات) قدر الليلة و باكر!!
ما قادر خيالي يدخل في المنطقة الرمادية دي..
تخيلوا انتو لو الطاهر ما عامل (هيهات) و ما مُغلق الطرق كان حصل شنو؟
ياخ ده شغل نفسيات عديل..
الهلالاب ديل اتدمروا نفسياً..
أربع سنين ما هينة برضو..
من 2018 الناس دي جوة المعصرة..
آخر فوز ليهم بشة كان لاعب.. و بشة كان رئيس!!
الأول اعتزل و اتحول لمُحلل.. و التاني اتخلع و سكن كوبر و الهلال في حاله!
اديناهم جمال سالم و لطشناهم..
و سلمناهم الغربال و ابو عشرين و كأنك يا ابو زيد ما غزيت..
بملوص الاول و ملوص التاني الطريق اتجاه واحد..
سيطرة حمراء فقط..
متوالية حمراء ضخمة في الطريق..
ما معروف تكون كم سنة؟
لكن الخبراء متوقعين الاعصار ده يستمر زي عشرة سنة..
هسه مروا أربعة..
فاضل ليكم ستة لو ربنا أحيانا..
ما عايزين نعملها ليكم تسعة طويلة..
العشرة كويسة معانا علشان بتشبه العُشرة..
نحن لولا العُشرة و الملح و الملاح كنا قبيل اديناكم ستة صفر..
لكن عارفنكم ما تتحملوا اكتر من كفين!
جضومكم مورمة..
قبيل المباراة قربت تتفرتق!!
مع انها بدون جمهور لكن فجأة كده ظهروا فيها ناس عايزين يصارعوا..
ديل دخلوا كيف؟ و صفتهم شنو؟
السؤال ده بنحولوا للاتحاد..
ما بنعصر عليهم في انتظار الاجابة بسرعة..
الاتحاد العليهو ما شوية..
هم ذاتهم عاملين صيوان بكاء تاني..
يا حليلهم..
وقفوا تلاتة من افضل نجومنا و فريقهم المدلل اتفطس برضو!!
القمة دي يحولوا فيها من ملعب لملعب خوفاً علي هلالهم و في الآخر ناس تيري جابوهو ضقلو يكركب..
لجنة التحكيم جابت افضل حكم هلالي عندها علشان يساعد و ناس طيفور حالفين يعلقوا الهلال من رجلينو في عراضات ملعبه!
قلت ليكم الاتحاد العليهو ما هين..
النخجيب و البكاء المدورات في نمرة اتنين بتسمع صوتهم من جنب قاعة الصداقة..
الحي وووب ده مدور في العرضة شمال و في نمرة اتنين..
المرحوم اتفرش في محلين..
ما كان في داعي للتكاليف و الصيوانات و الترامس الهنا و هناك..
نحن عارفين زيتكم في بيتكم..
مساكين هلالاب الاتحاد ما قادرين يقالدوا هلالاب النادي و يبكوا سوا..
الخجل حارمهم..
علشان كده قاسمين الفُراش و الرسائل بيناتهم بالنظرات..
يا حليلهم..
ذكروني نكتة المساطيل القرروا يقاطعوا شبكات الاتصال و يرجعوا لزمن الحمام الزاجل..
واحد فيهم رسل للتاني حمامة..
ده قدر ما فتش الحمامة دي ما لقي الرسالة!!
شال الحمامة و جاء لصاحبه و قال ليه ده شنو هسع؟
التاني قال ليه يعني قاصد ليك ما عندي رصيد أرجع لي..
يا حليل هلالاب الاتحاد رصيدهم كمل في دمار المريخ بلا فايدة..
قبيل قبضنا حمامة مزعمطة ماشه علي العرضة شمال..
مسكينة ما قادرة تتير..
تيري حماها الطيران..
خلاها مرترته..
علشان كده يا هلالاب افرشوا في حته واحدة..
الموضوع ايزي يا عزيزي..
ممكن تفرشوا في مزرعة برقو..
و بالمرة تستخدموا اذاعته و صحيفته في نشر البيانات..
البيانات مهمة في الفترة الجايه..
ضروري تحكوا و تفضفضوا عن الحاصل..
الكضمان ما كويس علشان صحتكم..
فضفضوا.. ابكوا.. اتنخجوا..
لسه فاضل ليكم ستة سنة معانا..
ما تقوموا تروحوا في يدنا سليقة من هسع!
انشروا بيانات..
وقفوا لينا تاني تلاتة لعيبة..
اعملوا أي حاجة الا السُكات..
البكاء بحرروه أهله..
و انتو سيد العارفين..
اربع سنة في الصيوان ما مرقتو..
لونكم بقي أبيض من ضل الصيوان..
نحن في خيمة الكتمة و الهجيج..
و انتو في صيوانكم وشكم يلعن قفاكم..
نجي لي اولادنا المشو الهلال ديل..
ياخ ديل الدرب راح ليهم عديل..
مساكين ناس الغربال بقوا يجدعوا في شارة الكابتنية من الزهج و القرف..
مسكين.. من هداف العرب بقي يجيب ليه هدف كل ستة شهور..
اما لون الدم فده حالته بقت حاله..
الجماعة كشفوه و اتعرفت قدراته..
الهلالاب اتخدعوا فيه و كانوا متخيلين انو نوير السودان..
ما كانوا عارفين انهم استبدلوا ملوص بالأملص منه..
لون الدم زي عمك الفخيم الفي النكتة..
ده كمان قال ليك طول في عرض..
تشوفوا داخل جوه الجلابية ما تقدر تقول بغم..
شنب و وجاهة و بسطة في الطول و الجسم..
المهم.. الزول الفخيم ده قاعد في مجلس النواب مُمثل لواحدة من دوائر الهامش..
رئيس البرلمان مُعجب جداً بالفخيم البقعد دائماً في آخر مقاعد و ما بتكلم و يجادل نهائياً..
يوم البرلمان مولع نقاشات بسبب رفع المرتبات و المشاركات مولعة..
فجأة كده الفخيم رفع يده..
رئيس البرلمان قاطع العضو البتكلم و قعده.. و طوالي منح الفرصة للفخيم..
زولنا مسك المايك و نفخه قائلاً (يا اخوانا البيبسي ده ما قاعد يصلنا هنا ورا)!
اها لون الدم ناس تيري كشحوا ليه البيبسي برضو..
خلوهو في الصقيعة..
الحمدلله الما بقي اسمه ابو سبعين..
كان لطشوهو سبعة..
الموضوع ده خطير جداً..
مباراة المريخ و الهلال فقدت نكهتها..
نفسياً كده بقينا نخش مباراة الهلال و نحن ضامنين النتيجة في جيبنا..
بظروف معقدة او غيرها فالمحصلة عندنا واحدة..
مباراة الهلال بقت عندنا من أسهل المباريات..
يا حليل الموردة و يا حليل الندية..
الممتاز بقي بلا طعم..
الاندية كلها تتلطش و قفاها يقمر عيش..
ألم أقل لكم أننا في عهد متواليات قادمة و سيطرة حمراء ستمتد طويلاً.
*نبضات متفرقة*
نحمد الله حمداً كثيراً طيباً مباركاً علي هذا الانتصار البهيج.
نحمد الله الذي منحنا السعادة و أدامها علينا حين تجلي نجم السعد و أضاء ما حوله ليختفي نور التوابع.
و هنيئاً لشعب المريخ هذا الفوز الباهر الذي تحدي الظروف و أزاح الخطوب و قهر المستحيل.
*نبضة أخيرة*
كلك واري اللو..
تيري قابض الجو.
اية الكلام الحلو دا ياستاذ امير الامراء . حرام عليك الضرب فى الميت حرام . اما الحى كدا قطعت فشفاشة. امس بالليل قال ليك مستشفى امدر اتملاء بحالات الاغماء من بنبان تيرى .وقال ليك ابواثنيين كل مايدوة كلونيا بتاعت صاحبنا يصحى ويقول ليهم ابعد منى تيرى دا . قال لية ياخى انت فى المستشفى قال ليهم لا انا شايف واقف بجنبى…
هذا زمانك يامهازل فأمرحي لكن الحق ماعليكم الحق علي لاعبنا المستهتر الاحيا العظام وهي رميم ملحوقه برضو بس ان شاء الله نشوفكم في دوري المجموعات وماتفضجونا تاني وتخلو البسوي والمابسوي يشمت في الكرة السودانية والاعلام المصري يقول انو كيف الكاف يسمح لفرق زي المريخ تشارك في الابطال المحلي هين كده كده حانشارك مع بعض في الابطال النشوف شطارتكم مع فرق الغزالة جازوت وعزام وكزام سيمبا كيف ولامشروب فيتا