طلاب الخلاوى يلقوها من عمر البشير ولا من الكاردينال؟

بالعربي الكسيح
محمد الطيب الأمين
طلاب الخلاوى يلقوها من عمر البشير ولا من الكاردينال؟

* في حلتنا نفس الشباب (البدقوا صيوان العرس هم ذاتهم البحفروا القبور وبيصلحوا الماسورة المكسورة).
* شباب (ضراعهم أخدر وأخوان بنات) ما شاء الله.
* بشتغلوا في أي حاجة.
* دق صيوان، حيطة وقعت، زول عايز يتبرعو ليهو بالدم.
* كل حاجة وبدون مقابل .
* وهذا موجود في كل حلة تقريباً (لو ما هسه زمان) .
* طبعا هسه في ظاهرة جديدة تسمى (البكايات) .
* البكايات ديل نسوان تدفعن ليهن قروش (أجرة) عشان يجن يبكن ليك لو عندك زول مات .
* والله صحي .
* الحاجة دي موجودة في الخرطوم ليها فترة .
* هم حوالي خمسة أو دستة نسوان كده .
* توريهم اسم الميت وكان شغال شنو وأولاده منو ومنو وكان بيحب شنو .
* توريهم الحاجات دي وتدفع ليهم حسب الاتفاق ويجن يبكن لما الله يغفر ليهن .
* لو دايرهن يبكن يوم واحد تدفع لو يومين تدفع أكتر .
* ولو كمان الجثمان جاي من بره البلد تدفع ليهن أجر إضافي عشان يمشن يبكن في مطار الخرطوم لحظة وصول الجثمان .
* هذه الظاهرة الغريبة والعجيبة يطبقها الآن رئيس الهلال الكاردينال بصورة فيها كثير من العبط .
* ظاهرة (الحشد مدفوع القيمة) هي من (بنات أفكار حكومة الإنقاذ الساقطة) .
* ناس المؤتمر الوطني عندهم شهادات عليا في الحشد وشراء الذمم .
* بيتفقوا مع (الرأس الكبير) وبيرسلوا ليهو عدد (3 حافلة روزا) .
* يلقط الأطفال والنسوان والرجال ويملأ الحافلة ويحصل الحشد .
* هذا الأسلوب يتبعه الكاردينال ولكنه لا يتقنه بالقدر الكافي .
* حتى في الحشد الكاردينال اشتر .
* ووالله العظيم أنا ما في حاجة مزعلاني غير (طلاب الخلاوى) .
* أطفال صغار يدرسون تعاليم الدين والقرءان في الخلاوى استغلتهم حكومة الإنقاذ من قبل وها هو الكاردينال يستغلهم بذات الطريقة .
* وأصلاً الكاردينال متأثر بالبشير وهذا يظهر في تصرفاته وحركاته .
* طلاب الخلاوى شقاوتهم شقاوة والله .
* تلتلوهم تلتلة شديد .
* من البشير وللكاردينال .. طلاب الخلاوى في معاناة حقيقية .
* ولا أعتقد أن هنالك فضيحة أكبر من أن تأتي هذه الحشود للتكريم وهي لا تعرف من هو المحتفى به .
* عليَّ بالقسم دي فضيحة .
* ناس جوا الاحتفال وما عارفين الكاردينال لاعب كورة ولا حكم راية ولا بوليس حركة .
* وهذا غباء مفضوح .
* معقولة أنت تحشد ناس من غير ما توريهم أنت منو وصفتك شنو؟
* ياخ حتى (البكايات) البيجيبوهن يبكن بالقروش في بيوت البكا بوروهن المرحوم كان شغال شنو .
* معقولة حتى أبجديات الحشد أنتو فاشلين فيها ؟
* أول مرة في حياتي أشوف لي زول يكرِّم نفسو (غلط) .
* زول ما يعرف يكرِّم نفسو دي جديدة علينا .
* صحيح أصلاً ما في زول طبيعي كده بيكرِّم نفسو لكن كمان لا يعقل أن تكرِّم نفسك غلط .
* وبعدين والله أنا لحدي الآن ما عارف مناسبة التكريم شنو؟
* سألت قالوا لأنو الكاردينال قدَّم للسودان الكثير.
* طيب كويس قدَّم للسودان ما عندنا مشكلة، الهيئة الاستشارية دي علاقتها شنو بتكريم زول قدَّم للسودان؟
* هي هيئة تابعة للهلال وليس لمجلس الوزراء .
* طالما الكاردينال قدَّم للسودان يبقى التكريم يفترض يكون من مجلس الوزاء أو من البرهان أو حميدتي أو غيروا .
* لكن الهيئة الاستشارية شغلها الهلال وبس .
* لو الهلال حقق كأس أفريقيا تقوم هذه الهيئة بتكريم اللاعبين والكاردينال .
* المنطق بقول كده .
* والسؤال الأهم.. ناس الهيئة الاستشارية ديل معقولة عندهم قروش يجيبوا بيها طلاب الخلاوى والنسوان وأحمد شوبير وإيجار قاعة الصداقة والضيافة؟
* الراجل كرَّم نفسو وحتى في تكريم نفسو فشل.
* وبعدين في ناس بتكلموا عن ثوار الهلال أو الأولتراس .
* الأولتراس عبَّروا عن الهلالاب ولا غبار على ذلك .
* الذي يقول إن الهتاف في وجود الضيوف عيب نقول له الغناء والرقيص و(زغبير يسأل في القبر) برضو عيب .
* التكريم في حد ذاته بدعة وفوضى وبالتالي ما صاحبه من أحداث لا يستغرب ولا نستنكره .
* الكاردينال بلغ مرحلة حرجة من النرجسية ويحتاج أن يفوق .
* اصحى يا كاردينال .
* زمن التحدي والتهديد انتهى يا كاردينال .
* حكاية أنا قاعد (25) سنة والكلام الما جايب حقو ده لو بينفع كان نفع البشير .
* البشير كان بيقول نفس كلام الكاردينال وكان بحشد الطرق الصوفية والأطفال والنسوان بنفس الطريقة دي .
* وفي النهاية سقط وشبع سقوط .
* نحن قضيتنا معاك فريق الكرة وبس .
* ما عندنا معاك شغلة تانية .
* تظبط فريق الكرة إن شاء الله تاني كل يوم بعد المغرب تكرِّم نفسك .
* بربطنا معاك الفريق وبس .
* المنشآت ذاتا لحدي هنا وكفاية، لا دايرين نادي أسري ولا نادي عاطفي .
* نحن ما فاضين للخزعبلات دي .
* هسه عليك الله الجبت بيهو شوبير ده ما كان جددت بيهو عقد بشة الصغير؟
* غايتو جنس غايتو .
* و..و..
* ونواصل.