فتحي بشير .. كتُوم وصبُور وما بقول لا !!

بالعربي الكسيح

محمد الطيب الأمين

فتحي بشير .. كتُوم وصبُور وما بقول لا !!

* لو كانت (الشمعة) تملك (لسان وشفتين) لما سكتت على هذا (الإستغلال البشع) الذي تتعرض له .
* تحرق نفسها وتبكي حتى تموت أو حتى (وصول الكهرباء) .
* أول ما الكهرباء تجي الناس بتنسى دور الشمعة .
* وفي ناس للأسف لما الكهرباء تجي (بينسوا يطفوا الشمعة) .
* بيخلوها (تحرق شبابها) حتى بعد حضور الكهرباء .
* مؤكد أن الشمعة (رضيانة) بالدور النبيل الذي تلعبه عند انقطاع التيار الكهربائي .
* ما عندها مشكلة تحترق عشان تضوي ليكم في الظلام .
* ولكن أكيد أن الشمعة غير سعيدة بحرقها في (أعياد الميلاد) .
* عيد الميلاد ليس من اختصاص الشمعة .
* (ولدك تم سنة) وأنت داير تحتفل بعيد ميلادو .. الشمعة دخلها شنو في الموضوع ده ؟
* مسكينة الشمعة ما عارفة تلقاها من ناس الكهرباء ولا من ناس أعياد الميلاد .
* ليس هنالك (أنبل) من الشمعة .
* الدور الذي تقوم به الشمعة في حياتنا يعجز عنه حتى (الإنسان) مع بني جلدته .
* وبما أن ذلك كذلك فإن المدرب المحترم فتحي بشير هو (الرجل الشمعة في نادي الهلال) .
* شمعة وشامة .
* لا يوجد إختلاف كبير بين (فتحي بشير والشمعة) .
* نفس الإحتراق.
* نفس الصمت .
* نفس الدموع .
* نفس الحب والنُبل .
* فتحي بشير رجل في غاية الأدب والإحترام والإخلاص.
* مُحب للهلال وعاشق لعمله .
* كلما (قطعت الكهرباء) استعان الهلال بفتحي بشير .
* أي زنقة بيحلها فتحي بشير .
* مدرب طوارئ لا يتأخر لحظة عندما ينادي منادي الهلال.
* لا بقول بتدوني كم ولا بيقول عندي متأخرات.
* وهب سنين عمره الغالية خدمةً للهلال .
* يمشي مصطفى يونس وطاقمه المعاون .. ينادي الهلال فتحي بشير .
* يمشي ريكاردو وطاقمه .. ينادي المنادي فتحي بشير .
* يمشي ميشو وطاقمه .. تتم الاستعانة بفتحي بشير .
* يمشي كامبوس وطاقمه .. يأتي فتحي بشير .
* يمشي سانتوس وأعوانه .. يظهر فتحي بشير .
* يمشي بلاتشي ويمشي كافالي وباترك وطارق العشري والكوكي والنابي وحمادة صدقي .
* يمشوا بالإقالة أو الإستقالة فتتم الاستعانة بالشمعة الزرقاء فتحي بشير.
* رجل يعتبر هو (كاتم أسرار) نادي الهلال .
* بل هو هلال يمشي بين الناس .
* ما بزعل .
* ولا بغضب .
* ولا بأخد موقف من الهلال .
* زول دواخلو نضيفة وقلبو أبيض.
* وفوق هذا كله يحب الهلال بجنون .
* الهلال بالنسبة لفتحي بشير حياة .
* كتُوم وصبُور وما بقول لا .
* ودوهو الشباب .. مشى .
* ودوهو الرديف .. مشى .
* ودوهو .. الشارع .. مشى وجاء بكل أدب.
* بل في مرات كثيرة كان الهلال يسافر لاداء مباراة أفريقية خارج الوطن بصحبة جهاز فني جديد ويترك فتحي بشير في الخرطوم حتى يشرف بدنياً على تدريبات اللاعبين المبعدين من الرحلة .
* راضي ومرضِي وود حلال .
* مدرب لياقة بدنية مؤهل وشاطر وعارف شغلو .
* أنا أكتب عن هذا الرجل ولم ألتقيه في حياتي .
* ولكنني أحفظ له مواقف مشرفة وكبيرة مع الهلال .
* مواقف تجعلك تحترمه وتُعجب به .
* أتمنى من أهل الهلال أن يكرموا هذا الرجل .
* وأتمنى من لجنة التطبيع أن تتفقد حاله واحواله.
* كرموا فتحي بشير بالقروش والهدايا الفاخرة .
* وخلوهو موجود في الهلال حتى في وجود المدرب الأجنبي .
* تحية تقدير ومحبة لهذا الرجل النادر ونسأل الله أن يوفقه دوماً.
* ونركب صافنات ونجيبة (هلالابية) واصلو الزول بيموت والذكرى تفضل حية .
* و..و..
* وأنا في شخصك بحترم … (الشمعة) .