صلاح نمر يا حليلو طالع من شهر رمضان وقدامو الغربال
قزاز ورذاذ
محمد الطيب الأمين
صلاح نمر يا حليلو طالع من شهر رمضان وقدامو الغربال!!
* أكبر (خوف وجرسة) حدثت في التاريخ الحديث هي جرسة (زيكو لما شال الكورة).
* لكن (الجرسة) الأكبر من جرسة زيكو هي جرسة الشاعر عثمان خالد .
* عثمان خالد وعبر حنجرة حمد الريح قدم أغنية في زول (ناوي السفر).
* زول (ناوي) بس.
* ما سافر لكن عندو (النية).
* قال : (يا حليلو قال ناوي السفر كيف الوداع لامن يحين وقت السفر).
* (ناوي يسافر) عملوا فيهو (اغنية) وأنا ما عارف بعد سافر عملوا شنو.
* الخوف من السفر (وراثة) عند السودانيين.
* المسافر بخاف والمودع بخاف.
* بخافوا من السفر.
* ومن سيرتو.
* لو في زول عزيز عليك قال ليك (أنا مسافر) بتلقى نفسياتك بقت في الواطة.
* ملامحك بتتغير.
* وبما أن ذلك كذلك فإن أهل المريخ أول ما عرفوا مباراة القمة في (المقبرة) نفسياتهم بقت في الواطة.
* وملامحهم اتغيرت.
* زي الكيزان امبارح لما شافوا (مؤتمر باريس).
* امبارح اي (كوز) ملامح وشو متغيرة.
* ونفسياتو في الواطة.
* كرهوا باريس وأم باريس ذاتو.
* المهم.
* المريخاب ما بحبو المقبرة.
* ولا سيرة المقبرة.
* سنين طويلة أي مباراة قمة مبرمجة في استاد المريخ (الحكومي) طوالي بحولوها إستاد الخرطوم.
* بقول ليك استادنا في الصيانة.
* سنوات وأهل المريخ (كضب ساي) بقولوا استادهم ما جاهز، لما ياهو ربك رب الخير دمر ليهم الإستاد مرة واحدة.
* حالياً إستاد المريخ صالح لكل شي إلا كرة القدم.
* صالح للزراعة.
* وصالح لسباق الخيل.
* صالح يكون ميدان فروسية.
* لكن ما صالح للكرة.
* وده كلو بسبب الكضب.
* يكضبوا عشان يلعبوا مع الهلال في استاد الخرطوم خوفاً من العار جوة الدار.
* من يوم الهلال غلب المريخ وقام مهند الطاهر رفع علم الهلال في قائم مرمى المريخ ، من اليوم داك المريخ ما بحب استادو.
* والله صحي.
* عموماً.. القمة في المقبرة.
* وقبل ما (يحين) موعدها نجد الآن المريخ مهزوم نفسياً.
* والباقي عند الغربال واخوانه.
* الغربال هو (خط هجوم بحالو ) .. ماشاء الله تبارك الله.
* والأخ غير الشقيق أبو عشرين الشهير ب(لون الدم) هو (حارس وخط دفاع بحالو) .. ماشاء الله تبارك الله.
* ياسر مزمل ما جاهز لكن ميسي جاهز.
* فات جيسي وجاكم ميسي.
* عيد مقدم مع خواتيم الدورة الأولى لم يكن كما يجب.
* نرجو أن نشاهد عيد في أيام هذا العيد.
* إحساسي إنو مباراة القمة حقت محمد موسى الضي وميسي.
* ميسي لو شارك بضرب المريخ.
* صلاح نمر مسكين طالع من رمضان وح يلاقي قدامو ميسي والغربال.
* تقابل الغربال بعد الصيام .. حارة والله.
* وغايتو السنة دي بالذات يا متنا من الضحك ويا كمان الضحك كتلنا.
* و.. و..
* والقلوب الحايمة حولك بتتمني ليك…. (3/صفر).
اقتباس.. صلاح نمر مسكين طالع من رمضان وحيلاقي ميسي والغربال.. البسمع كلامك يقول انه حيلاقي ميسي الياباني مش التايواني بتاعكم الكحيان ده.. صلاح نمر لاقاه وهو مع الفرسان ما عمل التكتح.. بل مبهووور من صلاح نمر ومطهق عيونو زي ود الطهور.. اسمع يا مشجع .. صلاح نمر الفروع بقول ليك الميدان يا حميدان وجيب معاك غربالك ومحمد موسى وميسي التايواني. . وان شاء الله انت مضرووووب في معبرتك الغجزت انك تسجل فيها اي هدف في دور المجموعات.. ونحيا نشوف.. ده تطبيلكم للهلال الخلاه واقف في الصفر من سموه الهلال اقصد الزبون.. روح بلا صحافه معاك.. يا خليلك با عدلان يوسف.
بعدين يا اخي مسي ده ادوه قروشو عشان يعرف يلعب.. نسيت انه شيكات اللاعبين رجعت ولا دي ما سمعت بيها.
هههه 3 صفر لا بس كفاية مسمار من السماني او تيري ولا طوني… انت تذكر أخر مرة الهلال فاز فيها على المريخ؟ اولا الغربال تعلم التهديف في المربخ وابوعشرين تطور في المريخ والاتنين حافظنهم وإن شاء الله الهلال مضروب في معبرتو بإذن الله. بطل أحلام اليقظة وصلاح نمر قادر يرد على الخرمجة التي تهذي بها ليل نهار يعني ركلة زاوية وتمر يقفز عاليا وابوعشرين يحيب من جوه الشبكة.
صلاح نمر يا حليلو طالع من شهر رمضان وقدامو الغربال!! ههههههه ونسيت يا استاذ تمبش وطبنجه وبيبو دي شوارع مسفلته وامير التقيل لو لعب الرباعي ده حاتكون ليله سرسوب خبت تقيل ههههه وصريج طبعا الثنائي تمبش وطبنجه متعه
يا محمد الطبب ثانى يوم المبارة ماتقفل جوالك لان الرش بكون شديد عليك من السمانى هو عارف العشرين ضعيف وين وهاك فى التأمينات وجيب من جوة يا ابوستين