عتاب للجنة التطبيع ولوم لنادي سيمبا !!
قزاز ورذاذ
محمد الطيب الأمين
عتاب للجنة التطبيع ولوم لنادي سيمبا !!
* لا أنكر أنني أيام الطفولة كنت أظن أن (الشعيرية) تُزرع ولا تُصنع .
* كنت فاكرها زي (الجرجير) بيزرعوها زراعة .
* والغريبة إحساس الزراعة جاني في موضوع الشعيرية ولم أحس به في موضوع المكرونة .
* وقد اجتهدت كثيراً في سبيل أن أرى شجرة الشعيرية .
* وبعد كبرنا وكبرت احزانا عرفنا (٧) حاجات (٥) هي :
الشعيرية ما زراعة
والمريخ مهما طال ياهو ضل الهلال
وقناة الهلال ما حقت الهلال .
* وغايتو جنس غايتو .
* إختار الجهاز الفني لمنتخبنا الوطني (١٠) من نجوم الهلال للمنتخب .
* اختاروا عشرة ويفترض أن يختاروا (١٦) على أقل تقدير .
* منتخب السودان موجود الآن في الهلال.
* حاجة تفرح .
* مدرب المريخ قوميز مشى تنزانيا (يخطب) قاموا (عقدو) عليهو .
* سيمبا (شلب) مدرب (الإصيفر) في عملية خيانة لو سمعت بها عشة الجبل لغنت : (النجمة مشلوبة والنيسان الباترول مرغوبة) .
* سيمبا يا نار الضلع.
* إتخيل نصل مرحلة يُفضل فيها (الإبن آدم سيمبا على المريخ) .
* وبعد ده يجيك مريخابي تمهيدابي يقول ليك أنا مسجل في لوح الشرف الأفريقي.
* السجلك منو؟
* يقول ليك كيف ياخ أنا ما جبت كأس مانديلا.
* وكأس مانديلا ده يا الفالح جبتو على حساب منو ؟
* لعبت نهائي مانديلا مع الوداد ؟ قال لا .
* لعبت النهائي مع الترجي؟ قال لا .
* مع الأهلي المصري ؟ قال لا .
* مع الهلال السوداني ؟ قال لا .
* قوم على حيلك .
* مانديلا دورة لا تختلف كثيراً عن دورة بن ياس ودورة سيمبا المقامة الأربعاء القادم .
* مثل هذه الدورات الأفريقية القيمة حقتها فنية وليس أدبية.
* زي الدكتوراة بتاعت جمال الوالي .
* حاجة تكسف .
* الحمد لله بلغنا زمن نشوف فيهو الهلال بيفاوض اللاعب وبجيبو السودان وبعمل ليهو الكشف الطبي وبتمرن وبسجلو وكل ذلك في ظرف (٤٨) ساعة .
* ماشاء الله تبارك الله .
* قبل ما نسمع بالمفاوضات بنلقى اللاعب وصل ووقع.
* سرعة وجاهزية وحسم .
* لجنة التطبيع شغالة شغل على أعلى مستوى .
* وتركي آل الشيخ (سواي ما حداث) .
* التازي بتاع الجماعة (حداث ما سواي) .
* التازي أجر ليهم طيارة خاصة وحماسو فتر.
* تاني أسبوعين كده التازي ح يحظر أي رقم جاي من السودان.
* والله صحي .
* لو قعد يباريكم كده بيفلس.
* يوم مدرب هارب ويوم نجيلة محروقة ويقوم قرار من الفيفا .
* أنتو تازي واحد ما بعمل ليكم حاجة .
* دايرين ليكم تلاتة تازي بالميت كده .
* المهم.
* نوجه صوت لوم وعتاب للجنة التطبيع الهلالية .
* عتاب لأن اللجنة لم تقدم السنغالي انداي من خلال مؤتمر صحفي كبير .
* الحاجات دي مهمة يا الطاهر يونس .
* لاعب جاكم هدية من المستشار أقل حاجة يفترض تعملوا ليهو مؤتمر صحفي محترم .
* صاحب الهدية محترم والهدية محترمة يبقى ليه ما تعملوا مؤتمر عالمي لتقديم هذه الهدية ؟
* اتوقعت يكون في مؤتمر صحفي تنقله كل القنوات ويتم من خلاله شكر المستشار .
* الحاجة دي قيمتها كبيرة عند المستشار.
* زول شغال معاك بدون سقف يبقى من الواجب إنك تحفزو أكتر.
* وحكاية الزمن ضيق دي ما بتبرر عدم قيام مؤتمر صحفي .
* زمن شنو ؟
* ساعة واحدة قدم فيها اللاعب والموضوع إنتهى.
* الشغل ده مهم وبجيب شغل أكتر.
* ونحن عشمنا كبير في لجنة التطبيع ونتمنى أن لا تفوت عليهم مثل هذه الأشياء الصغيرة .
* ونركب صافنات ونجيبة (سعودية) واصلو الزول بيموت والذكرى تفضل حية .
* و..و..
* ولو تسافر دون رضانا بنشقى نحن العمر كلو …… (خاصة لو سافرت تنزانيا لسيمبا)
من الركاكة والغث هلكتونا يا كورة بهذا .. الصحافة المفترى عليها.. العربي المسيخ دا اصلو جاء من وين؟ مش كان قلبت قزاز ورز ازرق برضك تفضل العربي المسيخ.
قال عرف سبعة اشياء بعد كبر واحدة منها الشعيرية ما زراعة بس ما قال لينا ما عرف الاعلام هو الاعلام يا صحفي الغفلة لو وزارة الاعلام بها قامات امثال عمر الحاج موسي نوعك دا ما كان بقي صحفي انت سميت عمودك ( بالعربي الكسيح ) ليه ما عرفت انه العربي لغة القرآن ولسان خاتم النبيين والمرسلين ولغة اهل الجنة والان غيرت اسم العمود الي اسوأ من الاسم الاول قزاز ورزاز انا اسأل هل القزاز صناعة ام زراعة ههههههههههه يا أمة ضحكت من جهلها الأمم وتبآ لايام تفصح بومها
كلامك ياود الطيب اشعل النيران في صبيان اليخماو بقيادة ابو المستعار المندلاوي اليخماوي. غايتو يوم بتكتل ليك طبشابي😹😹😹
انت ومحمد لو طال الصفر بتحاولوا تقلدوا في الاستاذ المخضرم بابكر سلك والدكتور القامة الذي مرمط انف شداد دكتور مزمل ابو القاسم لكن هيهات هههههههههه البون شاسع في الاسلوب والفهم
يا محمد الطيب, خف شوية على سامر بابكر , يعني لما تكتب ما تجيب سيرة للاعب جديد او لآل الشيخ او لجنة التطبيع لانو الحاجات دي بتعمل كاروشة لبعض الناس. رجاء
اسلوب ركيك وفكر فاضي ومحتوي مافي مجرد مطاعنات قهاوي وكرونا زايده ولا بلاش كرونا دي حاكم بتعمل ليكم عقد
الشي الغريب تكاو في المريخ وشغالين بالمريخ وخزائنكم فاضيه ورصيدكم صفر
الشهاده طلعت
صفر انجازات
صفر كوره
صفر اخلاق
صفر صحافه
بالغربي كده لم ينجح احد
وا خجلتي
وا خجلتي انحن يحق لينا نصنع الجرجير ونزرع الشعريه بي حقنا يا معلم
بس سؤال لاي هلالابي متعصب هل الصفر ليه ضل ؟؟؟؟؟؟؟؟؟
عمودك دا قزاز ورزاز والقديم اسمه عربي كسيح يعني فسرت الماء بالماء طيب اديهو ندي القلعة تلحنه ليك ( قزازهم لينا شالوا رزاز عيننا وصفرهم عندهم ابدا ما لحقونا ) هههههههههههه