صنداي… بداية الأسبوع بالقون

العمود الحر

عبدالعزيز المازري

صنداي… بداية الأسبوع بالقون

من الوابور جاز للبنزين السوبر… صنداي جاب الفرح والهلال ماسك الجاز السوبر!”
< يا هلالاب… مافي زول يغالط.
< نحنا مبسوطين شديد… وفرحانين أكتر.
وانا شدة ما مبسوط غلبني اكتب بلغتي المعهودة
الليلة بس قلت اكتب كده بس من خشمي وللكي بورد
< الهلال أخيرًا جاب المهاجم السوبر… صنداي.
ندعو الله ان يكون سوبر وعين فاحصة بجد
< صنداي دا مش لاعب ساي… دا زي البنزين السوبر.
< العليقي زمان سميناه الوابور جاز… واليوم جاب لينا البنزين السوبر.
< الزول دا طويل شديد… ١.٩١… يعني ناس طبنجّة جبنا ليكم دبابة ما شاء الله. وين ليكم تاني؟
< يمسك الكورة فوق… يعمل ليك صداع تحت.
< صحي، المهاجم دا مافي زول سمع بيهو… لكن شوفنا الفيديوهات والمحط والشحط… عندي صاحبي متواصل معاه… أصلو السودانين ديل موجودين في أي مكان… قام كده وقال لي: “الهلال كسب صراحة… فاخر من الآخر… مهاجم ولا كلمة!”
< قون من نص فرصة… ما محتاج لي مقدمات.
< الهلال كان ضايع تلاتة مواسم… كله من غياب المهاجم.
< الغربال مسكين… شال الشيلة براهو… وأي إصابة كانت بتكشفنا.
< بن زيتون؟… ما كان زيتون… كان عود قش ساكت.
< هسي نقول الحمد لله. الهلال رجّع لينا فرحة القون.
< وأها يا المريخ… من غير صنداي جبنا أربعة طيب معاهو تاخدوا كم؟
< كان عندنا “سبت” حارس… وكان عندنا “جمعة” برضو.
< واليوم بداية الأسبوع جبنا “صنداي”.
< يعني من الأحد لحد السبت… كل يوم قون.
< الله يحفظو ويخليهو لينا.
< نسأل الله يجمع في صنداي قوة قدوين… سرعة ساسا… نجاعة الغربال… وتسديدات إداهور.
< نحنا انتقدنا وانتقدنا… وفترنا وما كلينا.
< لكن من الليلة نقول: نحنا ناس دعم ساي.
< المشروع الحقيقي بدا… اليوم … والهلال ماشي صاح.
< أها تاني خشمنا عندنا. إنتو اشتغلوا شغلكم… ونحنا نشتغل شغلنا وندعم.
< ولو ريحتونا بموازنة حقيقية بين الوطني والأجنبي… تكونوا ما قصرتوا.
< البدائل موجودة… والشطارة نحافظ علي الموجود.
< نبيع ونشتري لكن بحرفنة… وباستثمار… والبطولة قدام.
< غايتو **سيكافا** المرة دي… لو صنداي شارك معانا… مع التسجيلات الجديدة… الهلال حيكون نار.
احلي حاجة الشغل مرتب ومنظم… الهلال دا بسعدنا باخر طلقة.
تتذكروا لمن سجلنا الغربال وخمسماية مريخابي اغمي عليهم اخر حاجة قبل الفجر؟
ساهرنا وصبرنا والنعاس طار…
اها اسه المجلس طبق نفس النظرية قال الا يسجل صنداي علي اسمو يوم الاحد وقد كان.
< البطولة دي لازم نستفيد منها… نجهز بيها فريقنا… ونخلي المهاجم الجديد يدخل في الأجواء من بدري.
< مع التسجيلات النوعية الحصلت… الهلال ما محتاج زيادة.
< شكراً للمجلس… وشكراً للعليقي… الاختيارات المرة دي عينها كانت فاحصة.
زمان انتقدناك وانتقدنا المشروع نعم لكن الان نقول المشروع راح يبدا الان.
زمان دا كان هظااااااااااار ساي…
اسه وقت الجد.
< أهم حاجة نصبر… وما نرجع لموال تغيير كل موسم.
< الاستقرار مفتاح البطولة… وصنداي أول بشارة.
ريجكامب من ما جانا لبس لبس خمسة ومن البورتسودان لسيكافا.
تابع أولادنا في المنتخب وعمل المعسكر…
الزول دا باحث عن المجد عن طريق بوابة الأزرق النشوان.
< الزول دا عطشان بطولات… وحظو كويس.
< مش زي فلوران التعبان الضايع… الجاب لينا عثرات.
< **سيكافا دي حقتنا**… ونلعب براحتنا.
< نضرب مقديشو كويس… وما تاخذكم بيهم رحمة.
< وبعدها نجي للأهلي مدني .
< ونختمها بكتور جوبا.
نتصدر ونكسب ونخت اول بطولة هذا الموسم
< بعد سجل المهاجم السوبر… تاني مافي كلام.
كده بنزينا سوبر… وشكراً ياعليقي محطة عديل.
< اشكر المجلس… انني كنت من أشد المنتقدين… لكن في حدود النقد المثمر… وهاهو أثمر.
< والسكة شويه شويه تتصلح… وهلال جميل السنة دي ما قصرتم… نحنا ندعم بالكلمة والتوجهي … وانتو كملو شغلكم.
اهم حاجة مكسب الجمهور والاستفادة من السلبيات
< ننتظر الأربعاء… انطلاق سيكافا… لنرى هلال جديد يسر العين.
< قولوا ما شاء الله… أصلاً ما مستعجلين…
سعيدين نحنا في السودان… زعيم وسيد بلد مين زينا.
< مش يا ناس المريخ وصيفنا سابقا … لو جبتو إمبراطوريه جاز… ما بتحصلونا.
< قال مجلس اللوردات: اهو كل زول بمشي على حسب جيبو… هلال تقيل.
< ويا البابور جاز… خلي اليشتغل الشغل بالجاز السوبر.
< نفخر بمجلسنا… وبما أنجز… فشكراً جميلا نبيلا… ومشينا خطاوي الريد.
اخر كلمة
سوبر ونص وخمسة غيرو عرباتكم
ونقدر نقول “العليقي في المحطة… صنداي وصل والهلال رقص بالجاز السوبر!”