فرحة أحمد هارون !!!
وان طال السفر
محمد عبدالماجد
• في حلتنا زمان كان معانا طالب.
• ما عندو قضية بالقراية.
• لا عندو كراس رياضيات ولا كتاب نحو ومحفوظات.
• جدول اتنين ما حفظو إلّا لمن ترك المدرسة.
• لمن بقى كبير ، ودخل السوق.
• حفظ جدول اتنين، عشان يغالط بيه.
• جنو غلاط.
• ما بدخل العشرة الأوائل إلّا في (جر الحبل).
• قطع نفسنا.
• الزول دا يوم توزيع النتائج قال لينا حاجة.
• قال لينا اسمعوا انا لو جيت في العشرة الاوائل، أوعكم تصفقوا لي.
• ما عاوز زول يصفق لي.
• قلنا ليه: ليه يا ابوالشباب، لو ما صفقنا ليك انت نصفق لي منو؟.
• قال لينا : أبداً ، بس خايف الصفقة تفرق معاي تاني وقت اطلع من العشرة الاوائل.
• ما عاوز اتعود على الصفقة.
• عشان كدا خلوني على طبيعتي.
• خلوني على سجيتي.
• ما في زول يصفق لي.
• عاوز اكون (تلقائي) كدا.
• احمد هارون – ماشي ليكم عليه ، اصبروا بس!!.
• السلم التعليمي زمان كان على هذا النحو.
• الصف الاول.
• الصف التاني.
• الصف الثالث.
• الصف الرابع.
• الصف الخامس.
• الصف السادس.
• وبس.
• الصف الرابع صف (الاعادة).
• دي مرحلة (الابتدائي).
• الصف الخامس شبابيكه دائما بتكون فاتحة.
• ما عارف السر في ذلك شنو؟.
• صيف وشتاء.
• وناس الصف الرابع عندهم (قواعد) ، زي البانسلين.
• ما بتتبلع.
• كلام ساكت.
• وكتاب الجغرافيا دائماً ما فيه (غلاف).
• نحن قرينا كدا.
• عشان كدا بنعاني من حبة شفقة.
• هسع السلم التعليمي في مرحلة الاساس زادوا ليه (صفين).
• جنهم صفوف.
• بقى صف الرغيف.
• وصف الغاز.
• وصف البنزين.
• وصف الصرافات الآلية.
• وصف الهجرة.
• وصف الكورة.
• وصف التقديم للجامعات.
• وصف المواصلات.
• دا (الأساس) في البلد دي.
• أحمد هارون – ماشي ليكم عليه ، اصبروا بس.
• الدنيا طارت يعني.
• عندنا قريبنا رجع من روسيا.
• رجع أحمر زي الطماطم.
• بقى روسي إلّا شوية.
• الموية دي لو ما قالها بالروسي ما بيشربها.
• 15 سنة في روسيا، (مسكول) ما عملو.
• قريبنا دا اول ما رجع من روسيا، شبكنا ليك (نقة).
• حاجة ما جابها لينا.
• ونحن ما ناس (نقة).
• يوم قاعدين معاه في ضل الشجرة، قال لينا عارفين الروس ديل اتقدموا ليه؟.
• قلنا ليه اتقدموا ليه؟.
• قال لينا بيأكلوا البطيخ بي قشرو.
• قلنا ليه كان للقشر هينة، بس نحن خايفين تكون في حاجات تانية نحن ما بنقدر عليها.
• كان اكل القشر بيطورنا، بنأكله.
• يعني بقت على (القشر).
• احمد هارون – ماشي ليكم عليه، اصبروا بس.
• الضيق ما سمح.
• قالوا ليك فنان شاب مشى التلفزيون، عشان يغني ليهم.
• المذيعة لي شلاقتها قالت ليه: جديدك شنو يا استاذ؟.
• طلع ليها (الشُرابات).
• يعني (الجوارب).
• المذيعة اتشلاقت تاني، وقالت ليه : طيب يا استاذ انت إتأثرت بي منو في مسيرتك الفنية الكبيرة؟.
• قال ليها : بالوالد.
• المذيعة قالت ليه الوالد كان فنان؟.
• قال ليها : أبداً كان حداد عادي كدا.
• المذيعة قالت ليه طيب الوالد أثر فيك بي شنو؟.
• قال ليها: الوالد الله يرحمه كان بيعمل (شبابيك) عجيبة.
• أي زول بشوفها بقول ليه: والله انت زول (فنان)، من هنا اتفجرت موهبتي، وانتي عارفة ابن الوز عوام.
• المذيعة طوالي، قالت نطلع فاصل اعلاني ونرجع تاني.
• انتوا قايلنها تاني رجعت!!.
• ناس قناة الملاعب ديل، عاوز أسألهم سؤال، قبل ما نمشي على احمد هارون.
• ناس قناة الملاعب ليه اللقطة ما قاعدين يعيدوها.
• بس فالحين لي في اعادة اعتداء اوتارا على لاعب الامل.
• دي الحاجة الوحيدة القدرو عليها.
• تاني ما عندهم (اعادة).
• لا قاعدين يعيدوا الهدف.
• ولا بعيدوا اللقطة.
• ولا بعيدوا المباراة.
• خاصة في المباريات التى لا تكون القمة طرفاً فيها.
• انتوا يا ناس الملاعب (الاعادة) دي وزارة التربية قاعدة تدفعكم عليها رسوم.
• مالكم صعبتوها علينا كدا.
• شبعونا في (الاعادة) عليكم الله.
• كمان عاوزين تعملوا ليكم صف للاعادة.
• ندخل على احمد هارون.
• كفاية كدا.
• عندما سجل أبكر سليمان هدف هلال الابيض في الدقيقة 38 من عمر المباراة ، كان احتفال والي ولاية شمال كردفان احمد هارون أكتر من احتفال ابكر سليمان الذي سجل في مرمى الهلال.
• احتفال هيستيري كدا.
• فرحة مبالغ فيها.
• اتذكرنا ايام احتفالات الدفاع الشعبي، وعرس الشهيد.
• كاميرا الملاعب ذاتها خلت صاحب الهدف وذهبت للمقصورة لنقل فرحة احمد هارون وهو يحتفل بالهدف ويلوح بيديه وسط مجموعة من اعضاء حكومته.
• فرحة الوالي لا يمكن تجاوزها.
• ولاية شمال كردفان الايامات دي لا فيها بنزين ولا فيها جاز ولا فيها غاز، وصفوف (العيش) أطول من صفوف مباراة الهلال وهلال الابيض.
• والسيد الوالي قاعد يحتفل لي بي هدف أبكر سليمان.
• والي ولاية شمال كردفان ترك كل هذه الازمات ، وجاء ليحتفل بهدف ابكر سليمان في مرحلة من مراحل الدوري غير المهمة.
• هدف ابكر سليمان ح يبقى (غاز).
• ح يبقى (رغيف).
• ح يبقى ليكم (بنزين).
• عشان تحتفل بيه كدا.
• هلال الابيض في النهاية سوف يتأهل لمجموعة النخبة دون النظر لهدف ابكر سليمان في الهلال.
• احمد هارون لو كانت (فرحته) تلك في مباراة لهلال الابيض في البطولات الافريقية ، كنا قلنا (قومية).
• ما في مشكلة.
• ولو كان الهدف في مباراة بطولة محلياً، كنا وجدنا العذر لوالي ولاية شمال كردفان.
• ولو كانت في مباراة حاسمة كنا قبلنا.
• لكن الهدف في مرحلة لا قيمة لها في الدوري الممتاز، وقد جاء هدف ابكر سليمان بعد ان خرج هلال الابيض من بطولة الكونفدرالية.
• يعني ما في أي داعي للفرحة دي.
• خاصة مع أزمة (الوقود) دي.
• ما في مسؤول الايامات دي يفرح.
• احمد هارون فرح بالهدف الذي جاء في الشوط الاول ، وما عارف ان المباراة فيها شوط تاني.
• أحمد هارون ما عارف ناس بشة ديل عندهم كلام تاني.
• ناس شيبوب يوزعو فيها متل (الموسيقي).
• وجيوفاني ما بيسكت.
• ما بقبل بالكلام دا.
• جيوفاني وقت الضيق.
• بسجل ..بسجل.
• سيادة والي ولاية شمال كردفان ، نقول ليك شيء ، الهلال قبل مباراة هلال الابيض 47 مباراة ما خسرها.
• آخر خسارة للهلال في الدوري كانت قبل سنتين.
• يعني وقت تجيبوا ليكم هدف في الهلال امسكوا نفسكم شوية.
• المباراة فيها شوط تاني.
• والي ولاية شمال كردفان، مباريات فريقه في الابيض لا يشاهدها من الملعب عندما يلعب هلال الابيض امام المريخ (الوصيف).
• ووالي ولاية شمال كردفان لا يزور معسكر فريقه، ويتغدى مع اللاعبين عندما يكون لفريقه مباراة مع المريخ.
• الحاجات دي كلها بيعملوها مع الهلال.
• واحمد هارون ليس براه.
• كل الاندية التى يلعب أمامها الهلال في الولايات تلعب أمام الهلال بتلك الدوافع والمغريات والمحفزات.
• عشان كدا في أي مباراة للهلال بقينا نفقد لاعب.
• في عطبرة فقدنا شيبولا أمام الامل بسبب الضرب.
• وفقدنا امام الامل نزار حامد في الموسم السابق.
• وفي ام درمان فقدنا شلش هذا الموسم امام الامل.
• الامل لو استمر بهذه الطريقة بيغادر الممتاز.
• الهلال هو الهلال.
• أمام هلال الابيض فقدنا شيبولا في توقيت محرج والهلال مقبل على مباراة هامة في الكونفدرالية.
• كل هذه الاعتداءات تقع على لاعبي الهلال ويمكن ان تقع على بص الهلال كمان، كما حدث في القضارف.
• جيوفاني في كل مباريات الهلال بيتعرض لضرب تقيل.
• والحكام بتفرجوا.
• البرازيلي دا ، أنا ما عارف قوة القلب دي جابها من وين؟.
• نحن لا ننكر ان مثل هذه الدوافع تنفع الهلال وتجعل الازرق يستفيد كثيراً من تلك المباريات.
• ولهذا فان الفرق بين الهلال والمريخ كبير.
• المريخ في الوسم السابق لقى الفرق متهاونة معاه ، وبقى يضرب فيها بالاربعات والستات.
• الى ان جاء المريخ ولعب أمام الهلال وهزمه الهلال بهدفين وأوقفه في حده وشال البطولة.
• مريخ الفاشر أمس كان في (نزهة) مع المريخ.
• تراخي وتهاون، وطراوة.
• مريخ الفاشر في الموسم السابق من الضرب والعك الذي لعب به امام الهلال المباراة لم تكتمل.
• الهلال استفاد من الدوري الممتاز رغم الاصابات التى لحقت بلاعبيه.
• وكله يهون بالتأكيد عشان الهلال.
• وأظن ان شيبوب وبشة وجيوفاني عرفوا كيف يردوا على والي ولاية شمال كردفان.
• هكذا يكون الاحتفال.
• داخل الملعب.
• وهكذا تكون الصدارة خالصة للهلال.
• ……………
• ملحوظة : وبقينا على المغرب.
هوامش
• نعود لاحقاً لنكتب عن (الجواز) البرازيلي.
• نشوف باقى القصة بس.
• ونعرف ح تودينا لي وين؟.
• الذين يتحدثوا عن ان المدافع الجزائري سوف يكون بديلا لاوتارا ، نقول ليهم طيب عملتوا شنو؟.
• اذا كان الهلال سوف يأتي بمدافع محترف ويستغني عن مدافع محترف بكون ما عمل أي حاجة.
• الهلال عنده نقص عددي في الدفاع.
• الدمازين مصاب.
• والمعتصم بعيد.
• والجريف كتير الايقافات بسبب طبيعة خانته.
• وكولا يفتقد للخبرة ، ويحتاج للمزيد من الصبر.
• اذا استغنى الهلال عن اوتارا سوف تكون كارثة.
• وسوف تظل المشكلة.
• الهلال في حاجة لمدافع الى جانب الاسماء التى تلعب الآن.
• بعدين الاستغناء عن أي لاعب مسجل في الكشف الافريقي سوف يكون مجرد (حماقة).
• لاعب اسمه في الكشف الافريقي يجب الحفاظ عليه.
• خاصة اذا كان عنصر اساسي في التشكيلة.
• ما تتبظوا عينكم.
• سيف تيري مع الاسماء الموجودة في الهجوم يمكن ان يسد الحاجة اذا لم يجنس الهلال محترفا آخر لدواعي وطنية.
• وابقوا على سفر.
• …………
• عاجل : الفرحة وقت يكون لونها أحمر حدها قريب.
حمل تطبيق كورة سودانية لتصفح أسرع وأسهل
لزوارنا من السودان متجر موبايل1
http://www.1mobile.com/net.koorasudan.app-2451076.html
2,456حملوh التطبيق
لزوارنا من جميع انحاء العالم من متجر قوقل
https://play.google.com/store/apps/details?id=net.koorasudan.app
17756 حملو التطبيق
على متجر apkpure
على متجر facequizz
http://www.facequizz.com/android/apk/1995361/
على متجر mobogenie
https://www.mobogenie.com/download-net.koorasudan.app-3573651.html
على متجر apk-dl
على متجر apkname
https://apkname.com/ar/net.koorasudan.app
