في ناس الجمعة دي عندهم زي المعسكر المقفول
في الصمت كلام
محمد عثمان بلل
في ناس الجمعة دي عندهم زي المعسكر المقفول
• في سؤال كدا عايز أقولوا.
• البرد انتهي ولا لسه ؟
• ما فاهمين اي حاجة.
• فجأة كدا الجو قلب صيف.
• الايام الفاتت كان الجو بارد.
• إلا تستحمي في الاسبوع مرة واحدة بس.
• حالة صعبة خلاص.
• أسي نقوم نرجع البطانية فوق الدولاب.
• وتطلع الصباح عادي للشغل بدون ما تخاف من برد الصباح داك.
• البرد تاني يقوم يرجع.
• تقوم من النوم جعان.
• طوالي على المطبخ تشوف الشاي بي وين.
• طبعا معاه (نص عيشه).
• عشان ناس البيت ما (يدقوا ليك جرس).
• يقولو ليك معقولة أكلت (العيش كلو).
• أحسن ليك تحترم نفسك وتشيل (النص) دا وتتخارج.
• كمان في النوع البرجع البيت متأخر.
• بعد ناس البيت ما ينوموا.
• يكون شايل معاه (ربع كيلو باسطة).
• أول ما يدخل البيت يشوف الجو عامل كيف.
• ما عايز زول يضايقو في (الباسطة).
• هي كلها (ربع) بس.
• يقوم يدسها في التلاجه وراء حلة ملاح كبيرة كدا.
• أو وراء أكياس الخضار.
• طبعا بعد ما يشيل ليهو قطعة واحدة يتصبر بيها لحدي الصباح.
• المشكلة لسه ما انتهت.
• طبعا في ناس البيت في زول كدا (جنو فتيش).
• يقوم يشوف (الباسطة) وموضوعك يكون انتهي.
• خشمك يبقي ملح ملح بدل (الباسطة).
• يا زول أحسن ليك (نص الرغيفة) من الحرب النفسية دي.
• في يوم الجمعة دا كمان في ناس عندهم طقوس خاصة.
• الاسبوع كلو يكون جاري مع الشغل.
• من البيت ما بطلع نهائي.
• عايز ياخد راحة طبعا.
• لكن يومو كلو في المطبخ.
• عايز ينتقم حرمان الاسبوع الفات.
• طبعا لا بفطر ولا بتغداء في البيت وبرجع متأخر.
• من تصبح .. قهوة وشاي وبعد شوية الفطور.
• وقبل صلاة الجمعة فطور كارب كدا.
• وبعد الصلاة طوالي تاني يشرب قهوة .. وطبعا ما بنسي العصير.
• تقول عنده (تار) مع المطبخ دا.
• لكن بيني وبينكم عنده حق.
• الراحة مهمه عشان تستعيد نشاطك من تاني.
• جري الاسبوع دا عايز ليهو معسكر مقفول.
(صمت اخير) ..
• في يوم الجمعة أكثروا من الصلاة على أفضل خلق الله.
• (اللهم صلي وسلم على حبيبك ونبيك محمد .. عدد خلقك .. ورضا نفسك .. وزنة عرشك .. ومداد كلماتك).