عندهم سبعة مفكوكين بقيادة التش وما قادرين يوفروا الف دولار للمدرب!!
صابنها
محمد عبد الماجد
عندهم سبعة مفكوكين بقيادة التش وما قادرين يوفروا الف دولار للمدرب!!
# الحصة الصباحية
ناس الحكومة في الخريف القادم ح يكون ما عندهم أي مشكلة…ما عشان استعداداتهم جيدة للخريف…ولكن عشان كل ما تصب مطرة وتطمبج الواطة ح يقولوا لينا (الدولة العميقة)..حتى لو كانت المطرة (نقناقة) ساكت.
عندي احساس السنة دي المطرة تصب بي (مناديل) ورقها.
………
• المريخاب وقت يقولوا ليهم الكلام دا بقعدوا يعملوها (زعل) – واحتجاجات …واعتراضات.
• ما برضو الكلام دا.
• لكن نحن كان يرضو او يزعلوا ..بنقول ليهم الكلام الجد.
• الايامات دي لو جبت سيرة (التش) لي مريخابي بيبلس (الكمامة) في اضنينه.
• اعملوا شير.
• برفع الكمامة من (النخرة) الى (الاضان)…ما عاوزين يسمعوا أي كلام عن (التش).
• هو التش براهو.
• التش ..ورمضان عجب ومحمد الرشيد وابوعشرين واحمد بيبو والسماني الصاوي ومنجد النيل.
• فريق كامل.
• سبعة لاعبين في المريخ انتهت فترة قيدهم في المريخ في مايو الحالي.
• سبعة لاعبين في المريخ هم احرار الآن.
• ما عندهم أي علاقة بالمريخ.
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• الجماعة ما قادرين يوفروا للمدرب التونسي المسلمي مرتبه الذي لا يتجاوز الـ (1000) دولار ح يقدوروا يوفروا قروش هذا السباعي كيف.
• التش براهو عاوز ليه ميزانية دولة عشان يعيد قيدو في المريخ لفترة جديدة.
• التش لعاب.
• التش حريف.
• التش خطير.
• التش موهوب.
• الكلام دا ابقوا قدرو.
• ما تنكروه.
• اعملوا شير.
• الكلام الفوق دا – ما يبقى ليكم حار وقت التسجيلات تفتح.
• ويا ريت لو وقفت على التش.
• رمضان عجب ..(خبرة) في المفاوضات – بعرف يطلع بالسمينة.
• رمضان عجب عارف بعمل في شنو؟.
• الزول دا كل ما يكون فترته انتهت في المريخ ..بطلع منهم بالكبيرة.
• بعرف ليهم كويس.
• عافي منك يا رمضان عجب.
• رمضان عجب اتجاوز الثلاثين …خليك حريف يا كابتن.
• دي اخر (قشة) ليك.
• وقشة ما تعتر ليك.
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• ابوعشرين …برضو عارف دي الفرصة الاخيرة ليه.
• ابوعشرين تاني ما عندو فرصة.
• اخر فرصة.
• العمر برضو ليه احكام.
• السماني الصاوي شاف (الدولار) – واتعود عليه.
• السماني الصاوي جرب الاحتراف في ليبيا.
• يعني ناس المريخ ما بقدروا يغشوه.
• منجد النيل حاسس بانه مظلوم والمريخ اكلو في سنة كاملة.
• السنة دي منجد النيل ح يأخذ حقو على دائر المليم.
• قرش ما بخليه ليكم.
• واسبوع ما بخليكم تزيدوه ليه في العقد.
• اعملوا شير.
• واحمد بيبو قال في تصريحات تلفزيونية انه بنظر للامر نظرة (احترافية).
• احمد بيبو قال (الكاش) بقلل النقاش.
• ابوه في الحتة دي ما بجاملو.
• ومحمد الرشيد (ارتكاز) بمواصفات عالمية.
• محمد الرشيد عاوز يعمل ليه (عمارة) في السوق العربي.
• دي فرصتك يا الرشيد.
• غيّر العربية.
• مالك ومال (ترحال).
• شيلوا شيلتكم يا ناس المريخ.
• تلت كشف الفريق مطلق السراح.
• سبعة من كشف المريخ …مفكوكين.
• المهم….(ما عاوز ادخل ليكم في التفاصيل).
• واطول ليكم في الموضوع.
• السنة دي ما في (مؤتمر وطني) يدفع ليكم ..ولا في حكومة ولاية.
• ح تفقدوا المؤتمر الوطني وتسجيلات اخر يوم.
• الخزينة الكانت مفتوحة لعصام الحاج ..اتقفلت.
• لا الفاتح عزالدين ولا عبدالرحيم محمد حسين.
• تاكلوا نيمكم براكم.
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• جهاز الامن والمخابرات الذي كان يقوم بتسجيلات المريخ وسداد المستحقات المادية ..شالوه برة.
• بلا جهاز امن بلا مخابرات معاكم.
• مخابراتكم غير تسجيل العجب وقلق والتش وسيف تيري ما شفنا ليها شيء.
• ناس جهاز الامن والمخابرات هم ذاتهم بقوا يفتشوا في حقوقهم.
• السنة دي ح تفقدوا صلاح قوش.
• جمال الوالي لو عندو (قروش) – خلوه يورينا شطارته.
• تبقى فصاحة ساكت في (القروبات).
• (اوكتاي) بقى في رقبتو.
• اوكتاي طالع ضدو امر قبض.
• ح تعلموا شنو في الاوضاع دي؟.
• الحال انكشف بعد تسريب مكالمة مدرب المريخ التونسي المسلمي.
• المسلمي قال نعيش اوضاع صعبة.
• المسلمي قال ما صرف راتبه الذي لا يتجاوز الف دولار.
• الغريبة المسلمي اعلن قبل ذلك بتبرعه بثلث راتبه لمكافحة الكورونا.
• يعني 660 دولار مجلس المريخ ما قادر يوفرها للمدرب المسلمي.
• ح تتصرفوا كيف مع التش.
• والله التش لا بعرف ليكم الظروف.
• ولا بعرف ليكم كورونا.
• لا المؤتمر الوطني.
• التش عاوز قروشو.
• ورمضان عجب عندو (بيت) من التسجيلات الفاتت بشطب فيه ما اكتمل.
• الناس ديل عاوزين قروشهم.
• عاوزين الدولار.
• للمعلومية التش ورمضان عجب والرشيد وبيبو ما بتسجلوا ليكم بالجنيه السوداني.
• قطع بس.
• الرباعي هذا مشترط تسجيله بالدولار.
• والدولار من سوداكال ما بطلع.
• سوداكال قاعد ليه 4 سنوات في السجن عشان رافض يطلع الدولار.
• عاوزين سوداكال يطلع ليكم الدولار للتش ورمضان عجب.
• دي تلقوها عند الغافل.
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• ابوعشرين ممكن يتفاوض معاكم بالجنيه السوداني.
• ومنجد النيل.
• السماني الصاوي ذاتو ممكن يجاملكم في الحتة دي.
• لكن التش في الحتة دي ابوه ما بعرفو.
• وكذلك رمضان عحب.
• ومحمد الرشيد.
• واحمد بيبو.
• مجلس ادارة ما قادر يوفر (كهربة) في شقة الجهاز الفني للمريخ ..راجيين منو شنو؟.
• يا التش الما بشوف من (الغربال) يبقى اعمى.
• الغربال عرفها.
• مشى يلعب في الجزائر.
• الغربال لعب في الهلال (البهدلة) دي ما بقدر عليها.
• بعدين يا جماعة خلونا نعترف.
• خلونا نقول الاوضاع بقت صعبة.
• الكلام دا للتش ورمضان عجب ومحمد الرشيد واطهر الطاهر ذاتو.
• نحن في زمن الاحتراف.
• أي لاعب يشوف مصلحتو وين؟.
• المهم….(ما عاوز ادخل ليكم في التفاصيل).
• واطول ليكم في الموضوع.
• …………
متاريس
• بالنسبة لي اهم شيء الهلال يسجل ياسر مزمل …اخطر مهاجم في البلد.
• ويسجل والي الدين خضر افضل لاعب وسط في السودان.
• بتمني اشوف كابتن بشير في الهلال.
• وكذلك ابراهيم كولينا نجم الاهلي مروي.
• بتمني احمد بيتر يرجع للهلال تاني.
• الهلال عاوز تسجيلات.
• الجماعة ديل مع اربعة من المريخ لو انتقلوا للهلال …الهلال ح يرجع تاني.
• هلال 2007.
• هلال 87.
• بالمناسبة حمزة الجقر نجم الاهلي عطبرة لاعب صاحب امكانيات مهولة ..بس مشكلته في بنيته الجسمانية الضعيفة.
• لكن الجقر لاعب ما ساهل.
• الجقر بعوّض حجمه بحركته الدائمة وقلبه الحار.
• شوفوا عبدالرؤوف الآن الافضل في الساحة مع بنيته الجسمانية الضعيفة.
• يعني (الحجم) في وجود الموهبة والمهارات العالية ما مشكلة.
• التش ذاتو شوفوه بعمل في شنو؟.
• المهم….(ما عاوز ادخل ليكم في التفاصيل).
• واطول ليكم في الموضوع.
• ……….
• الصبة الاخيرة / التش قال نفسو ومنى عينه يجيبو ليه تمرينه في قناة الهلال.
صحيفة ريمونتادا