(طبلة) الجاكومي ..و(رق) ترباس..!!

• قدر ما حاولت القى ليها (تفسير) .. ما لقيت.

• مرات بتمشي الدكان .. تقيف ساعة ونص .. وما تعرف نفسك عاوز شنو؟ وجيت الدكان ليه؟

• تشيل ليك (رصيد) وترجع.

• عشان ما ترجع ساي.

• شينة في حقك.

• عاوز ليها (منطق) .. فتشت وبحثت ودخلت (غوغل) وما لقيت ليها (منطق).

• قعدت افكر كدا.

• ساعة ونص.

• الليلة ساعة ونص الماسك لينا فيها دي شنو؟

• علاقة الساعة ونص بالموضوع دا شنو؟

• مرات بتطلع التلفون من الجيب .. عشان تضرب لي زول .. اول ما تفتح قائمة الاسماء .. تنسى الزول الكنت عاوز تضرب ليه.

• ترجع التلفون وأنت ساكت.

• ان شاءالله ما في زول يكون شافك.

• في زول مرات بيلبس ويطلع ويركب المواصلات .. وهو ما عارف نفسو ماشي وين؟

• بتحصل.

• بعرف لي زول .. عاوز يعرس.

• عمل اول شيء البيت.

• وركب (المكيفات).

• وجاب العفش.

• وعمل ليه عربية.

• وجاب الشيلة.

• وسد المال.

• وحجز النادي.

• ومشى على الكوافير .. عشان يجيب (العروسة).

• فجأة وقف.

• واتذكر.

• هو اصلا ما حدد (العروسة).

• ولا عارفها.

• عمل أي شيء .. عدا ان يحدد العروس.

• الزول الطائش دا مفتكر اخر بند في العرس (العروسة).

• ما جايب للدنيا خبر.

• ادخل ليكم على الصالون.

• تتخيلوا في المريخ ثلاثة مجالس .. مع ذلك فان الذي يدير المريخ هذه الايام هو (المكتب التنفيذي).

• دي قبل كدا حصلت؟

• عندهم ثلاثة رؤساء.

• ادم سوداكال (جمعية الاستاد).

• حازم مصطفى (جمعية حديقة الموردة).

• ايمن مبارك ابوجيبين (لجنة الانتخابات).

• مع ذلك رئيس المريخ في هذه الايام هو هيثم نور.

• الموضوع دا زي شنو؟

• زي كأنك تمشي ليك عيادة اسنان .. عشان تقلع ليك ضرس.

• تقوم تخش العيادة.. تلقى العيادة فاتحة .. لكن الدكتور مافي.

• تسأل من المساعد الطبي ..برضو تلقاه مافي.

• ممرض.

• ما في.

• تقول ليهم طيب في منو؟

• يقولوا ليك في بتاع الحسابات – الزول الماسك الخزنة.

• طبعا بتاع الحسابات دائما بكون موجود.

• الزول الوحيد البتلقاه قاعد في أي مؤسسة.

• تمشى تدفع الرسوم.

• وترجع تقعد.

• يبقى عليك وجع ضرس .. ودفع رسوم.

• ضربتين في الرأس بتدوش.

• ما تعرف تمشي وين؟

• خلوني احكي ليكم الحكاية واشرح ليكم.

• امشوا معاي واحدة .. واحدة.

• موضوع المريخ دا زي موضوع الزول البفتش ليه عن بيت كبير .. عشان يستأجروا.

• تكلم ليك سمسار عقارات وتشترط عليه ان يكون البيت كبير .. عشان العائلة كبيرة.

• يقوم السمسار يضرب ليك تلفون مع النباه الاول .. يقول ليك لقيت ليك البيت الكبير… 3 غرف ومطبخ كبير وهول وصالون وحوش مفصول .. وسطوح مع المنافع.

• وأنت ماشي عليه .. عشان تشوف البيت .. يقوم يضرب ليك تاني .. يقول ليك اسمع البيت ما فيه سطوح .. ولا حوش.

• تقول ليه ما مشكلة.

• السطوح اعمل بيه شنو في (البرد) دا؟

• قبل ما تصلو .. يضرب ليك تاني .. يقول ليك الصالون!!

• تقول ليه : مالو؟.. عاوز (مكيفات).

• يقول ليك البيت ما فيه صالون؟

• تكتلها في قلبك.

• تقول البركة في الغرف.

• بعد ما تنزل من العربية .. وأنت ماشي عليه .. تاني يضرب ليك.

• تقول ليه في شنو تاني؟

• يقول ليك : البيت فيه غرفة واحدة .. ما 3 غرف .. والمطبخ عاوز سقف.

• تقول وقت وصلت احسن اشوف البيت براي.

• تخش البيت تلقى البيت لا فيه منافع ولا ابواب ولا شبابيك.

• تقول للسمسار دا شنو؟

• يقول ليك الحاجات دي كلها ممكن نقفلها من المقدم.

• 6 شهور .. سنة بالكتير بنسلمك البيت.

• تقول ليه طيب وقت الموضوع دا عاوز ليه 6 شهور او سنة .. ضارب لي مع النباه الاول ليه؟.. جايبني بدري كدا عاوز تسكني في (الميناء البري).

• تمرق وترزع الباب وراك .. تذكر ان البيت اصلا ما فيه باب عشان ترزعو.

• طيب انا رزعت شنو؟

• تبحث عن الموضوع تلقى نفسك رزعت (التلفون).

• تلفونك اتكسر.

• عشان ما الف ليكم كتير.

• وعشان اجيب ليكم الموضوع عديل.

• (جدد “محمد سيد أحمد الجاكومي” واقعة “كسر طبلة” استاد المريخ امس الخميس ، وذلك على خلفية إعفاءه من قبل المدير التنفيذي للنادي الأحمر، “هيثم نور”، ومنع العمال من الدخول إلى الاستاد لممارسة عمليات الصيانة، فما كان منهم إلا ان قاموا بمهاتفة “الجكومي”، الذي حضر على الفور لفتح باب الاستاد بعدما كسر الأقفال، وذهب “الجكومي” ابعد من ذلك، عندما جلس لالتقاط الصورة، وقال: (انا هنا جوا الاستاد والراجل يجيني).. يذكر أن المدير التنفيذي للمريخ “هيثم محمد نور”، بعث بخطاب امس إلى الجكومي لاخطاره بإعفائه من مهمة متابعة صيانة الاستاد).

• مواقع التواصل الاجتماعي امس تداولت هذا الخبر.

• بالطريقة دي الجاكومي ح يعمل لينا ازمة (طبل) في البلد.

• الزول دا كل اسبوع بكسر ليه (طبلة).

• طبلة الجاكومي بقت اشهر من رق كمال ترباس.

• الشيء الغريب .. الجاكومي بنزل صورتو في المواقع بعد ما يدخل استاد المريخ.

• تقول دخل الاندلس.

• يا زول الموضوع ما بستاهل.

• ناس المريخ لو ما خلوا حركاتهم دي .. نحن في الهلال ما بنخليهم يلبعوا في استاد الهلال.

• اذا استاد المريخ .. وانتوا مريخاب ما عاوزين تحترموه .. ح تحترموا استاد الهلال كيف؟

• احترموا ملعبكم اولا.

• واضح ان الجبهة الثورية اثرت على تصرفات الجاكومي .. لذلك اصبح يتعامل بهذا الاسلوب (العنتري).

• مثل هذا السلوك يجب ان يبعد الجاكومي من الترشح في انتخابات نادي المريخ.

• لو في قرار .. او في جمعية او في لجنة حوكمة حقيقية في المريخ كان يفترض ان تبعد الجاكومي وتحرمه من الترشح في انتخابات المريخ.

• يبدو ان البلد كلها ما فيها (حكومة).

• ولا في قانون.

• أي زول شغال على كيفه.

• الجاكومي بقى اخطر على المريخ من (9) طويلة.

• مرة شايل ليه مسدس.

• ومرة شاكوش.

• نسيت اقول ليكم (الشاكوشي) بدلا من (الجاكومي).

• ما مشكلة.

• الجايات اكتر من الرايحات.

• ………………….

متاريس

• موضوع (الاضاءة) في الهلال وصل وين؟

• موضوع الاضاءة دي بقى زي (التسوية).

• ما معروف تودينا وين؟

• ح نرجع نشوف هذا الملف الذي فشل فيه مجلس السوباط فشل ذريعا.

• اذا لعب الهلال مباريات مرحلة المجموعات (عصرا).. فان ذلك يعتبر قمة الفشل.

• ما في فشل اكتر من كدا.

• مجلس الهلال يجب ان ينفذ تقرير فلوران كما هو.

• من غير ولا كلمة.

• فلوران خبير على مستوى افريقيا كلها .. وهو عارف احتياجاته اكثر من أي زول تاني.

• ممكن تكون هناك مشورة .. ممكن نصيحة .. رأي .. لكن في النهاية القرار قرار فلوران.

• انا بعتبر جارجو من افضل المواهب الاجنبية التى شاهدتها في السودان – على مدى التاريخ.

• الهلال بكرة يلعب امام كوبر في كوبر.

• حضور جمهور الهلال مهم.

• جمهور الهلال في المباريات السابقة شكل غياب كبير .. وكان حضوره ضعيفا.

• الجمهور قصر مع الهلال.

• وهزيمة الهلال امام الاهلي .. يسأل منها في المقام الاول الجمهور.

• في كوبر لا بد ان يسجل الهلال اكثر من 5 اهداف .. عشان في هدفين لن يحتسبهما الحكم.

• غير ضربات الجزاء.

• أي زول عندو رأي في لاعب يجب ان يحتفظ بيه.

• الرأي رأي المدرب.

• ادعموا الفريق.

• ادعموا اللاعبين.

• وخلوا المدرب يشوف شغلو.

• ………..

• ترس اخير : طبلة طبلة ..الليل نعدو.