طفل يُقضي فصل الشتاء ب(فانلة) الهلال و(شورت) المريخ !!
بالعربي الكسيح
محمد الطيب الأمين
طفل يُقضي فصل الشتاء ب(فانلة) الهلال و(شورت) المريخ !!
* من نعمة الله علينا أن جعلنا في المقام الأول مسلمين .
* وفي المقام الثاني سودانيين .
* وكونك مسلم وسوداني فهذا فخر وعز يحق لك أن تتباهى به.
* ده شرف لا يضاهيه شرف .
* المهم .
* أفضل أخش في الموضوع طوالي .
* عندي مبادرة أطلقت عليها إسم (قديمك جديدنا) .
* أسعى من خلال هذا الشعار على جمع (مليون قطعة ملابس) .
* المبادرة تستهدف (الملابس القديمة والمُشرطة) .
* عندك (قميص) أنت شايف إنو ما نافع وقاعد تمسح بيهو (جزمتك) ، أدينا ليهو وح يكون (جديد) بالنسبة لزول محتاج .
* عندك بنطلون ما فيهو (سُستة ومُشروط محل الركبة) جيبو لينا نحن عندنا (السُستة) وعندنا (الإبرة والخيط) .
* عندك جلابية ما فيها (زراير) و(لاصق) فيها (زفت) أو(بوهية) جيبا ونحن بنخليها (جديدة ومكوية) .
* عِندك (توب ، بلوزة ، اسكيرت) كلو معانا تمام .
* عراقي شُراب سيوتر طاقية بينفع .
* (شال ، بطانية ، جزمة) .
* ملابس أطفال، نساء ورجال .
* جرسلين فازلين .
* أي قطعة ملابس عندك ما ليها قيمة نحن عندنا القدرة نخليها (شِبه جديدة) .
* أصلو ما تقول القميص ده منتهي أو البنطلون ده تعبان .
* أتذكر في زول بيقضي فصل الشتاء كلو ببنطلون (قماش) وفانلة كورة بتاعت برشلونة أو ريال مدريد .
* أطفال بقضوا فصل الشتاء بتشيرت الهلال وشورت المريخ .
* أتذكر في أطفال في أطراف الخرطوم والولايات الواحد منهم في البرد بيتغطى بجسم أبوهو وأمو .
* أنا اقسم بالله شفت ناس لما يجي البرد بجيبوا شوال الخيش بفتحوهو على نصين وبتغطوا بيهو .
* أدينا ملابسك القديمة الما عندها قيمة وح تلقاها قدام نور في قبرك وحسنة في ميزانك .
* لو قدرت غسلت ملابسك الجايبها لينا (كتر خيرك) ولو ما لقيت زمن جيبا لينا وسخانة ونحن عندنا زمن للمكوة والغسيل إن شاء الله .
* وعشان ما تكسل وتقول المواصلات لو ما قادر تجي نحن بنجيك .
* معاي مجموعة عظيمة من الشباب والشابات ح ننفذ العمل ده مع بعض وح نوزع حتى في الولايات .
* لو داير تجينا بتلقانا في الخرطوم المقرن صحيفة (المواكب) غرب الحديقة النباتية ، أو الخرطوم شمال مستشفى الزيتونة صحيفة (قوون) .
* ما بنقبل قروش .
* ما بنقبل قروش .. لا تحويل رصيد ولا كاش .
* ملابس بس .
* عندنا أرقام تلفونات للتنسيق وكده .
* ما عندك ملابس قديمة وداير تشتغل معانا حبابك ألف.
* طرحت هذه المبادرة نهار أمس الأول بالإذاعة وقد كان التفاعل فوق الخيال وجاتنا كمية خيالية من الملابس في أقل من (٢٤) ساعة .
* أنا على ثقة (المليون قطعة دي) ح نجمعها في أقل من أسبوع وح نوزعها لحوالي (٢٥٠) ألف محتاج ومحتاجة بواقع أكثر من قطعة للشخص الواحد .
* كل المطلوب ما تخجل من العندك .
* أي قديم منك هو جديد لناس محتاجة.
* في ناس ليها زمن ما اشترت ملابس .
* في ناس ملابسها لم تعد صالحة للاستعمال.
* ناس بطلت (تمرق) خجلاً من ملابسهم .
* كثير من الأسر المتعففة والمحترمة هي بحاجة للدعم والمساعدة .
* بدون شتاء في ناس (عريانة) .
* نحن لن نغطي كل الناس ولكن سنعمل وفق المتاح وننتظر إعانة الله .
* ويبقى الراهن على هذا الشعب قائم ما بقيت الدنيا .
* قدم ما تملك .
* استنفر أهل بيتك ومن تحب .
* جيب قطعة قطعتين .
* جيب حتى شراب .
* فتيل الجرسلين تحسبه هين وهو عند المحتاج عظيم .
* كلنا مع بعض ممكن نحل مشكلة (٢٥٠) ألف محتاج ومحتاج .
* ثقة في الله ح ننجح .
* فقط اكرر .. لا نقبل قروش في هذه المبادرة والأرقام أدناه للتنسيق فقط .
* أرقام تلفونات الشباب :
أم تي إن : ٠٩٩٣٨٧٥٨٣٠
زين : ٠٩١١٣١٤٣٣٣ .
زين : ٠٩٠٠٣٠٠٩٧٩
زين : ٠٩١٢٤٩١٦٩٧ .
سوداني : ٠١١٥٧٧١٣٥٥
* نسأل الله التوفيق للجميع .
* ونركب صافنات ونجيبة (سودانية) واصلو الزول بيموت والذكرى تفضل حية.
* و..و..
* الله في .
بالتوفيق وفي ميزان حسناتكم جميعا وثبت الله أجركم… مبادرة أكثر من رائعة … جميل الاحساس بالغير … وأجمل أن ما تكتبه الان رصيد لك غدا …(وأصلو الزول بموت والكلمة تصبح حية) ,ومن حقك الانتماء والتشجيع ولي ذات الحق ويبقى الاحترام والمودة واتمنى الاعتدال وعدم التجريح أو الاساءة وكما قلت في عمودك كلنا مسلمين وكلنا سودانيين وحتى ندعو لبعضنا أحياءا ويترحم الجميع على بعضهم أمواتا لتكون زكرانا من المحاسن ولتكن البداية باسم العمود الجديد لا يكون كارثة هههه… وتحياتي لك
عندي مبادرة أطلقت عليها إسم (قديمك جديدنا) جزاك الله خير
كبير في نظرنا والله وللامام
بس عيبك هلالي ههههههه
بالتوفيق يارب
عمل رائع يستحق الثناء . . وفقكم اللة