عبرت ما عبرت

في السلك

بابكر سلك
عبرت ما عبرت

*أمة المريخ كلها ناقة في موضوع مباراة الأهلي القادمة
*هنا؟
*لأ
*هناك
*هناك؟
*لأ
*هنا
*جزء من أمة المريخ يرى أن الاتفاق على لعبها هناك غلط من الأول
*وجزء تاني شايف يعني فيها شنو يعني
*هنا وهناك واااحد
*وجزء شايف كان هنا كان هناك
*يانا المتكاملين رفيقنا وعلى الحتانة
*وجزء يرى أن ديمقراطية المريخ تساند رأي المجلس بلعبها هنا طالما كان قرار أغلبية
*المجلس؟؟؟؟
*المجلس دايرها وين؟؟؟؟
*أيها الناس
*خلونا واضحين
*لا ديمقراطية المريخ
*ولا المجلس
*ولا كلنا الذين نمثل أمة المريخ
*ولا تاتشرات الدعم السريع تستطيع أن تحدد مكان اللقاء
*من يستطيع حدد وانتهى
*استنفروا مشجعي المريخ في وسط البلد والدقي والعتبة
*وشوفوا ليهم ترحيل لإستاد السلام والسلام
*الموضوع ده ما تركزوا عليهو شديد
*بفقدكم التركيز على المباراة المهمة المقامة الثالثة ظهر غد الجمعة
*كورة الأهلي دي كورة أهل حسموها الأهل مع بعضهم وما تتدخلوا
*فيكم زول دافع حق طبق كشري؟؟؟؟؟
*طيب مالكم ومال أم تتلعب فين؟؟؟؟
*وقصة تتلعب هنا وتتلعب هناك دي
*بقت زي قون شيبوب في اتحاد الجزائر
*قعدنا في عبرت ما عبرت
*لغاية مازيمبي عبر وخلانا
*عشان كده حقو نخلينا فيما نقدر عليهو
*زول بقدر يحول محل الكورة دي مافي
*ولا السماني ذاتو
*أيها الناس
*ركزوا على كورة الجمعة
*الرزق تلاقيط
*خطوة ونفكر في البعدها
*لأنو لو فكرنا في الخطوة الجاية قبل ما نخطو الخطوة الأولى بنتشنقل
*وكان اتشنقلنا بننبشق
*وكان انبشقنا بنتشتت
*وكان اتشتتنا تاني ما بنتلم
*الكورة الجاية مهمة
*والنقاط درجات ورتب
*صن داونز سبعة دبابير
*عميد أظنو بقى
*المريخ رائد
*الأهلي رائد
*الجماعة لسه في دبورة التخريج من الكلية ديك
*نحن ماشين على عميد
*وهم ماشين على التجريد من الرتبة
*غايتو الكاف لو عمل الرتب العسكرية بالبطولات القارية
*أبو الهل ده يا يقعد مستجد طول العمر والكتف أزبليطة
*يا يشتري ليهو رتبة من سوق ليبيا
*فريق خلا
*أيها الناس
*إن تنصروا الله ينصركم
*أها
*نجي لي شمارات والي الخرتوم
*والينا المكلف بينا
*حا نكون من الصائمين ولا حا نشتت قبل ذلك قول لينا؟؟؟؟

سلك كهربا

ننساك كيف والكلب قال لما يؤلك مصر يبأ مصر…. فاهم يا الدلعادي؟؟؟
وإلى لقاء.