عاد الحبيب المنتظر الليله عاد وربنا يبعدنا من اقلام السواد

تغريده واتساب
بقلم : معاذ ابومؤيد
عاد الحبيب المنتظر الليله عاد
وربنا يبعدنا من اقلام السواد

لما تكون عندك روابط في الخارج تقيف معاك بكل قوه تاكد انو مابتجيك عوجة….
لما يكون عندك عشاق بيعشقوا لون شعارك ويعطوك من غير من ولا أذى تأكد انو مابتحيك عوجة….
كاد موسم المريخ ان ينسف فتصدى عشاق المريخ في قطر للمهمة واثبتوا انو حب الكيان اهم عندهم من حب الابناء فضحوا بمالهم وجهدهم لانقاذ موسم المريخ …..
وتأتي الايام ووسط المريخ يعاني الضياع فتستلم رابطة المريخ بالامارات الراية بعد عجز لجنه التسيير عن انهاء معانات سلمون والرواية….
استلموا فقط جواز سلمون ليتم اعادته الي وسط المريخ سليم معافى ….
لم ادون اسماء ابطال رابطة الامارات عشان مابعرف فيهم ولا شخص لكن مريختهم وعملهم يجبرك علي الكتابة من دون البحث عن معلومة….
شكرا دكتور جار النبي شكرا رابطة الامارات وشفوتها اصلا عندنا شفوت في كل مكان ……
عاد سلمون الي مطار الخرطوم وعادت معه هيبة وسط المريخ بالاحساس قبل ان نرى البيان بالعمل في الميدان …..
صورة واحساس ساكت اعاد الي معظم القاعدة المريخية الاطمئنان…
*************************
معظم الجماهير والمحللين وشفوت المدرجات ومدربى القروبات اجمعوا علي الخلل في وسط الميدان ….
لذلك عودة سلمون تمثل الاطمئنان لعودة حيوية الوسط
ولكن نتمني من الجهاز الفني ان تكون العودة تدريجية حتي لو كلفنا ذلك عدم المغامرة به في مباراة الذهاب والاكتفاء بجزء يسير من المباراة….
لانو حوجتنا لسلمون في مباراة الاياب اكبر من مباراة الذهاب …
لن نتدخل في الشأن الفني ونكتفي بذلك لانو اهل الشأن ادرى بمهامهم
بس حبينا نقول بصوت مسموع
(العافية درجات)…..
**************************
نجي لاصحاب الأجندة والاقلام السوداء
كبار كتاب المريخ مافاضين يردوا عليك يالمنطط عينك ودواخلك وقلمك بنفس السواد
ماسطره قلمك بحق الزعيم والمارد الاحمر المريخ وممثل الوطن الوحيد وخت تحت الوحيد دي الف خط
لن ننجرف وراء اتهاماتك الصريحة والعلنية للمريخ بشراء ذمم الحكام بس حبيت اقول ليك الحمد لله للأن لم يظهر اي صحفي مريخي بجوار اي حكم في صورة!!!
وعشان كتابتك ماتكون مبتورة ارجع للتاريخ وامسح معاك السبورة!!!
لانو مسح التقارير ومسح النتائج ومسح الارقام لم تدون في سجلات المريخ!!
نكتفي بما كتبنا لانو عندنا الاهم والمهم والناس في حاله نفرة…
ونحمد الله برنامجنا مليان
ورددنا نيابة عن كتابنا الكبار عشان لكل مقام مقال…..
ومقالاتنا الصغيرة تكفي للرد علي مقالاتكم !!!
لو غلبك تراجع التاريخ التحكيمي وشبه الفساد ارجع لشيخ قوقل يفيدك صورة وصوت !!!
وبعديها غني مع نفسك منو الظالم ومنو المظلوم!!!
مع تعديل نص الظلم للرشوة والهدايا…….

**************************
تتواصل نفراتنا في كل ثبات وكل يوم يمضي شفوت اليوم يثبتوا مقولة الاجداد
المريخ مريخ السودان
الناس مابتعرف بعض والكل يدفع
الكل ينافس نفسه للوصول الي قائمة الشرف الداعمة
في ناس بشاركوا مرة ومرتين وثلاثة …..
وفي ناس بتشارك في اكتر من عشرة قروبات !!!
في حب ياخونا اكتر من كدة
شفوت واقفين وقفه معلمين ديل مسنترين الدعم بمفهوم واحد وحب واحد واحساس واحد …..
ومشرفين قروبات رسالة الدعم برسلوها مرة واحدة والاعضاء يرسلوها اكتر من مرة
بقينا ماعارفين المشرف من العضو….
قروبات ترفع لها القبعات والعمم عديل كدة
الواحد ماعارف قروبو من قروب الجيران نفس الكشف تلاقيه مكرر مع اختلاف الاسماء وتكرر بعض الاسماء في اكتر من قروب!!!
الدعم ثابت
والكشف متغير
والمستفيد مريخ السودان
**************************
لجنة المسابقات ماقصرتو بتأجيل اللقاءت !!!!
بس ردكم اتاخر حبة مفروض يكون من يوم التأهل للدور التاني….

**************************
ختاما
كشكش جيبك لو بجنيه
المريخ محتاج لكل جنيه
*************************
ونحن علي المدرج ونشجع ونتفرج وناس الالتراس لاذم يتوحدوا عشان نفضي ليكم شاخور عديل لو اتوحدتو ياناس الالتراس شاخور ذاتو مابشيلكم …
اتوحدوا من اجل الزعيم والكيان
اتوحدوا عشان نحسمها من امدرمان
عايزين الخمسين الف شفت يكون وراكم وينشدون معاكم
بروفاتكم ماشاء الله اكتر من بروفات ودالامين
يلا ياشفوت المدرجات
معركة سطيف محتاجة جيبك ومحتاجة حضورك
كشوفات الدعم اللافة في القروبات اتخيلها كشف عرس صاحبك مابتقيف معاه
اسه العريس عندنا المريخ
لاذم نقيف معاه……
جنيه منك او عشرة يساوي عند ناس المالية مليار!!
*************************
خارج النص
اخوي الشفت ……
المريخ الان محتاج لينا عشان لو وصلنا المجموعات تكون عافيتنا اكتملت وجانا من الاتحاد الافريقي حافز دوري المجموعات….
جنيه منك الان
فرحة للجميع غدا…..
المريخ مريخ السودان ومريخ الجميع
يوم السبت سيتم التسليم لامين الخزينة من جميع القروبات
سنكون نحن الرواااااد
ونفرتنا حتنقلها القنوات…….
*************************
همسة اخيرة
الناس القاشره بأسم المريخ وماليين الدنيا ضجيج يومكم ماجا لسه وحلتكم فوق النار بتنجض ختيناها في العين التانية جنب حلة ابجضوم وابحلقوم ….
المعركة الان مع وفاق سطيف
ومعركتكم جاية قريييييييب احسن تلموا الدور وماتفتكروا انكم وصلتو القمة …
ذي ماوصلتوا ممكن تنزلوا لان وصلوكم كان باسانسير وكان في غفلة من الزمن !!!!
لمو الدور وكفاية شو اعلامي …….
رسالتنا ليكم واضحة مامحتاجة تفسير ….
نخلص معركة سطيف ونشوف فهمكم شنو!!!!