صابنها
محمد عبد الماجد
فيضان (السوباط) على المريخاب إتخاذ الحيطة والحذر!!
· بشيء او اخر البلد دي خيرها مرتبط بالهلال…عندما يكون الهلال بخير – البلد دي كلها بتكون بي خير.
· في شندي زمان كان في كشك بتاع باسطة ..وقت الهلال يكون غالب الباسطة من العصر بتنتهي.
· يمين نحن عندنا ناس اعراسهم وأفراحهم وعودتهم للبلد بيربطوها بانتصارات الهلال.
· مشكلة (الوقود) اتحلت بعد ان سجل الهلال بوجبا وياسر مزمل.
· بوجبا دا خلى ليك ناس المريخ يفتشوا في (الرباط الصليبي).
· انتوا الناس ديل ما بخجلوا.
· مشكلة (الرغيف) سوف تنحل بشكل نهائي ان شاءالله وتنتهي الصفوف بعد تسجيل الغربال وعزام ود البيه في الهلال.
· كمان يا ناس الهلال عاوزين تجيبوا (ود البيه) عديل كدا.
· الناس ديل جبتوا ليهم (نفسيات).
· في مريخابي كل يوم بيلاقيني الصباح وبقول لي : الليلة سجلتو منو؟
· بيسأل ونفسو مقطوع.
· المريخابي بقى (ضعيف) من تسجيلات الهلال.
· المسكين عاوز يروح فيها.
· البلد دي خيرها في (هلالها).
· عكسيات (تنقا) بتنعكس على الناس في (حلة الملاح).
· في ارتباط عجيب.
· اقوان والي الدين محمد عبدالله بتظهر في وجوه الناس.
· تمريرات هيثم مصطفى كانت مثل (المصل) تشيل الفتر والكسل ووجع العيون.
· هوبة مهند الطاهر تطعّم بيها الشاي والقهوة وتمرق بيها على الجيران.
· اقوان مدثر كاريكا تتريح بيها.
· تشات بشة تولع بيها النار.
· علاقة الهلال بالوطن كدا – يسكن في صباحاته ويمشي في عصب امسياته.
· السنة دي نحن شفنا فيضان النيل (الازرق).
· وشفنا فيضان النيل (الابيض).
· وقلنا لي ناس المريخ شيلوا شيلتكم.
· نحن ما كنا فاكرين فيضان (السوباط) بيجي يفوت فيضان الازرق والابيض.
· ناس الارصاد الجوي وناس الدفاع المدني طلّعوا تحذيراتهم وقت شافوا ابوعشرين في الهلال.
· ناس الارصاد الجوي وناس الدفاع المدني قالوا على المريخاب اتخاذ (الحيطة والحذر).
· ناس المريخ فهموها الحيطة والرباط الصليبي.
· فهمهم كدا.
· نحن نعمل ليهم شنو؟
· الهلال بدخل في هذا (العمق).
· الهلال (وطن).
· الهلال (اسرة).
· بتذكر (ابوي) ما كان عندو علاقة بالكورة كبيرة لكن كان كل ما يجيبوا سيرة الهلال بيقول ليك : الهلال دا فريق عظيم.
· الوالدة كانت بتنتظر انتصار الهلال عشان (ترص) العشاء.
· الهلال كدا وطن واسرة ، وعلاقات.
· الهلال بظهر في هدوم العيد بتاعة الشفع.
· اولادنا كلهم لمن تجيب ليهم شيء (حمراء) ما بيلبسوها.
· طبيعة كدا.
· يمين الغيم والمطرة مرتبطات عندنا بالهلال.
· غايتو عزام عادل لو جابوه الهلال ناس صلاح نمر احسن يشوفوا ليهم بلد.
· بعد الثورة طبيعي كان يحدث هذا في الهلال.
· الهلال حصلت فيه (ثورة).
· في العهد البائد ، تعرض الهلال لأسوأ انواع الظلم ، اقتلعوا من الهلال بطولة كان يتصدرها الهلال بفارق (9) نقاط من الوصيف بعد خسارة المريخ امام الاهلي مدني في الكاملين.
· سمكروا للمريخ شكاوي ضد هلال كادوقلي والأمل عطبرة ليمنحوه نقاط تلك المباريات ويجبروا الهلال على الانسحاب.
· في 2018 قدم مريخ الفاشر (شكوى) في (كاس) من فضة عندما اشرك لاعبا موقوفا ومرر لهم المعلومة بعد ان تأكد مريخ الفاشر ان نقاط انتصارهم على المريخ لن تفيدهم في شيء.
· كان البرلمان يتدخل في الشأن الفني ..وكان الاتحاد العام يدار بتلفون من جمال الوالي وكان جهاز الامن والمخابرات في خدمة المريخ ، خاصة في فترة التسجيلات.
· الآن وبعد الثورة انكشفت تسجيلات المريخ ، لم يستطع المريخ غير تسجيل سيف الدمازين الذي لعب في الاهلي عطبرة قبل 2013 وعبدالرحمن كرنقو الذي سبق للمريخ ان سجله في عام 2011 وهو مع المنتخب الذي يشارك في بطولة سيكافا خارج البلاد.
· مررنا بعهد صعب …حتى بعد سقوط النظام السابق ، الاوضاع كانت صعبة ، لكن فيما يبدو ان الاحوال ان شاءالله سوف تنعدل…والبلاد سوف تنعم بخيراتها وسوف تنتهي المعاناة قريبا ، طالما ان الاوضاع في الهلال تعدلت.
· الهلال مرآة لهذا الوطن – هو هكذا خرج من سلالة (وطنية) ، وتكون وتأسس على ايدي نادي الخريجين من اجل النضال ضد الاستعمار والعمل من اجل الوطن.
· التسجيلات الشفناها دي بتعكس على حياة الناس.
· في شغلهم.
· وفي معيشتهم.
· وفي حركتهم.
· الاوضاع ح تنصلح ان شاءالله.
· يظهر ذلك بوضوح في الهلال.
· تاني طلب الفول بجيبوا ليك معاه (سمكة).
· يمين ناس مجاهد فاروق ديل الكورة يدخلوها ليك في (عين) الحارس.
· تاني الشاي طبيعي كدا معاه موية صحة.
· ومعاه كمان كيكة.
· دي ما تسجيلات يشربوا فيها الشاي سادة.
· مريخابي قالوا ليه الهلال سجل ابوعشرين.
· نفسو اتقطع.
· قالوا ليه وسجل ياسر مزمل.
· قلبو وقف.
· قالوا ليه وسجل بوجبا.
· عيونو مرقت.
· قبل ما يقولوا ليه الهلال سجل فيني كومبي روحو طلعت.
· جاءوا ناس المرور استلموه.
· ما عارف انا علاقة ناس المرور بالموضوع دا شنو؟
· والله نحن الهلال الشايفنو دا لو قالوا لينا احلموا بيه ما بنحلم بيه للدرجة دي.
· يعني لو كنت بتحلم ما بتتخيل ابوعشرين يجي يلعب في الهلال.
· زمان لمن يقولوا ليك الهلال سجل بوجبا…بتقول ليهم انتوا كمان ما تبالغوا.
· طيب وقت يقولوا ليك الهلال سجل بوجبا ومعاه ياسر مزمل تقول شنو؟
· عليكم الله هسع الواحد لو ركبوا ليه (ماكينة) بتاعة خيال (هندي) ممكن تتخيل اطراف الهلال يكونوا ادم الدالي واستيفن زوي.
· يمين ديل (الفرجة) فيهم ساكت بتجيب لفة الرأس.
· ومؤيد عابدين اخصائي التفاصيل الصغيرة..الكورة بمررها ليك تحت اقدامك.
· قالوا ليك مريخابي قالوا ليه الهلال سجل ابوعشرين ووضاح وبوجبا ومجاهد فاروق ومنير ود نوباوي وياسر مزمل وجيسي وفيني واوتارا.
· المريخابي قال ليهم والله نحن لو عارفين كدا كان (البشير) مسكنا فيه بي اسنانا.
· مريخابي طقاهو ثعبان ولدغتو عقرب ودخل فيه قطر وقع فيه صاروخ …حالتو بقت بين الحياة والموت.
· اهلو لموه قطعة قطعة ومشوا بيه جري على الحوادث.
· الدكتور فقد فيه الامل ..مسك ايدو يشوف النبض ..قال ليه انت العمل فيك كدا شنو؟ الثعبان ولّا العقرب ولّا القطر ولّا الصاروخ ؟
· المريخابي قال ليه لا الثعبان ولا العقرب ولا القطر ولا الصاروخ يا دكتور ..العملها فيني ابوعشرين.
· اصلو الثعبان ما عندو ذنب.
· كمان لدغة ابوعشرين منها والقبر.
· ………….
متاريس
· لجنة التطبيع لو بتفكر تشطب فارس او السمؤال او نزار حامد يكونوا ما عملوا أي حاجة.
· استمرارية الشيخ في خانات الشباب ضرورية.
· موهبة مثل موهبة الشيخ يجب الاحتفاظ بها ورعايتها.
· في الهلال في اكثر من 10 لاعبين يمكن ان يغادروا الكشف…ماشين على السمؤال ونزار حامد وفارس عبدالله في شنو؟
· فارس وسمؤال اطراف (المنتخب) الوطني …مجنون من يفكر الاستغناء من أي واحد فيهم.
· نزار حامد مع بوجبا وعبدالرؤوف ومجاهد فاروق ح يعمل عمائل.
· اديروا ملف الشطب بحنكة وحكمة.
· نحن ندرك ان كل هذه الاخبار …اجتهادات اعلامية.
· ندرك ان لجنة تطبيع الهلال لن تقع في هذه الاخطاء.
· الناس ديل ما بعملوا كدا.
· الهلال سجل ابوعشرين وكديابا …وهذا يعني امكانية الاستغناء من حارسين.
· الابقاء على جمال سالم امر مهم وضروري.
· مجلس الهلال الذي دفع كل هذه الاموال لن يفشل في توفير مرتب جمال سالم.
· اذا قدم المريخ لاطهر الطاهر (45) مليار وهو غير محتاج لهذا اللاعب ، ممكن المريخ يدفع كم في جمال سالم.
· لا نريد لمجلس الهلال ان يقدم هدايا للمريخ كما كان يفعل مجلس الكاردينال.
· فارس وسمؤال ونزار حامد وجمال سالم والشيخ …اي واحد يلقاه المريخ سوف يكون بالنسبة له صفقة العمر.
· محمد موسى ايضا شطبه يعني رحيله للمريخ.
· لذلك لا بد من معالجة هذا الامر بحكمة وذكاء.
· يمكن اعارة محمد موسي لهلال الابيض.
· ويمكن اعارة احد الاسماء المنضمة حديثا للهلال اذا وصل الامر الى فارس او سمؤال او نزار حامد.
· ممكن اعارة عيد مقدم او كديابا في حالة تسجيل محمد عبدالرحمن.
· عزام عادل لاعب يشبه الهلال …وهو تشكيلة مختلفة عن كل اللاعبين.
· نثق ان الطاهر يونس وعبدالمهيمن سوف يجدوا الحل الاصل لهذه الامور.
· اصلو ما في خوف.
· …………
· ترس اخير : فيضان السوباط طبيعي يتدفق في ابوعشرين.
ابوعشرين شنو المريخ كان فيه اسطرة حراس المرمي بريمة مش ماسورة محلي خليكم في المحلي لم الصفر يجلي يقع في السوباط مثل غيره احبابنا الاولين
محمد عبد الماجد يجيد اللعب على صفحات الصحف فقط وباكر جماهير المريخ عندها زفة للعجب والرشيد الى المعبرة وبالعديل والزين وصدقني برضو ياهو المدعوم وباكر ينضرب نهارا والمريخ به نجوم من ذهب ود البيه البتتكلم عنه باكر تشوف ون تو مع التش والسماني والعقرب وتيري وريفرا محمد عباس شيكان وافرح واصل الفرحة حدها ايام التسجيلات لكن تاني المريخ ان شاء الله يطول انتظاركم لتنتصروا عليه والرشيد وعجب وابوعشرين ٣ سنة ما صعدوا بالمريخ لدور متقدم اهو تمهيدي ومع كل التطاول والفيضان والنكات والكلام الكتير والهضربة باكر نلتقي ونشوف المدعوم بالمليارات التوانسة والمغاربة وابناء النيل يركبوه طيارات وداخليا ناس سيما والتش وتيري وعزام والدمازين العملاق يوروهو النجوم عز النهار. والعب على الخروف وطبعا اللعب مثل الحلم مجانا.
وجه رئيس لجنة تطبيع الهلال هشام حسن السوباط بتسفير لاعب الفريق نزار حامد الى المانيا من اجل العلاج وذلك بعد الاصابة التي تعرض لها في مواجهة القمة وكان اللاعب قد عاد من اصابة خطيرة ومؤثرة وتدرج في العودة الى الملاعب مما افقده حساسية المباريات واحتاج لنصف موسم ليعود الى الملاعب قبل ان يتعرض مجددا للاصابة ويتم تجهيز سفره الى المانيا
منقووول
مبروك لود عبد الماجد والاحباب.
اردم الدلاقين ياود عبدالماجد وخلي ابو المستعار يطلع من جحره. كلامك بخليهم يشوفوا الدنيا صفراء ومعاها نجوم نهار كمان. كلامك صحيح اليخماو مجهز شبكتو لاصطياد مشاطيب سيد البلد ومفروض ملف الشطب نتعامل معه بحذر اليخماو عاوز يخفف اثار ضربات السوباط التي اصابته بارتجاج في المخ. والكاش بقلل النقاش كما قال.