قرار وشيك للاطاحة بعبد الصمد من رئاسة القطاع الرياضى بالمريح

طبعاً لازم يتآمروا علي قافل الأبلاف ويركبوهوا الجو طالما إنو قطع عليهم الطريق وخرب عليهم الضحية، وبصراحة الناس دي ظاهر من هجمتها المنظمة إنو الراجل ده وقف سوقهم ومصالحهم، وحجم الهجمة الشرسة وحدتها يبين مدي غيظهم وتضررهم بصورة كبيرة….!!
علي العموم الناس ديل مابيتوبوا ومابييتعظوا، في سبيل مصالحهم ممكن المرخرخ يمشي دوري الدرجة الثالثة وهم ولابيهمهم، والدليل علي إنهم مابيتوبوا ومابيتعظوا هو هجومهم وشتيمتهم لرئيس لجنة التسيير السابقة صلاح ونسي وطرده من إدارة اللجنة، وبعد فترة قصيرة جداً جزء منهم ندم وبدأ يحن لأيام ونسي، بس الشخصيات البتحفر بي تحت بقيادة الأستاذ الملاوني وأذنابه، رمبوا ونسي الجو لأنو كان بيدير النادي بصورة فيها شفافية كبيرة، والشفافية دي هي أساس المشكلة، لأنو بتقطع عليهم طريق السمسرة والسفريات مدفوعة القيمة ومن ثم التبضع علي حساب المرخرخ وشحن ماخف وزنه وغلا ثمنه علي حساب المرخرخ……!!
أسي دحين تقوموا تغلطوا تاني وتفوروا قافل الأبلاف وراعي الإنضباط الإداري عبد الصمد، وتجوا بكرة تسكلبوا وتجعروا وتلطموا الخدود بعد ماتتدحرجوا للمركز السابع….!!
لكمة أخيرة: الجماعة ديل زول بيحرمهم من البوفية المفتوح والسفريات بالطائرات الخصة مع المرخرخ أينما إرتحل وممارسة الأنشطة التجارية علي حساب المرخرخ والسمسرة في المدربين واللاعبين، بالإضافة إلي التجدع تحت مكيفات النادي وشراب البارد علي حساب المرخرخ، مابينفع معاهم وحايركبوهوا الجو طوالي …..!!