شمال (المخدة) وجنوب (اللحاف) !!

بالعربي الكسيح
محمد الطيب الأمين
شمال (المخدة) وجنوب (اللحاف) !!

* بعد أن أكملت نصف هذا العمود علمت بإقالة السنغالي لامين وقد قصدت تجاهلها لأن بداخلي فرحة لا أريد للكاردينال أن يسرقها وهو الذي تعود سرقة أفراح أهل الهلال ..
* سأكتب اليوم مواصلا بهجتي بكأس السوبر هذا الكأس الذي حرق فشفاش أهل المريخ ..
* وبكرة لينا موعد مع الكاردينال الذي مازال (يلعب) ..
* نواصل أرواحنا اليوم وغدا نتحدث عن استقالة السنغالي المحترم ..
* المهم ..
* أكثر سؤال غبي هو أن تدخل (الصيدلية) ثم تسأل قائلاً: (ريحة الدواء دي جاية من وين) ؟؟
* في ناس جوة الصيدلية يقول ليك: (في ريحة دواء) ؟؟
* طيب إنت عايز في الصيدلية يكون في ريحة (كلونيا) ولا كيف ؟؟
* بمناسبة (الكلونيا) ..
* (المنشطات) بالنسبة للاعب كرة القدم خطورتها لا تقل عن خطورة (العرقي البلدي والوسيكي الأجنبي) ..
* وأنا ما بفسر وإنت ما تقصر ..
* يوم الجمعة لما كانت الساعة أربعة عصرا إعلام المريخ السالب كان يتحدث عن (كأس جوي) ..
* ويوم الجمعة لما الساعة بقت حداشر مساء ذات الإعلام السالب تحدث عن (درع الكرتون) ..
* لو شالوه هم يبقى (كأس جوي) ولو شلنا إحنا يبقى (درع) ..
* وما بين هذا وذاك يبقى الهلال هلال والمدفور مدفور ..
* نحن بنحب الدروع ..
* وبما أننا أسياد بلد نقترح للإتحاد العام أن يكون كأس الدوري إعتبارا من العام القادم عبارة عن درع ..
* تسموا درع ولا تسموا ضرع في النهاية الهلال قدااااااااام ..
* وتبكو بس.. عين قطرة وعين مس ..
* أكثر منظر (مستفز) هو منظر نجوم الهلال وهم يتناولون وجبة العشاء في طاولة واحدة مع لعيبة المريخ ..
* ضربوهم في الميدان وجوا إتعشوا معاهم زي الما حصل شئ ..
* والغريبة لعيبة المريخ يضحكوا ..
* والله صحي ..
* شايلين منهم كأس ويضحكوا في العَشاء ..
* طيب وقت جاتكم نفس للعشاء الضحك لزومو شنو ؟؟
* حاجة تكسف ..
* لاحظ الجمهور الذي تابع قمة السوبر أن بكري المدينة عندما وقع مصابا مسك (بطنو) ..
* والتش عندما وقع مصابا مسك (بطنو) ..
* وصلاح نمر عندما وقع مصابا مسك (بطنو) ..
* هو ده شنو الإصابات الجديدة الظهرت البتمسك في البطن دي ؟؟
* يكون دي (كنكشة) وألا شنو ؟؟
* لاعب الكرة معروف من قمنا إصابتو بتكون في (كراعو) أو (يدو) أو حتى (رقبتو) ..
* لكن إصابة البطن دي جديدة علينا ..
* يكون أكلوا (منقة) ؟؟
* ولا يا ربي يكون أكلوا زبادي صلاحيتو منتهية ؟؟
* إحتمال (موية) الامارات تكون ما نفعت معاهم ..
* أصلو ناس الامارات بيشربوا موية مالحة وعكرانة ..
* موية حفاير وترعة ..
* (بطون) لعيبة المريخ تأثرت بالموية ..
* وفي النهاية المؤمن مصاب ..
* وأجر وعافية إن شاء الله ..
* المهم ..
* في ثقافة البيوت السودانية يعتبر (رفع الملايا) عقب صلاة المغرب إعلان للنوم ..
* في العادة ناس البيت بعد المغرب بيرفعوا (الملايات الجديدة) وبيفرشوا (ملايات شبه قديمة) ..
* والحركة دي بتظهر بشكل أوضح في الأعياد ..
* (ملايات) العيد في كثير من البيوت السودانية لا (تبيت) في السرير ..
* اسمها (ملايات) الضيوف ..
* بفرشوها سبعة صباحاً وبرفعوها سبعة مساء ..
* وفي الغالب (الملايات) القديمة بتكون مفروشة تحت (الملايات الجديدة) أو ربما تكون (تحت اللحاف) ..
* الضيف لما يجي زيارة ويلقاكم رفعتوا (الملايات) وفرشتوا (ملايات النوم) بتحسس ..
* وفي ضيوف ثقلاء ومجردين من الإحساس..
* الضيف البيجي من العصر وبيقعد لحدي حداشر مساء ..
* في ناس لما يجيهم ضيف مجرد من الإحساس بيقوموا يعملوا حركة بحركتين عشان يحسسوهو ..
* مثلاً .. ترفع (الملايات) الجديدة وتفرش (الملايات) القديمة وذلك في وجود الضيف..
* الحركة دي إسمها طرد بطريقة غير مباشرة ..
* أو مثلاً .. تتثاءب وما تتفاعل مع الونسة ..
* طرد بالبارد ..
* في نوع من الناس إنت تكون قاعد تتونس كده يقوم يربط (الناموسية) ..
* والله صحي ..
* ده قمة الإحراج والطرد ..
* لما سيد البيت يربط (الناموسية) وإنت قاعد تتلفت لازم تعرف إنو (دمك تقيل) ويجب أن تذهب فورا ..
* في حاجات كتيرة بتوصل ليك رسالة ..
* وبما أن (هذا هو هذا) فان الأخ غير الشقيق السماني الصاوي وصل أكثر من رسالة تفيد بأنه لا يريد المريخ ..
* أول رسالة كانت عندما بحث عن إعارة للمخارجة فكان الإتفاق مع مدربه السابق غارزيتو ..
* ده كانت الرسالة الأولى ..
* السماني لما قام ماشي ليبيا عمل تصريح قال فيه : (أنا ماشي وتاني ما جاي) ..
* دي كانت الرسالة التانية ..
* الرسالة التالتة وهي رسالة عفوية وصادقة جدا تمثلت في إحتفال السماني مع نجوم الهلال وتحديدا أبوعاقلة عقب فوز الكبير بكأس السوبر ..
* السماني فرح لينا بالكأس أكتر من فرحنا ..
* الراجل قلبو طيب وما بيعرف (يداري الحب) ..
* وما السماني براهو ..
* على بالنعمة (90%) من لعيبة المريخ فرحوا بفوز الهلال ..
* فرحوا لكن (قطعوهو في الحشا) ..
* لكن السماني فرحتو كانت (أوفر) الصراحة ..
* طبعا الجماعة قالوا السماني (صديق شخصي بالنسبة لأبوعاقلة) ..
* صديق بـ(الفاء) ؟؟
* معقولة (صديق شخصي) يفرح أكتر من (الصديق) ذاتو ..
* كلامكم ده قولوا لزول ما عندو (جيب خلفي) ..
* شوفوا ليكم زول ما عندو (حبيبة) وقولوا ليهو الكلام ده ..
* لكن ما تقولوا لينا إحنا ..
* إحنا أولاد تسعة ودافننو سوا ..
* عموماً.. السماني وصل ليكم تلاتة رسائل ..
* السماني رفع (الملايات الجديدة) وإنتو ما حسيتوا ..
* السماني إتثاءب وإنتو ما حسيتوا ..
* أها بعد كده السماني إحتفل مع أبوعاقلة وربط ليكم (الناموسية) ..
* وغايتو جنس غايتو ..
* نرجع ونقول: الهلال بطل النخبة وبطل السوبر ..
* كده خليكم من درع ولا ما درع في النهاية المناسبة كانت كأس السوبر على هامش إحتفالات دولة الامارات بمئوية شيخ زايد ..
* حتى لو إفترضنا إنو الكأس كان (طوبة حمرا) في النهاية إحنا بنسميها (طوبة كأس السوبر) وفاز بيها الهلال ..
* والحنطور إتحنطر ..
* وعليكم الله كل ما تقابلونا إنتو في الشوط التاني ألعبوا وإحنا بنشيل الكأسات ..
* قال ايه .. قال المريخ عندو سبعة ركنيات ..
* السبعة ركنيات دي إن شاء الله تضوي ليكم ..
* إن شاء الله تبقي ليكم (كأس) ..
* ونركب صافنات ونجيبة (هلالايبة) وأصلو الزول بيموت والذكرى تفضل حية ..
* و..و..
* وما تشيلي هم عاشق …(ما بينعس بأخوي وأخوك) ..