*تسجيلاتنا بشرها وخيرها تغريبا انتهت
*ويظهر انو قصة مصري وسوري وصيني واتنين من نيجيريا دي كلها كانت ونسة
*يلا ونس
*هو الكلام بقروش!
*لكن بعض الاشراقات كانت في التسجيلات
*منها الكاش القلل النقاش
*ومنها معظمها ان لم تكن كلها كانت بالخانة(عدا شوية نقص هجومي)
*ومنها صغر السن
*قرج مافي
*لكن الاروع علي الاطلاق انها لم تكن معايش للناس زي قرادة علي الشكري
*وقصة قرادة علي الشكري شبيهة بقصة اهل العوض بتاعين الباغة
*بسووك شغلة
*وشبيهة بقصة الزول الوجد بطاقة شخصية بتاعت زول واقعة في الشارع
*شالها قراها وعرف العنوان ومشي دقه الباب
*فتح ليهو سيد البيت سيد البطاقة
*صاحبنا قال ليهو البطاقة دي لقيتها في الشارع وركبت ركشة من هناك لي هنا بمية جنيه
*قلت بدل الفاقد بكلف كتير
*سيد البطاقة شال البطاقة وادي الراجل ميتين جنيه مية للركشة الجابتو ومية للركشة البترجعو
*تاني يوم صاحبنا جا راجع لسيد البيت وقال ليهو انا الزول الجبت ليك البطاقة
*حقيقة الوالدة عيانة وجيت الصيدلية الجمبكم دي قروشي نقصت قلت مابعرف زول في الحلة دي غيرك
*صاحبنا اداهو ميتين تاني
*بكريتها رجع ودق الباب
*سيد البيت فتح الباب لقي صاحبنا
*صاحبنا قال ليهو جبت ولدي المدرسة الجمبكم دي عشان ادفع القسط قروشي نقصن
*اتذكرتك قلت بدل ارجع الحلة واجي اغشاك تتمها لي
*سيد البيت قال ليهو دقيقة
*دخل جوة ومرق شايل البطاقة
*قال لي صاحبنا شيل البطاقة دي اجدعها محل مالقيتها
*ودخل وقفل الباب
*ايها الناس
*ليهو حق سيد البيت
*لانو الزول ده داير يتصرف من البطاقة العمر كلو
*اها
*تسجيلاتنا من حسناتها مافيها قرادة علي الشكري
*وعلي الشكري ده راجل كلس وكريم وشجاع
*يكفي انو اسمو الشكري
*وكرم الشكرية معروف ومعلوم ومشهود
*علي الشكري قال لي قصة
*قال في قرية كان في حكيم باشي ممشي امورو
*جاهو يوم زول قال ليهو نخرتي البي جاي قفلت
*الحكيم باشي شاف نخرت الزول عشنا يعرف القافلها شنو لقاها قرادة مليانة دم مستفة تب
*جاب ليهو حقنة وسحب الدم من القرادة
*صاحبنا شعر نخرتو فتحت
*دفع الفيها النصيب ومشي
*بعد كم يوم قفلت تاني
*رجع للحكيم باشي الذي كرر عملية سحب الدم من القرادة وخلي القرادة نقاطة وقبض الفيها النصيب
*واستمر الحال علي هذا المنوال
*اها يوم قال ليك الحكيم باشي جاتو سفرة اسبوع
*جاب زميلا ليهو من الحلة الجمبهم عشان يمشي ليهو الشغل الاسبوع ده
*صاحبنا سافر وجا
*قال لي زميلو اها الشغل كيف
*زميلو قال ليهو الحمد لله حلتكم مافيها مرض
*حاجات خفيفة
*وجاني واحد عندو قرادة قافلة ليهو نخرتو مرقتها ليهو
*الحكيم باشي نطط عيونو وقال
*مرقت القرادة النقاطة؟
*مارقها ليه؟كانت مصرفانا ياخ
*لذا
*من اجمل لوحات تسجيلاتنا خلوها من قرادة علي الشكري
*ايها الناس
*الغربال برغم الموهبة يا يجدد يا يشتت
*ولو ماعاجباهو قروش المجلس
*اليجدد بقروش المامجلس
*لكنها خانة لو فرط فيها مابلم فيها
*وقرادة الشكري النقاطة مافي ببح
*الجاية نضيييفة
*ايها الناس
*ان تنصروا الله ينصركم
*اها
*نجي لي شمارات والي الخرطوم
*والينا
*المعتمديات
*المحليات
*لكل آليات
*وقع ليك ولا نشارك في الموكب يا اخينا
سلك كهربا ننساك كيف والكلب قال التنفيذيون وحدهم من يستطيعون عرقلة العمل وهرجلة الشوارع وفوضتها
والي لقاء
سلك
