قَـدِّم السبت تَلقَـى (الأحـد)!!
صَـابِنَّهَـا
محمد عبد الماجد
قَـدِّم السبت تَلقَـى (الأحـد)!!
مريخابي جاني طالع يرجف، قلت ليه يا زول روق في شنو؟
قال لي والله (يوم الأحد) دا دقّتني مطرة، مطرة أنا عمري ما شفت زيّها.
قعدت أضحك.. قلت ليه إنت الحرب ما عملت ليك حاجة؟ معقولة المطرة تعمل فيك كدا؟
قال لي يا زول بتضحك مالك؟ إنت فاكرها مطرة ساهلة.
قلت ليه إنت متأكد الدقّتك دي مطرة؟
قال لي أيوه مطرة، يعني ح تكون شنو؟ كمان نحن ما بنعرف المطرة!!
قلت ليه أبداً بس شايف المريخاب ديل بقوا يشكوا كتير من (الأحد)، البقول ليك مطرة، والبقول ليك سيل، والبقول ليك مُسيّرة، والبقول ليك (جان).
قال لي وإنت تحليلك شنو؟
قلت ليه ما عارف، لكن يتخيّل لي ناس الهلال يكونوا وراء الموضوع دا ـ أصلو الشكية من (الأحد) دي ما شكية طبيعية.
المريخابي قال لي ناس العليقي ديل ممكن يعملوا أي شئ.
مشيت خليتو ـ لقيت لي هلالابي فرحان، قلت ليه مالك فرحان كدا؟
قال لي العرس (يوم الأحد).. ثم أضاف دون أن يتخلى عن فرحته:
تاني لو عاوز هدف على الطريقة (الغرناطية)، دوس على الرقم واحد.
كول.. جووول.
لتحويل اللغة من اللغة الهندية إلى العربية دوس على الرقم خمسة.. مع إضافة خاصية الدردقة في النجيلة.
والباكات الجروا سابوا عروضهم هملو!!
غايتو تاني بتشوفوا جنس جري.
لو عاوز هدف على الطريقة (الفرواتية) دوس على الرقم اتنين.
وهي طريقة (فترواغية) قديمة دخلت السودان بعد الحرب العالمية الثانية.
لتحويل اللحن الغنائي من (عشرة الأيام) إلى (الطير المهاجر) دوس على الرقم سبعة.
سم أب درق البصقع جدري القيع البفقع!!
غايتو تاني بتشوفوا جنس فقيع.
لو عاوز هدف على الطريقة (السنكرماية) دوس على الرقم تلاتة.
ما بيدي ويقول أديت.. ما اتفشر وقال سويت!
تاني نحن ما عندنا حاجة ساكت.
خلاص أهدافنا دخلت نظام الحوكمة.
اي حاجة بقت عندنا بي نظام.
الجدعة دوس على الرقم 11.
الكورنر دوس على الرقم 14.
زمان كان عندما الهدف بكتب روشتته أي تمريرته هيثم مصطفى.. تصديق الهدف بوقع عليه البرنس.
هسه جبنا لينا نظام (حوكمة) جديد.
الشغل بقى (ديجتال)، النظام الرقمي.
معقولة بس دفاع فيه كرشوم وهجوم فيه صنداي!! البقعد ليكم في نص الجماعة ديل منو؟
دا إلا زول قنعان من نفسه.
مرمى فيه محمد المصطفى، خيال ما بمشى عليه.
زمان كان عندنا أصحابنا كانوا صعبين شديد، شفوت، وما برضوا الحقارة، وقت يمشوا الحفلة بقعدوا قدام، بقولوا ختوا لينا كراسينا قصاد بتاع الكاميرا، عشان مصور الفيديو يركز عليهم، باعتبارهم من أعيان البلد.. العندهُ جلابية جديدة عاوزها تظهر، والعندهُ موبايل حديث الحفلة كلها بكون شغال واتساب، والعندهُ عمة توتل، بقوم يقيف مخصوص قدام الكاميرا ويفـر عِمّتهُ.
الجماعة ديل لازم تجيب ليهم العَشاء دبل ـ باعتبارهم من أهل العريس ـ أي حفلة هم بعملوا فيها من أهل العريس، وبهذه الصفة بتعشوا (دبل)، وبشربوا البارد (دبل) ـ وبظهروا في شريط الحفلة أكتر من العريس، وعندهم طبع كعب كمان، وقت الفاصل الأول ينتهي بقولوا عاوزين ليهم (قهوة)، وبطلبوها تقيلة عشان يصحصحوا، إنتوا الجابركم على السهر شنو؟ وقت نعسانين أمشوا نوموا ما في زول جابركم.
وعندنا ناس في أي حفلة بطلعوا المسرح، وما بنزلوا تاني، الحفلة كلها بكونوا واقفين وراء الفنان.. وقت يطربوا شديد بيبشروا في الفنان ويرجعوا تاني يقيفوا وراهو.
في ناس بحبوا (الإعلام)، الإعلام دا (مرضة)، إنتوا فاكرين شنو؟ الجماعة ديل قبل الحفلة ما تبدأ بعملوا فيها بركِّبوا في (الكشّافات)، عشان يظهروا ويسيطروا على الموقف، ولمن يجيبوا (الساوند)، بمسكوا (المايك)، وما بفكوه إلا للفنان، وعندهم جملة واحدة يكرروا فيها طول الحفلة وفي أي حفلة، يا جماعة الناس ترجع وراء شوية، واعملوا حسابكم ما تفصلوا لينا وصلة الكهرباء.. قلت ليكم الإعلام (مرضة)، قعدتوا تغالطوا.
مرة مرقنا مشينا الحفلة، ونحن في الحفلات عندنا طقوس، زي كأنك ماشي استاد الهلال تحضر ليك مباراة.. بترتب نفسك ودواخلك من صباح الرحمن.
تشرب القهوة على أساس إنك عندك مباراة أو عندك حفلة.
ونحن في الحفلات بنحب نقعد وراء مع الصيوان، عشان ما في زول يشوفنا.
دخلنا الحفلة لقينا ليك الخلق دي الأعمى شايل المكسر.. بحاستنا الصحفية أدركنا أن الليلة الحفلة بفنان كبير، وزمان كانوا وقت يقولوا ليك الحفلة بفنان إذاعي، البلد كلها بتلقاها في الحفلة ـ ما في حاجة اسمها فنان شاب ـ من صلاح بن البادية وانت ماشي لي فوق.
لقيت لي شافع شايل ليه (عضم)، قلت ليه يا ولد الليلة الحفلة بي منو؟
قال لي بالبلابل ـ قلت ما معقولة، البلابل البجيبهن في الغبار دا شنو؟ بعدين (العضم) مع عشاء الكوكتيل دا جبتو من وين يا شقي؟
قعدت اتلفت وأنا أصلاً وقت اتحير بقعد اتلفت.
فجأة كدا شفت ليك عمك كبير ـ ظاهر عليه من (جدودنا زمان)، قلت في نفسي عمك دا عاوز بالحفلة شنو في العمر دا؟
مشيت عليه، قلت الناس الكبار ديل ما بتمسكوا بالمعلومة، أكيد ألقى عندهُ خبر فنان الحفلة.
قلت ليه يا حاج الحفلة بي منو؟
قال لي بميرغني المامون ومبارك حسن جمعة ـ قلت الزول دا قديم شديد.. يكون فقد الذاكرة من 1970م.. الزول دا يكون آخر فكرة عندهُ (الرشيم الأخضر).
أنا واقف كدا ـ شعرت ليك بي حركة ما عادية.. عرفت ليك بحسي الصحفي أنّ الفنان وصل.
قلت يكون ترباس.. الشغل بتاع (البرستيج) دا ما بعملوا فنان غير ترباس.
واحتمال طه سليمان.
في واحد واقف جنبي، ما عارف سمعني كيف؟ قال مصطفى سيد أحمد.
قلت ليه أنا بتكلم عن حفلة (لايف) ما تسجيل.
يبدو أنه كان خارج محيط الوعي.
شوية كدا أشوف ليك زول زي الصاروخ، طويل وعندهُ 8 عيون، قلت للزول الواقف جنبي دا منو؟
قال لي دا فنان الحفلة.
قلت ليه الظاهر عليه خطير، اسمو منو؟
قال: يوم الأحد.
تاني أعدت ليه السؤال.
قال لي: الأحد.
قلت ليه يا زول أنا بسألك من فنان الحفلة ما بسألك من الليلة شنو؟ بعدين الليلة الاثنين ما الأحد.
قال لي عارف.. العليقي دا اتوقع منو أي شئ.
قلت ليه طيب اسمو منو؟
قال لي الأحد.
الأحد!!
يا زول.. أول مرة أسمع بالفنان دا.
قلت ليه أنا سمعت بي خميس وسمعت بي جمعة وسمعت بي سبت وسمعت بي الأتنين الليلة وين؟ وسمعت بي يوم الخميس الفات ،وسمعت بي رمضان وسمعت بي رجب، لكن أول مرة أسمع بي زول اسمو (الأحد).. قلت ليهو، إنت العليقي بجيب الناس ديل من وين؟
الزول دا عاوز يعمل شنو؟
الزول دا يعني ما لقى في أيام الأسبوع كلها غير (الأحد).
معقولة تاني تشكيلة الهلال نطلعهارمن نتيجة السنة.
بعدين الأحد نحن ما فاضين بنكون شغالين.
قبل ما أتم سؤالي قال لي العليقي قدم السبت عشان كدا لقى الأحد.
سرحت وشلت هَم لي طبنجة.
شلت هَم لي أبوجا.
ومصعب مكين.
ناس المريخ ليهم حق يسجلوا ليهم (8) حراس مرمى و(14) باك، وقالوا هسع بفتشوا ليهم في مدافع.
الناس ديل من الشفقة الفريق كلو قلبوه (باكات).
قلت ليه تاني ناس المريخ ما بيلعبوا معانا يوم الأحد.. بقولوا الاتحاد قاصدها.
ثم أضفت قدم كابوري تلقى الأحد.
الحفلة بدت.
قالوا الفاصل الأول للباكات، ناس طبنجة وعوض زايد ـ شيلوا شيلتكم.
شئ جان، وشئ كول، وشئ كابوري، وشئ كرشوم.
إنتوا قايلين كرشوم ساهل.
شئ جوباك وشئ الأحد.
الأحد شغل.
في ناس في أي حفلة بعملوا فيها ظراف، بمشوا للفنان بقولوا ليه عليك الله يا أستاذ (تباريح الهوى)، نظام هم حساسين شديد ومجرحين.
وفي ناس رومانسيين، الرومانسية كاتلاهم بمشوا للفنان بقولوا ليه (شجن).
فاصل الباكات انتهى، دخلنا لفاصل الضربات الثابتة.
واحد من الجماعة طلب أغنية (دخلوها وصقيرها حام)، يا زول صنداي دا أبدع فيها.
زولنا حلف إلا يتجلد.
يعني إنتوا يا ناس المريخ تلقوها من جان والّلا تلقوها من الأحد.
جابت ليها جلد كمان.
في الفاصل الثالث في واحد شال الكورة وطلع.
نحن لينا زمن بنتكلم عن المهاجم السوبر.
أي هلالابي تضرب ليه يقول ليك بس المهاجم السوبر.
الناس ديل قالوا لو ما جابوا ليهم المهاجم السوبر ما برجعوا الخرطوم.
أها العليقي جاب ليكم المهاجم السوبر، وجاب ليكم المدافع السوبر، والحارس السوبر ولاعب الوسط السوبر.
تاني البقعد في الكنبة (سوبر).
أولادنا كلهم (سوبر).
صنداي أثبت أنّه (سوبر) في كل شئ.
اتسجل في لحظة.
نزل السيستم في لحظة.
كرته وصل، واعتمدوه في كشف الهلال الأفريقي في لحظة.
ضموه لكشف الهلال المشارك في بطولة سيكافا في لحظة.
ركب الطيارة واتجه للانضمام لمعسكر الهلال بدار السلام في لحظة.
كل شئ تم بسرعة، الزول دا سوبر في كل شئ.
دا شغل زول سوبر.
لهذا كنا بنطالب بالسوبر ـ الزول دا لو أهدافه بذات الطريقة التي انضم بها اللاعب للهلال، يبقى ح نشوف أهداف تقيلة وسريعة لصالح الهلال في الموسم الجديد.
عندنا قريبنا هلالابي صعب، لكن أضانه تقيلة.
أنا ما عارف أضانه تقيلة أم قاصدها؟ في ناس بيتداغلوا ساكت.. الواحد فيهم بكون سامع أي شئ.
قريبنا دا قلت ليه الهلال سجل الأحد.
قال لي: أيوه الأحد آخر يوم في الكشف الأفريقي.
قلت ليه بصوت عال شديد، قلت ليك سجلوا الأحد.
قال لي أيوه الليلة الأحد.
قلت ليه لا أنا ما قاصد كدا، قعدت أوصف ليه.. أشرت ليه على السماء على الهلال، وقلت ليه العليقي جاب ليه مهاجم سوبر اسمه (الأحد).
قال لي الأحد في شنو؟
قلت ليه في حفلة!!
قال لي طيب ما تقول كدا من الصباح، ودا جابوه من وين؟
قلت ليه أكيد جابوه من (الأسبوع) الفات.
ثم أضفت السوباط ما حدّاث.
…
متاريس
الهلال لو لعب بطولة سيكافا فقط بـ(الأحد) مفروض يشيلها.
عشان كدا ركزوا، ما تقعدوا تستخفوا بالبطولة.
مع أنّ الهلال يفقد 17 لاعباً.. لكن ما فارقة معانا.
برشلونة تعادلت.
الأرسنال اتغلب.
مانشستر سيتي اتغلب.
الحاصل شنو؟
الأهلي المصري اتغلب.
الزمالك اتغلب.
الهلال كلما يسجل مهاجم، المريخ بسجل مدافع.
ولسه.
قولوا ما شاء الله على الهلال.
وربنا يديم الأفراح.
إتوقع المريخ يسجل ليه مدافع أسمه (سبت).
…
ترس أخير: شَـئٌ غــريبٌ الأســبوع بقى فيه أحـدين.