فيك يا مروي شفت كل جديد

 وان طال السفر

محمد عبدالماجد

• الأكيد ان مباراة اليوم التى تجمع بين الهلال والأهلي مروي سوف تكون مناسبة سعيدة وجميلة لأهالي الشمال والهلال يلعب أمام (ملوك الشمال) في احدى بقاع السودان ذات الحضارات والثقافات المختلفة والمتعددة.

• قالوا ليك في مروي (النخلة) لو صفقت ليها (تنقز).

• قمري مروي حافظ اغاني النعام آدم صم.

• سعيد الهلال وهو يلعب في مروي اليوم (دورياً) أمام ممثل المدينة وممثل الولاية كلها بعد صعوده للدوري الممتاز.

• هذه أول مواجهة للأهلي مورى مع القمة السودانية.

• تاريخ يلاقي تاريخ.

• وحضارات تلاقى حضارات.

• الليلة في مروي نحن على موعد ان نشوف كل (جديد)، فقد جُبلت (مروي) على تلك الحداثة رغم تاريخها العريق والفنان عبدالكريم الكابلي يغني لها (فيك يا مروي شفت كل جديد).

• الجديد اليوم ليس قاصراً على الهلال وحده ملوك الشمال أيضاً قادرون ان يقدموا جديدهم اليوم أمام الهلال.

• الليلة ح نغني مع (بشة الصغير) ، ونطرح وشنا مع (عماد الصيني).

• ح نشوف (جيوفاني) – (وخليفة).

• الجميل ان الارتباط عمقياً بين الهلال وأهلي مروي من غير ترتيب ، كفي ان أهلي مروي يقوده خليفة هداف الفريق ولاعب الهلال السابق ويبدع فيه عماد الصيني لاعب الهلال المعار ويقوده فنيا ابن الهلال وقبل ذلك ابن المنطقة مبارك سليمان.

• عشان كدا أهلي مروي تميز من اول موسم.

• سعداء نحن بهذا التميز لأهلي مروي في اول مواسمه في الدوري الممتاز، لذلك نحن على موعد اليوم مع (الجديد).

• سوف نغني مع عبدالكريم الكابلي :

• فيك يا مروي شفت كل جديد

• فيك شفت عيون لعبو بي شديد

• وانكويت بالنار من زهير في خديد

• ومهما زاد وجدي ما بسيب الريد

• لأني قلبي حنين بعشق التغريد

• بي محاسن الكون وبي جمال الغيد

• هذه هي مروي – بتلعب بيك (العيون) قبل ما تلعب انت بالكورة.

• قون العيون (نظرة).

• وتسللها (صرة).

• وضربة الجزاء فيها (العين الحمراء).

• شفتوا ليكم زول بتكوي بالنار من (زهير في خديد).

• الكلام دا بيحصل عادي في مروي.

• الليلة ح نمسك صهيب الثعلب من ايدو – ان شاءالله بس يلعب لينا من بداية المباراة.

• ح نمسك ثعلوبنا ..ونغني مع كابلي :

• يلا نمشي النيل

• في أواخر الليل

• بين رمال ونخيل

• يغني لينا جميل

• بوبا عليك تقيل

• القمر بوبا عليك تقيل

• الليلة الكورة الساعة عشرة ..يعني في (أواخر الليل).

• قون صهيب الثعلب بنزل ليه (سبيطة) بلح.

• لو نزلت لينا (خضراء) ما عندنا مشكلة.

• في مروي ما في كورة بتطير ساكت.

• أي كورة بتطلع برة بتنزل ليها (سبيطة).

• وعشان الموضوع ما يبقى ليك صعب، يا الصادق شلش اسمع كلامي دا.

• أوعك.

• انا بحذرك من الآن.

• بقولها ليك بالواضح.

• ما تقعد تتلفت ساكت.

• يا مريسيل تعال نوصيك

• في الرمال الصيد بلاقيك

• هو بيعزمك وبيعتلك فيك

• قولو حالف ما بباريك

• وما بدلي التهمه فيك

• أحسن الامور تبقى واضحة.

• مروي بلد حضارات وتاريخ كبير.

• بلد غنا وشعر.

• من الشمال خرج النعام آدم وعثمان اليمني وعبالرحمن بلاص وصديق احمد ومحمد كرم الله ومحمد جبارة الى جيل عبدالرحيم ارقو والبركل طارق العوض ومحمد النصري وجعفر السقيد وعبدالقيوم الشريف وثنائي العامراب والى آخره.

• الحكاية ما واقفة.

• عشان كدا يا ناس صهيب الثعلب كورتكم الليلة لو ما فيها (شعر) ناس مروي ما بيقبلوها ليكم.

• يا بشة الصغير لو ما عملتوا ليكم (رنة) طمبور في مباراة اليوم، ولا في زول بقبل عليكم.

• سمعوني شيء في مباراة اليوم من اغنيات النعام آدم ، عاوزين نسمع (الزول الوسيم الهادي دائما طبعو)…او أي شيء من اغنيات محمد سعيد دفع الله.

• سمعونا في الشوط التاني حاجة من صديق احمد ، حاجة من اغنيات عبدالله محمد خير.

• ولو ما ختمتوا لينا بي (ثنائي العامراب) يا رمال حلتنا زولا كان بريدك يا حليلو ما في زول بيعتمد ليكم نتيجة مباراة اليوم.

• ممكن يقدموا فيكم شكوى عديل كدا لو المباراة ما فيها (رمال حلتنا).

• انتوا فاكرين الهلال دا طلع من وين؟.

• من القاش..

• ومن جناين شندي.

• ومن محطة السكة حديد عطبرة.

• ومن سوق نيالا…

• وسلاطين الفاشر.

• الهلال طلع من (رمال حلتنا).

• من نخيل الباوقة..

• وبرتكان جبل مرة…

• الهلال جاء من (تبلدي) الابيض..

• ومن (سعف) الدامر..

• ومن (عرضة) المتمة..

• ومن (انغام) مدني.

• الليلة يا جيوفاني وبما انك بقيت سوداني عاوزين نسمع منك شيء من اغنيات محمد النصري.

• وعشان عارفنك سوداني جديد..

• وجديد في الشغلة…

• كفاية نسمع منك (رفيق النسمة) لخالد شقوري…(اشارات الوداع) بنسمعها منك في دورى النخبة.

• عارفنك هسع ما بتكون حفظتها.

• الليلة عندنا كلام كتير في مروي.

• شوف فلانة الواردة وحواء

• سكنت قلبي من جوه

• واتغابت فيني الخوه

• تحكي خطو الريم العايره

• علي نعم الساقيه الدايره

• تغني ليها تقول

• والله ظلم علينا ظلم

• يا ناس القوز علينا ظلم

• الشال السيدة وخلى حرم

• سفر التلاتا ولا عدم

• سعينا الريد جنينا حكم

• وقلنا الحب والله قسم

• الشيء العجيب ان الكورة الليلة يوم التلاتا ..زي ما بغني كابلي (سفر التلاتا ولا عدم).

• لكن في كل الاحوال ما عاوزين نغني (والله ظلم علينا ظلم)..لا نحن ولا ناس الأهلي مروي.

• عاوزين تحكيم عادل.

• عاوزين كورة.

• ومحمد النصري كمان.

• انتوا شفتوا الوصف دا.

• ما خلوا ليها شيء.

• جيت ماري العصير

• لقيتها تملا فوق بير

• الرقيبة قزازة عصير

• العيون متل الفناجين

• الزراق فوقة تقول حرير

• الضمير عاج التكارير

• السنون براقن يشيل

• وانت ريحتك فرير

• ولا بت السودان اصيل

• انتظروا (المطر) مع السنون البراقن بشيل.

• دا ما براق نصاح.

• دا براق مطر عديل كدا.

• متين يا الساقية نترك النوح

• يجينى قميري يقولي نروح

• نزور الشوفتو ترد الروح

• حبيبى السادة خفيف الدم

• الليلة ح تشوفوا الشوفتو ترد الروح.

• الهلال في مروي.

• ويا الحلة تنوري الليلة.

• الليلة ليلكم (نور) في مروي.

• نتمنى ان يقدم الهلال وأهلي مروي مباراة تليق بالمنطقة وتاريخها العريض ويسهر الناس في مروي وبرة مروي مع ليلة كروية جميلة في رمضان.

• عاوزين نتمتع.

• عاوزين نلعب كورة.

• عاوزين نتفرج.

• جمهور مروي سوف يزيد مباراة اليوم حلاوة بالحضور الكبير.

• والهلال سوف يواصل في تقديم فنونه.

• والروعة باذن الله سوف تكون حاضرة على عشب ملعب مروي الرياضي.

• الاندية التانية أجزت.

• وناس الكورة.

• ناس المجموعة التانية ..الكورة نسوها.

• والهلال بيلعب.

• اليوم مع أهلي مروي.

• والايام القادمة مع كوبر.

• وهنا وهناك الروعة حاضرة.

• حالتها دي بدون (محترفين).

• بي بشة الصغير.

• وصهيب الثعلب.

• …………..

• ملحوظة : الليلة السهرة بالطنبور.

• هوامش

• الصدى نقلاً عن موقع باج نيوز قالت ان شيبولا غادر السودان عن طريق الجواز السوداني الذي سحبه منه الهلال ،لأن مغادرة اللاعب بجوازه النيجيري سوف يكلف خزينة النادي الازرق كثيراً.

• بالله.

• دي جديدة علينا.

• لو سافر اللاعب شيبولا بالجواز السوداني فهذه مسؤولية السلطة ومطار الخرطوم الذي سمح له بذلك ، خاصة ان قرار سحب الجنسية السودانية من شيبولا نشر في كل الوسائط الاعلامية.

• الموضوع ما كان في السر.

• الموضوع كان في العلن.

• الهلال غير مسؤول عن ذلك.

• بعدين قول افتراضا كدا ان شيبولا سافر بالجواز السوداني ،المشكلة شنو؟.

• كلتشي وباسكال موسم كامل قاعدين يلعبوا في المريخ بالجنسية السودانية بعد ان سحبت منهما.

• بقت على السفر يعني.

• المضحك ان الخبر جاء كمانشيت في صحيفة الصدى.

• الناس ديل غلبتهم الشغلة عديل كدا.

• طارت ليهم.

• لا عارفين يقيفوا مع المجلس.

• لا عارفين يعارضوه.

• لا عارفين يبخسوا انجازات المجلس المنتخب لا عارفين ينتقدوها.

• غلبتهم عديل كدا.

• صحف المريخ كلها كانت قد احتفت بحكاية السيستم رفض بيانات محترفي المريخ.

• ليتضح بعد ذلك ان الخبر (شتلة) ساكت.

• الناس ديل مالهم مع المجلس.

• السيستم قفلوه براهم.

• غايتو الما بريدك في (السيستم) يحدر ليك.

• الوزارة مشت مع خط الاعلام المريخي.

• وجاءت المفوضية وسارت في نفس الطريق.

• مجلس المريخ المنتخب معارض من قبل السلطة ومن قبل الاعلام المريخي.

• معارضة عجيبة.

• للمعارضة طرقها ومواعينها.

• لا يعقل ان تعارض السلطة مجلس منتخب.

• وما مقبول اعلام المريخ اعلام النادي يعارض المجلس الشرعي.

• غايتو في المريخ بتحدث حاجات عجيبة.

• الطريف في الامر ان قدامى لاعبي المريخ سحبوا خالد احمد المصطفى وهيثم الرشيد من مجلس المريخ المنتخب.

• بي ياتو حق.. ما عارف؟.

• بي ياتو طريقة …ما عارف؟.

• انتوا خالد احمد المصطفى وهيثم الرشيد قاعدين ليهم في فندق – عشان تسحبوهما بهذه الطريقة.

• خالد وهيثم عندهم قرار.

• خالد وهيثم ما (ترلات) تسحبوها وترجعوها على كيفكم.

• ومجلس الشورى بتاع المريخ جابوه للشورى عاوز يصدر قرارات.

• قولوا ليهم مهمة مجلس الشورى تنحصر فقط في الشورة.

• ما عندهم شيء أكتر من كدا.

• مع ذلك عاوزين يتشابروا ويطلعوا قرارات.

• البلد دي ماشة كيف ما عارف؟.

• لخبطة شديدة.

• الهلال مطلوب منه اليوم ان يحافظ باذن الله وتوفيقه على سجله خالياً من الخسارة.

• ما عاوزين نخسر.

• وان شاءالله 53 مباراة باذن الله وفضله بدون خسارة.

• الأهلي مروي فريق ممتاز وعنده طموحات ودوافع كبيرة.

• لذلك الحذر مطلوب.

• ………….

• عاجل: في انتظار الجديد اليوم في مروي.

• 

حمل تطبيق كورة سودانية لتصفح أسرع وأسهل 

لزوارنا من السودان متجر موبايل1

http://www.1mobile.com/net.koorasudan.app-2451076.html

2,456حملوh التطبيق               

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app 

17756 حملو التطبيق

على متجر apkpure

https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app

على متجر facequizz

http://www.facequizz.com/android/apk/1995361/

على متجر mobogenie

https://www.mobogenie.com/download-net.koorasudan.app-3573651.html

على متجر apk-dl

http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9

على متجر apkname

https://apkname.com/ar/net.koorasudan.app