كان طارت عنز

بسم الله الرحمن الرحيم
في السلك
كان طارت عنز

* التعادل الذي خرج به السودان يعتبر مكسب
*السودان
*ياحليل الكان والشان
*وكان وكان
*كان كلام الريد امان
*وكان اسمها ام درمان
*ومابين الكائن الآن والكان زمان حرفان
*كاف ونون
*كن
*فياصاحب الكان الماضي والحاضر والآن انعم علينا (بكن)
*ليعود الكان زمان
*ويكون كلام الريد حنان
* المهم
*تعادل اعتبره مكسب باستصحاب الاعداد والكلية وحداثة المدير الفني في تولي المسؤولية
*نحتاج لشغل وانسجام واستقرار وبنمشي لي قدام اذا ما مشينا الآخرة
*من شكل الاداء لسة علة الكرة السودانية في بطء الوسط
*ولواكة الكورة في اخطر خطوط الملعب
*علة الكرة السودانية كانت في العكسيات
*ثم استصحبت معها التمرير الخاطئ
*ثم ضمت اليها بطء التحول من الدفاع للهجوم والعكس
*ولان البحر مابيابه الزيادة زادت عللنا بضعف الاطراف وسوء التغطية وسوء التهديف
*عادي لاعب منتخب ممكن ينفرد في ليبيا يوديها تونس
*وعادي الطرف ممكن يعكسها في الكشافات
*بمناسبة الكشافات
*الاضاءة الجديدة بتاعت الهلال جات ولا لسة!!!!!
الله يلعن الحرب الحرمتنا من مانشيتات ادمناها
*اضاءة الجوهرة الجديدة تصل البلاد
*ياحليل البلاد والعباد وتلك المانشيتات
*المهم
*نصبر علي منتخبنا
*ومن غيرنا صبر حتي علم الصبر اننا نصبر علي شئ امر من الصبر
*سنصبر حتي يأذن الله في امرنا
*وغير الصبر نحنا بنملك شنو
*اهملنا منتخبنا لدرجة بقينا ننهزم جوة وطننا
*ومن منو؟
*من منتخبات لسة متخلفه
*يلعبوا بينا جوة بلدنا
*ونحن مابين مصدق ومكذب نحاول ان نلملم جراحاتنا ونحلم بهدف الدقيقة تسعين يعيد ماء الوجه
*جزء مننا لايتحمل
*من اول باصين للخصم وتهديفه في الحديدة
*طوالي بمرقوا
*بمرقوا طوالي
*ونقعد نحنا الفضلنا نسخر منهم مرقوا مرقوا
*والعدو يتسيد الملعب طولا وعرضا
*ونضحك
*ولاندري اننا نضحك علي انفسنا
*ثم نتمناها درون
*ماقلت ليكم انه تعادل بطعم المكسب!
*المباراة دي التعادل فيها خير
*اذا استفدنا فيها ومافرطنا في فريقنا القومي
*فالانتماء القومي والاحساس بالقومية النبيلة
*تجبر كل المشجعين علي الوقوف خلف الفريق القومي
*نهلل للهدف الذي يحرزه منتخبنا
*بصرف النظر عن من احرز الهدف ينتمي لياتو نادي
*نشجع المنتخب ولو لم يكن بتشكيلته لاعب من نادينا
*الحصة لما تكون وطن
*لازم نلعب للسودان
*لا للجماعة ولا لاخوان
*وتذوب كل الالوان في علم السودان
*اللهم انصر السودان فيما تبقي من معارك كي نلحق بالعالم في كأس العالم
: *ويجب ان نستفيد من التجربة المريرة وتاني مانهمل السودان
*المنتخب ده هو البمثلنا والبنتصر لينا وباسمنا
*ولعلها عترة حاتصلح مشينا
*معقولة فريق قومي
*فريق اول
*ونهملوا للدرجة دي
*ويوم الكورة نفتش لعلوق الشدة؟؟؟؟
: *اللهم انصر الفريق الاول الوطني
*اها
*اهل المريخ يتداعوا يوميا يتباحثون قتلا لاشكالية المريخ
*مثل هيك نقاشات نفترض فيها انها تقربنا من بعضنا
*ولكن للتحزب الشديد بالمريخ
*ولان الانتماء للكيمان في كوكب المريخ اضحي عند البعض اقوي من الانتماء للمريخ الوطن
*لكل ذلك نخرج من كل نقاش باتساع الهوة بين مريخابي واخيه المريخابي
*نقاش الناس تحس فيه بالاصرار علي الرأي وعدم الاعتراف بالرأي الآخر
*ولاحتي سماع الرأي الآخر غير وارد
*لذا تجد كل النقاشات في جميع القروبات والمنابر مكررة ليها سنين
*ايها الناس
*قالوا اتنين جنهم غلاط
*شافو حاجة من بعيد
*واحد قال قمرية وواحد قال غنماية
*واحتد الغلاط والتمسك بالرأي بينهما
*ذهبا للموقع للتأكد
*بدت تظهر الحقيقة
*انها قمرية
*القال غنماية لم يعترف بالخطأ فقال
*لو طارت غنماية
*فطالما نقيم نحن اهل المريخ نقاشاتنا بفقه لو طارت غنماية
*صدقوني مابنحل مشكلة
*وحانطير سنويا
: *المهم
*الظروف ودتنا لمدينة ولائية للجواز
*الظروف مامعروفه
*وسكنا في قرية ملاصقة لتلك المدينة
*قرية خمسة نجوم
*اجرة الغرفه والبرندة خمسمية الف جنيه
*لانه وعلي حد تعبيرهم (مفرشة)
*تلاته عناقريب والمراتب تقول ملايات
*خفااااااااف
*وابريق وكرسي وبنبر
*ومفرشه علي حد تعبيرهم
*ولو دخلت الحمام بالنهار الا تشيل معاك شمسية
*اما بالليل فيمكنك مناجاة النجوم عادي
*تقضي حاجتك وتناجي وتحمد الله الذي اذهب عنك الاذي وعافاك
*مفرشة
*المهم الصباح بنشرب الجبنه عند ست الشاي الفي السوق
*ونحنا قاعدين جا شافع بلعب بطيارة الورق الزمان ديك وجاري
*لقي الخلا ده والهواء قشه مامعتره ليهو ومضي يلهو
*نحنا ماشفنا الشافع
*بس شفنا ليك طيارة الورق
*طبعا بتجي بدون صوت
*ويافكيك
*البلد كلها اتشنقلت من الضحك علينا
*عرفونا جايين من مناطق حرب
*إت آ زول كت قايلها مسيرة؟
*ده كان تعليق الشافع سيد الطيارة علينا
*وانكشحت الجبنة
*وانكشحت الدوايا
*ووا شقايا
* اللهم انصر الوطن
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت ياوالينا
*مامحتاجين مدارس تفتح لينا
*محتاجين مصحات نفسيه تأوينا
*الواحد فينا بقي يزاول من ضلو يا والينا
سلك كهربا
ننساك كيف والكلب قال الفشل جميل اذا بعدو رددنا شكرا للفشل الذي علمنا النجاح…. العترة لازم تصلح المشي
والي لقاء
سلك