في سفرية واحدة طاروا من الافريقية والعربية وفي 48 ساعة طاروا من الدوري والكأس

• ناس المريخ الأيامات دي شغالين (طيران).

• الظاهر مجلس المريخ المنتخب.. مجلس سوداكال مجلس طيران المريخ.

• بس أوضح ليكم حاجة.

• عشان ناس مزمل ما يلقوا فرصتهم في المجلس.

• الموسم الماضي ومع (بص الوالي) المريخ طار من الدوري ومن الكأس.

• طيري يا طيارة طيري.

• يعني الموضوع ما جديد عليكم.

• ولا غريب.

• متعودة دائماً.

• لكن بي أمانة كدا ..طيرانكم كتر.

• طيرانكم زي (الرز باللبن).

• رغم ان (الرز باللبن) ما عندو علاقة بالموضوع.

• بس قلتو ليكم عشان في ناس بفكوا العمود دا كلو ويمسكوا في (الرز باللبن).

• أصلها الدنيا كدا.

• ممكن تطير بي فرصتين.

• تطير بعد الخسارة بثلاثية نظيفة.

• تطير وانت أحسن تيم.

• تطير وانت واقف.

• وانت قاعد.

• والله يا ناس المريخ وقت شفتكم في شندي.. أتمنيت ليكم (المطرة).

• قلت ان شاءالله تصب في الشتاء دا ..عشان تلقوا ليكم (شماعة).

• عشان تقولوا المطرة.

• الناس ديل كانوا في أمان الله.

• ما عندهم أي عوجة.

• بتحدثوا عن فريق مثالي.

• عن التش.

• والتكت.

• ومحمد عبدالرحمن.

• لمّا فيهم الهلال بشتنهم بشتنة كعبة.

• نتفهم نتيف صاح.

• نتف ليهم ريشهم.

• أمير كمال وقت اتكشف بقى زي (لوري) التراب.

• الزول دا كان بيلعب كيف؟.

• مشكلة المريخ شال قياسته على مريخ كوستي.

• وتريعة البجا.

• تريعة البجا البتلعب كورة مفتوحة.

• اها يا ناس تريعة البجا ..الكورة المفتوحة نزلتكم من الممتاز.

• الهلال في مباراة القمة الأخيرة ..انتهى المريخ.

• الهلال اثبت ان المريخ قاعد ساكت.

• محمد عبدالرحمن جايب ليه 22 هدف …وقت جات ساعة الجد …(كورنر) ما قدر يتحصل عليها.

• ناس الأهلي شندي مفروض يشكروا الهلال.

• الهلال قدم ليهم خدمة كبيرة.

• الهلال خلاهم يمشوا شندي بدون نفس.

• تقول رايحة ليهم (بقرة).

• انا قلت (بقرة).

• ما تشتغلوا بيها كتير ..مرات بتفلت مني.

• يعني عادي جداً تلقوا في العمود دا بقرة.

• او حتى ضكر بط.

• مع طيرانكم الكتير دا يا ناس المريخ ..العمود دا لو جبت ليكم فيه (حديّه) مفروض ما تستغربوا.

• هسع دا برد يطيروا فيه.

• ناس المريخ سافروا يوم المباراة – اصلو انتوا ماشين ليكم عزاء.

• وركبوا ليهم (قطر).

• قطر – انتوا عندكم سماية؟.

• الله يسألني …احترت من طيرانكم.

• لا جوهرة.

• ولا قناة.

• وكمان معاكم (طيران).

• أسرفتوا في الطيران.

• أفرطوا في الطيران.

• أحمدوا الله يا هلالاب.

• نحن بي جوهرتنا.

• وبي قناتنا.

• وفزنا ببطولة الدوري الممتاز بدون هزيمة.

• وشباب الهلال فازوا بدوري ولاية الخرطوم للشباب.

• ووصلنا نهائي كأس السودان وان شاءالله نفوز بالكأس.

• وبرضو قاعدين نهاجم الكاردينال وننتقده.

• برضو الهلال ما عاجبنا.

• وناس المريخ جمال الوالي باع كأس الدهب.

• ومشى خلاهم.

• وتركهم في كل هذه الطعون.

• وكل هذه الديون.

• وبرضو ما بيقبلوا فيه كلمة.

• ولا بقدروا يقولوا فيه حاجة.

• شفتوا الفرق كبير كيف بين الهلال والمريخ.

• عشان كدا الهلال بحقق البطولات.

• والمريخ بطير.

• ديل أي بطولة يركوا فيها ..بيطيروا منها.

• سودانير.

• طيران الخليج.

• نوفا.

• مصر للطيران.

• طيران الامارات.

• مالكم انتوا …الحاصل عليكم شنو؟.

• الحكاية.

• الحصل على المريخ ينطبق على كلام كمال ترباس …الطيران الطارو المريخ من البطولات (ود أبرق) ما طاروا.

• دي (ود ابرق) ما بيعملها.

• السنة دي ناس المريخ طاروا من (4) بطولات.

• الكترابة.

• يا ناس مالكم؟.

• 4 بطولات طاروا منها…ومامون ابوشيبة لغاية الآن بيتكلم عن ضربة جزاء (وهمية) للمريخ سنة 1996م.

• ناس المريخ كل طيرانهم من هذه البطولات كان بشكل درامي.

• شكل كوميدي.

• المريخ طار من البطولة الافريقية …عملوها في التجميد.

• قعدوا يهاجموا في الهلال.

• قالوا السبب (التجميد).

• مشوا البطولة العربية ..طاروا من أمام (شفع) الهلال السعودي.

• أها البطولة العربية برضو فيها (تجميد)؟.

• لكن برضو السبب الهلال.

• الهلال السعودي.

• أصلهم الهلال عامل ليهم هلع.

• الكلام بتاع الطيران من البطولة الافريقية والطيران من البطولة العربية حدث في (سفرية) واحدة.

• في ظرف اسبوع.

• او 10 يوم.

• طاروا من دي.

• وطاروا من دي.

• يعني ناس المريخ رجعوا السودان وهم (طايرين) من بطولتين.

• رجعوا لينا طايرين كدا.

• باسكال من الطيران الكتير لمن رأسو اتقلب.

• باسكال رأسو مقلوب.

• وديل فاكرنو (دقن).

• أها عمليتهم دي (ود ابرق) بيعملها..؟.

• محلياً …طاروا من الممتاز بعد ان دخلوا مباراة القمة بفرصتين.

• بعد ان شبكونا نفخ.

• المريخ أفضل هجوم.

• المريخ أفضل دفاع.

• والتش أخطر زول.

• ومحمد عبدالرحمن هداف الدوري الممتاز.

• والتكت صعب.

• والصاوي فنان.

• تتخيلوا بعد الكلام دا ..وبي فرصتين طاروا من الممتاز.

• بعد ان منحوهم 12 ضربة جزاء.

• وناس المريخ طاروا من كأس السودان بعد الهزيمة من الأهلي شندي بثلاثة أهداف.

• تلاتة عديل كدا.

• المفارقة ان الطيران من البطولات المحلية (الجوز) حدث خلال يومين.

• خلال 48 ساعة فقط.

• وزي ما طاروا من البطولات الخارجية في سفرية واحدة …طاروا من البطولات المحلية في 48 ساعة.

• في ذمتكم.

• وامانة معلقة في رقبتكم …العملية دي (ود أبرق) بيعملها.

• الله يسألني (ود أبرق) ذاتو ممكن الكلام دا ما يعجبو.

• ود أبرق ذاتو عندو رأي.

• الظاهر كدا (التش) كراعو حارة.

• كراعو مكوة.

• التش بي 4 مليار.. وطاروا من 4 بطولات.

• ناس المريخ دخلوا مباراة القمة في الممتاز بي فرصتين.

• طلعوا ليهم بي (13) كرسي من الجوهرة الزرقاء.

• مشوا شندي لنصف نهائي كأس السودان ..ضربوهم تلاتة.

• المشكلة سافروا شندي بي (قطر).

• والله العملية العملها أهلي شندي في المريخ …(روس) ما يعملوها.

• تلاتة.

• خلوني أحلل ليكم مباراة المريخ أمس.

• أمير كمال من (التقلة) تقول (مساعد مخرج).

• ما تسألوني وتقولوا لي (مساعد مخرج) ليه؟.

• جات كدا.

• تنططوا في عيونكم زي (الملايات) الجديدة.

• وكان لي علاءالدين يوسف …بقى شغال من (الارشيف).

• يقع ويقوم.

• وشايل ليه معاه قارورة مياه صحة.

• الزول فتر.

• والمروة انتهت.

• غايتو علاءالدين يوسف ..والي الدين خضر عمل فيه عملية ..ذكرتني زمان وقت الحصة تكون تسميع لجداول الضرب.

• الجداول كلها تطير من رأسك.

• تلاتة في اتنين ما تقدر تعرف نتيجتها.

• أخونا صلاح نمر ..يتخيل لي كدا ..ودي حاجة ما متأكد منها ، يتخيل لي الزول دا عندو رباط صليبي.

• كورتو دي ما كورة زول نصيح.

• نحن كمان كورة الرباط الصليبي ما بنعرفها.

• وكان لي جمال سالم …ظاهر عليه عاوز من ناس المريخ قروش.

• الزول دا في أي مباراة بقى يستقبل ليه (صاروخ).

• من أي حتة بيجي فيه هدف.

• استقابلو في (كنار) ما في.

• جمال سالم ..فارس جاب فيه هدف ..انا القاعد برة الاستاد وبتفرج في المباراة في التلفزيون لمن (شبيت) حتين شفت الكورة.

• جابت لي فلايت من (النظر).

• الكورة لمن تتاوق ليها حتين تشوفها.

• هسع عليكم الله مسافرين شندي.

• وقاطعين المسافة دي كلها.

• وراكبين ليكم (قطر).

• عشان تتهزموا (تلاتة).

• خسارة (القطر).

• لو دي كورتكم (لوري) كتير عليكم.

• بوكسي بتاع لبن ..خسارة فيكم.

• وقت قالوا لي المريخ مغلوب تلاتة ..قلت ليهم المريخ لاعب ضد منو؟…مازيمبي!!.

• مازيمبي الدخلو في بطولة كأس السودان شنو؟.

• الناس ديل جنسوا مازيمبي برضو.

• أها ان شاءالله (الداخلية) ردت عليكم.

• ناس المريخ كرامتهم مسحوا بيها الواطة.

• الشرطة الصاعد في أول مباراة هزمهم في الدوري.

• الأهلي شندي في هذا الموسم هزمهم مرتين.

• مرة في الدوري.

• ومرة في الكأس.

• مرة اتنين.

• ومرة تلاتة.

• والهلال ضربهم ليك وهم في قمة معنوياتهم.

• تاني الباقي ليكم شنو؟.

• والله سوداكال محظوظ.

• محظوظ انهم طعنوا فيه.

• وقدموا 9 طعون ضدو.

• يا سوداكال ..يا زول ..أحسن ليك الحتة القاعد فيها من رئاسة المريخ.

• الله شفاكم.

• لو بقيت رئيس للجماعة ديل تموت مغصة ساكت.

• يا زول انحسب ..واسحب ترشيحك.

• أحسن ليك.

• قول ليهم ما عاوز.

• ما داير.

• خليهم يتصرفوا بي طريقتهم.

• مالك ومال (التلتة) دي.

• مالك ومال وجع الرأس.

• هو انت ناقص!!.

• ……………….

• ملحوظة : وقمة الخميس صعبة على الهلال.

هوامش

• الهلال بأقل مجهود تأهل الى نهائي كأس السودان.

• لكن بهذه الصورة لن يفوز الهلال بالكأس.

• ناس الاهلي شندي ديل عاوزين حماس.

• عاوزين دوافع زيادة.

• حوافز.

• عشان الهلال يجمع لينا بالدوري والكأس ان شاالله.

• عودوا الى تركيزكم.

• وأعلموا ان بطولة كأس السودان اصبحت مطلباً لجماهير الهلال.

• ومنذ الآن روابط وجماهير الهلال تستعد بقوة لمباراة الخميس.

• المباراة بتحتاج شغل كتير.

• عاوزة تشجيع.

• وعاوزة تحفيز.

• فريق الاهلي شندي قدم مباراة كبيرة امام المريخ وفاز بالثلاثة.

• والاهلي شندي سوف يدخل لمباراة القمة وهو يطمح في تحقيق اول بطولة في تاريخه.

• يعني دوافع الاهلي شندي كبيرة.

• لا بد ان ترتفع دوافع الهلال.

• لا بد من ان يكون هناك حماس وقوة للفوز باللقب.

• والي الدين خضر أمس كان نجم المباراة.

• الى جانب ياسر مزمل.

• وبنتمنى الاتنين في الهلال.

• ولو وجدنا والي الدين بوغبا …ما عاوزين حاجة.

• مجلس الهلال عليه ان يقدم أكبر عرض لوالي الدين خضر.

• فهو نجم التسجيلات الأول.

• واللاعب فنان وماهر وبيشبه الهلال.

• واحكموا على تسجيلاتكم وقرطوا عليها.

• واحسموا مواضعكم.

• والله يوفق.

• ويكلل الخطوات بالنجاح.

• وابقوا على سفر.

• …………

• عاجل : نسيت أقول ليكم المريخ السنة دي طلع فقط بكأس دعم  الطلاب.. أقصد كأس دعم المريخ.