كأس العالم المرة دي زي الزول العاوز منو قروش وتلفونه فاتح..!!

• زمان – وقت كنا بنحضر (كأس العالم) في انصاص الليالي .. وقت كانت المباريات بتكون مع النباه الاول ، في برد يلخم !! .. نتائج المباريات كانت (طبيعية) و (تلقائية) شديدة .. وكان يمكن ان تعرف نتيجة المباراة حتى قبل ان تلعب – المفاجآت كانت في حدود مباراة او اثنين بالأكثر.

• تنتظر (4) سنوات عشان تشوف ليك (مفاجأة) واحدة.

• هسع نتائج المباريات بقت فيها (مفاجآت) وتدخّل من (الفار).. النتيجة بعد ما يعلنوا عنها ما في ضمان ليها – الهدف بعد ما يحسبوه ويحتفلوا بيه ويكتبوه في الشاشة والمواقع يرجعوا تاني ينقضوه.

• هدف غير شرعي.

• عشان يثبتوا (نسب) الهدف وصحتو .. يقعدوا يحللوا ويشرحوا في الهدف بالفيديو .. ويظل في حالة ثبوت نسب الهدف او عدم ثبوته محل نقاش وحوار في الاستوديوهات التحليلية ومواقع التواصل الاجتماعي ووكالات الانباء والصحف والمواقع الالكترونية.

• الهدف لمن يتسجل بقيت امشي (المطبخ) اشرب لي موية .. وافتح التلاجة واقيف فيها سنة .. وارجع عشان اشوف الهدف صحيح ام غير صحيح؟

• انا تاني ما بتمقلب ليكم.

• يا زول نحن ما عندنا اعصاب للجرجرة دي.

• القون في نهائيات كأس العالم بقى يحصل عليه جدل ونقاش زي (قون المغربية).

• والله انا ما كنت فاكر يأتي يوم يكون فيه قيمة لقون المغربية.

• الناس ديل شالوا (الفار) مننا.

• اوعك تستعجل ترسل ليك رسالة او تفرح بهدف قبل (الفار) ما يقول كلمتو.

• امهاتنا ديل .. طلعن (عالميات) … زمان كان بنسمعن يكوركن وهن في المطبخ اللبن (فار)… البيت كلو يجري على (حلة اللبن) في النار.

• هسع الموضوع بقى عالمي (الفار) بقى في الكورة .. والعالم كله وقت يتدخل (الفار) بكون في حالة ترقب وانتظار.

• اتاريهو (الفار) بتاعنا دا ما كان ساهل.

• نحن ساكت كنا شايلنها مع (اللبن الحليب).

• والله كأس العالم المرة دي زي الزول العاوز منو قروش .. تضرب ليه تلقى تلفونه فاتح .. لمن تتخلع.

• ما تصدق.

• مفاجآت غريبة.

• السعودية فازت على الارجنتين.

• تجي بولندا تفوز على السعودية.

• تقوم السعودية تطلع وتتأهل بولندا التى خسرت من الارجنتين بنفس النتيجة التى خسرت بيها الارجنتين من السعودية.

• دي سمعتوا بيها قبل كدا.

• تونس تتعادل مع الدنمارك.

• تونس تفوز على فرنسا.

• نتائج بديعة.

• بعد كل ذلك … تونس تطلع من مرحلة المجموعات وتتأهل فرنسا واستراليا التى خسرت من فرنسا 1 / 4 بعد ان فازت تونس على فرنسا.

• عليكم الله هسع (استراليا) علاقتها شنو بالتأهل للدور المقبل؟

• كأس العالم ما مفهوم.

• زي الفيلم الاجنبي البتكون ترجمته ما واضحة.

• المفاجأة الاكبر.

• اليابان فازت على المانيا.

• قلنا صدفة.

• والمانيا ما ركزت في الكورة.

• والمانيا تستاهل.

• اليابان فازت على اسبانيا.

• لا دي كتيرة.

• متل حصة العربى البقلبوها (رياضيات) .. الحصة كلها تعاين بالشابك وتعاين في الساعة عشان الحصة تنتهي.

• الشيء الغريب في (الجوطة) البتحصل دي المستفيد الاول منها بكون منتخب ما عندو أي علاقة بالموضوع دا.

• كأس عالم غريب.

• المغرب تتعادل مع كرواتيا.

• المغرب تفوز على بلجيكا.

• المغرب تفوز على كندا.

• عشان المغرب تتصدر مجموعتها في وجود كرواتيا وبلجيكا.

• حاجة اصلو ما مفهومة.

• اغرب من كل ذلك ما حدث في المجموعة السابعة .. حاجة ما بصدقها عقل.

• الكاميرون تتعادل مع صربيا 3 / 3 في مباراة غريبة الاطوار والأهداف.

• الكاميرون تفوز على منتخب البرازيل الذي لم يهزم في مرحلة المجموعات منذ عام 1998.

• الكاميرون تخرج من مرحلة المجموعات.

• بعد كل ذلك.

• عاوز اقول ليكم في الحتة دي حاجة.

• عاوز اذكركم بكلام المدير الفني للهلال فلوران عندما تحدث عن (طريقة السنجاب).

• الجماعة ديل لو اشتغلوا بنظرية (السنجاب) كان اتأهلوا .. مع معقول تفوز على المنتخب هو المرشح الاول للقب وما تتأهل.

• فضيحة السوّاد.

• الاثارة والمتعة .. والاكشن .. والشهد والدموع كانوا في مباريات المجموعة الثامنة .. تحديدا في الجولة الاخيرة.

• ما حدث في هذه الجولة شيء لا يصدقه العقل.

• غانا يحسبوا ليها ضربة جزاء في بداية مباراتها مع اورغواي.

• اتخيلوا حصل شنو؟

• غانا تكرر ما فعلته امام اورجواي في كأس العالم 2010 عندما اهدرت ضربة جزاء في الشوط الرابع وحرمت منتخبها من تاريخ غاني وافريقي في كأس العالم.

• غانا لم تستفد من الدرس .. اضاعة ضربة جزاء تاني وإمام نفس المنتخب وفي نفس البطولة.

• المفاجأة ليس في اضاعة ضربة الجزاء.

• المفاجأة قدام.

• اورغواي سجلت في منتخب الغاني الهدف الاول.

• وسجلت الهدف الثاني.

• اورغواي انتصرت على غانا منافسها الرئيسي على التأهل 2 / صفر.

• تتخيلوا اتأهل منو؟

• والله الناس الحضروا هذه المباريات لغاية الآن ما مصدقين.

• اتأهلت كوريا الجنوبية لأنها فازت على البرتغال 2 / 1.

• ما عمله سواريز في غانا .. عملتوا فيهم كوريا الجنوبية.

• الايام دول .. والدنيا رضايه ..سواريز يبكي اخيرا.

• بالمناسبة.

• ومن هذا المنطلق.

• انا برشح منتخب كوريا الجنوبية او اليابان يفوز باللقب.

• تاني اصلو ما بمتقلب.

• كفاية اننا اتمقلبنا كتير.

• رشحنا الارجنتين .. اتغلبوا لينا من السعودية.

• رشحنا فرنسا .. اتغلبت من تونس.

• رشحنا المانيا اتغلبت من اليابان.

• قبلنا على اسبانيا .. اتغلبوا من اليابان.

• قلنا ما في غير رونالدو .. منتخب البرتغال اتغلب من كوريا الجنوبية.

• نحن نعمل شنو؟

• رشحنا البرازيل اتغلبت من الكاميرون التى خرجت من مرحلة المجموعات.

• نحن نعمل ليكم شنو اكتر من كدا؟

• نتقطع؟

• انا تاني ما عندي غير كوريا الجنوبية واليابان .. ديل اكتر منتخبات بيلعبوا كورة جماعية وسريعة .. وجادة ما في استهتار او استرخاء .. في مسؤولية كاملة.

• السعودية تغلب الارجنتين.

• واليابان تغلب المانيا واسبانيا معا.

• معقولة تونس تغلب فرنسا وتطلع.

• الكاميرون تعلب البرازيل وبرضو تطلع.

• كوريا الجنوبية تغلب البرتغال ويطلع منتخب اورغواي.

• كأس العالم زي (الكاميرا الخفية) السنة دي.

• هذا حدث في مرحلة المجموعات .. مرحلة مباريات الاقصاء التى تحمل قدر اكبر من المفاجآت والإثارة والمتعة .. ماذا سوف يحدث فيها؟

• لدور التمانية برشح مصر.

• ما تعقدوا تتغالطوا فينا.

• انا حر في توقعاتي.

• دور الاربعة برشح جنوب افريقيا.

• النهائي احتمال كبير يكون تشاد واثيوبيا.

• وبعد دا .. السودن لو شد حيلو شوية .. وناس ابوعاقلة وبخيت خميس وصلاح عادل كانوا في الموعد ممكن نشيل كأس العالم.

• اصلو ما في حاجة غريبة.

• أي حاجة واردة.

• ما في حاجة بعيدة السنة دي من كأس العالم.

• ………………

متاريس

• الهلال يلعب اليوم امام توتي.

• نحن مالنا ومال كأس العالم.

• ما في احلى من انتصار الهلال.

• ما في متعة اكبر من كدا.

• كأس العالم اثبت .. ما في مباراة ساهلة.

• واي فريق يمكن ان يخسر.

• ناس الهلال يعملوا حسابهم.

• المباريات الساهلة احيانا بتكون مشكلة.

• وفريق توتي سوف يلعب بقوة وحماس اليوم وهو يلعب في استاد الخرطوم.

• توتي قبل كدا اتعادل مع الهلال .. وكسب الهلال توتي بالشكوى.

• توتي في هذا الموسم كسبت الشرطة بالشكوى.

• موسم ليك وموسم عليك.

• عاوزين نكسب في الملعب ونفوز.

• بالتوفيق ان شاءلله للهلال.

• الله غالب.

• ………..

• ترس اخير : بكرة يمكن تنقط!!