في الزمن بدل الضائع من العصُر !!
بالعربي الكسيح
محمد الطيب الأمين
في الزمن بدل الضائع من العصُر !!
* من جميل ما غنى الفنان الراحل حمد الريح أغنية (الوصية) .
* (الوصية) من (حسنوات) أغنيات حمد الريح وهو في الأصل لم يغني إلا (حِسان الأغنيات) .
* الراحل أسهم وبشكل كبير في (تشبيك) علاقات (الريد) وتطوير (الإعجاب) وتثبيت (الحب) .
* وكان له نصيب في كل (قصة) أصبحت (رواية) بعد حين .
* رجل (وافر الإحترام) ، غنى للوطن والعاطفة والقلوب التى (اشقتها الأيام) والأرواح التى ارهقها (السفر والاغتراب) والعيون التى ابكاها (الاقتراب والتصوير).
* عندما أستمع لحمد الريح وهو يغني (حمام الوادي) أظن وليس كل الظن إثم أنه (يقصد المريخ) .
* فنحن من جيل لم يكتب له (مشاهدة حمام الوادي) .
* نحن شفنا (حمام الوالي) و(كلاب الليدو) .
* (حمام الوادي) سمعنا بيهو في أغنيات حمد الريح و(حمام الوالي) شفناهو في العرضة جنوب .
* وكذلك (كلب الليدو) .
* كلب الليدو لقب جديد للمريخ أوحى به الأستاذ بابكر سلك ولذلك يجوز لنا أن نضيفه لالقاب المريخ الشهير ب(الضل) والمشهور ب(الإصيفر) .
* في أغنية (الوصية) يقول حمد الريح عليه الرحمة :(نحن راجعين في المغيرب) .
* والمغيرب هو تصغير للمُغرب .
* راجعين في المغيرب يعني راجعين في (الزمن بدل الضائع من العصُر) .
* الزمن بدل الضائع من العصُر هو (وقت الأصيل) الذي يسبق (المغرب) بلحظات .
* حمام الوادي و(حمام الوالي) والمغيرب و(الإصيفر) .
* لو (حللت أغنيات حمد الريح ح تلقاهو هبش المريخ في كم حتة) .
* والله صحي .
* المهم .
* اقتربت مباراة الهلال أمام فايبرز.
* وهي مباراة أي تراخي فيها يعني انتهاء موسم الهلال الأفريقي.
* ولذلك الحذر والجدية مطلوبة .
* الإسترخاء ستكون له فاتورة باهظة الثمن .
* لابد من تناسي نتيجة مباراة الذهاب .
* نلعب مباراة الأحد على أساس إنها المباراة (الأولى والأخيرة) .
* نثق في الهلال الجديد ونعلم أنه مؤهل للذهاب بعيداً ولكن كرة القدم لها جنون .
* الطبيعي أن نتجاوز هذه المرحلة وما هو غير طبيعي أن لا نتجاوزها.
* والعكس صحيح بالنسبة للمريخ .
* الطبيعي إنو المريخ يطير والما طبيعي إنو يتأهل.
* وده تاريخ عشان ما تجي تشبكني وطنية و(بطيخ) .
* تاريخك بقول كده .
* بقول إنك بتاع تمهيدي .
* المريخ سيلعب غدا.
* وأتوقع بعد غدا يقوم وفد من المريخ بزيارة لبعثة فايبرز ودعمهم بالفواكه.
* الحاجة دي لو حصلت برضو طبيعية ومتوقعة .
* وتعال أناقشك.
* قبل اليوم استقبل وفد من المريخ بعثة فريق مازيمبي عندما حضر إلي السودان لمواجهة الهلال .
* استقبلوا في المطار بالورود .
* رشاقة منهم استقبلوا مازيمبي .
* رشاقة و(قلة وطنية) .
* قبل اليوم وفد من المريخ أحضر الفواكه لفريق الأهلي المصري في التمرين الرئيسي الذي جرى بملعب المريخ .
* دعموا الأهلي بالفواكه عشان يغلب الهلال .
* جابوا ليهم الموز والبرتقال والعنب والاناناس.
* وأنا بصراحة ما عارفهم الأناناس جابوهو من وين ؟
* هو بلدنا دي فيها أناناس؟
* اوع تسمع ليك مريخابي يقول ليك وطنية وما وطنية .
* أي تمهيدابي يقول ليك وطنية طوالي ذكرو باستقبال مازيمبي وفواكه الأهلي.
* الوطنية بقت (طحنية) يا مولانا .
* ورغم هذا كله نحن سنفتح للمريخ إستادنا.
* في وطنية أكتر من كده ؟
* بنفتح ليكم الإستاد ونتمنى إنكم تحفظوا الجميل كده .
* وعليكم الله براحة على النجيلة .
* نحن عارفين النجيلة ح تخلعكم.
* بس حاسبوا عليها.
* يعني ما في لاعب يدردق في النجيلة إلا عند الشديد القوي .
* لو داير تقع ذاتو اقع براحة .
* وما تمعط النجيلة لو دخل فيك قون.
* حافظوا عليها.
* دي نجيلة الشعب ما نجيلة الحكومة.
* وفي النهاية نرجع ونقول : (أنت يا الدم لونك أحمر) .
* وبرضو نقول : (أنا لو رجعت السودان ما بلعب إلا للمريخ) .
* هاك كلب الليدو ده .
* وغايتو جنس غايتو .
* و..و..
* وحمام (الوالي) يا طاير .
أعجبني ما كتب ابوساروتا (عبدالهادي القضارف) في تعليق على كتابات الرائع أيمن كبوش وأنقل بتصرف ما كتبه للفائدة
من السهولة بما كان أن يكتب صحفي المقالات اليومية عن الرياضة بروح المشجع المتعصب الأعمي وما أكثرهم . من السهولة كتابة أكثر من 20 مقالة في اليوم الواحد من شالكة الردحي وتبخيس ما عند الآخرين ومفردات تُكتب وتُباع كل يوم ( الدلاقين .. الوصيف الدائم .. أب بنطلون ناصل.. كلب الليدو .. وكاااااااااااااااااااك ) ولكن أتحدى أولئك ( أي الذين يكتبون بمثل ما ذكرت آنفاً ) ولمدة ثلاثون يوماً أن يكتبوا ولو مقالة واحدةذات (فكرة ومضمون ومفردة ) مثل ما يكتب هذا الشاب كبوش .. لك التحية من الأعماق كبوش وأسأل الله أن يوفقك ويهدي الأخرين لما يحبه ويرضى ، وسير على هذا المنوال عسى ولعل أن يتبدل الحال والمقال في الرياضة والصحافة .
الاخ خالد محمد احمد
اضم صوتي الي كل الذين يدعون الى الترفع عن كتابة مفردات تبخيس ما عند الاخرين
نعم انا هلالابي حتى النخاع، لكن وصف فريق المريخ باوصاف مثل الدلاقين …. الخ فهي اوصاف لا تليق بجمهور الهلال، لسبب بسيط هو ان قوة الفريق تقاس بالخصم. وعليه عند الفوز عليه ويتم وصفه بتلك الاوصاف فانت تبخس انتصارك اولا وثانيا وثالثا …….
وجمهورية السودان فيها اكير حزبين هما الهلال … المريخ وبالتالي قوة الفوز تكون بقيمة وقوة المنافس.
الأخ أبو ابراهيم .. بارك الله فيك وفي غهمك الراقي والمريخ والهلال عينان في رأس واحد ولكن ماذا نقول في أمثال هؤلاء الذين يترزقون من اثارة الفتن والمشاكل …لك تحياتي ودمت